يوم تانى خالص ............برضه فى الاستاد

السنه اللى فاتت زى اليومين دول اعلن الاهلى انه حايستضيف فريق برشلونه يعنى رونالدنهو و ميسى و حاجات من دى فى القاهره عشان يلعب مع الاهلى بمناسبة مئوية الاهلى

و انطلقت الجماهير المحبه للبحث عن تذاكر

مافيش خالص

خالص خالص يعنى عشان كلها راحت شركات اعلانات و بتتوزع بمعرفتهم

لكن واحده صديقتى و مامة تلامذتى قالت لى انها تقدر تجيبلى تذاكر عشان هى تعرف مدير الاستاد

كان من سابع المستحيلات طارق جوزى ييجى معايا عشان هوه زملكاوى طحن

كلمت احمد اخويا الصغير وقلت له ايه يا حمد الماتش بقه وكده

قال ياريت انا كل صحابى اتصرفو وجابو تذاكر

قلت له عايز تروح يا حبيبى

قاللى يا ريت و الله يا ام المن ( ام المن دى دلع منى اللى هى دلع ايمان اساسا بس احمد اخترعهالى و هوه بس كان بيقولهالى )

و حصل فعلا و صاحبتى العزيزه جابت التذاكر و كانت درجه اولى بالسعر الاصلى بتاعها يعنى خمسه و سبعين جنيه بس

احمد طار من الفرحه لما عرف و بدانا نحضر نفسنا خلاص عشان نروح الماتش

قبل الماتش بيوم واحد اتصلت بى صديقتى و قالت لى ان التذاكر اللى معايا مضروبه عشان ما فيهاش بار كود و ما تساويش ربع جنيه و انها حاتاخدهم منى و تدينى الفلوس عشان ترجعهم للراجل

قلت خلاص العوض عليك يا رب

و كلمت احمد عشان ما كنش فى القاهره

قاللى مافيش مشاكل يا جميل اجيلك نتفرج فى التلفزيون عندك مش مهم

لكن حاجه فى صوته خلتنى احس انى ممكن ابيع الجاكته بتاعتى بس اجيبله تذاكر

و بالليل خلصت شغل الساعه عشره و نص و رحت عند بقعتى السوداء المفضله

الا وهى السوق السوداء بجوار اهلى مدينه نصر

التذاكر بالهبل بقه و انت و شطارتك درجه تالته بميتين و درجه تانيه بربعميه و كل واحد حسب شطارته و حسب الفصال

و كل واحد اقف معاه اقول له معلش اصل جوزى زملكاوى و انا اللى مضطره اشترى بنفسى

لدرجة انهم كلهم عرفونى انى مرات الزملكاوى عشان لما واحد فيهم كان يلاقى تذاكر مع زميله

يقول له روح لمرات الزملكاوى هناك عايزه تذاكر

لدرجة انى حسيت انها شتيمه هاهاها

كلمت احمد و قلت له الدرجه التانيه بربعميه يا بوريو( اسم الدلع بتاع احمد ) اعمل ايييه

قاللى لا حرام غاليه اوى

قلت له انا مش باسالك اجيب و لا لاه انا بقول السعر كده ايييه

قاللى صحابى جايبنها بربعميه و خمسين بصى يا ايمان روحى بقه و كبرى دماغك

و قفلت معاه

وبعدين ظهر واحد غلبان راكب موتوسكل معاه تذكرتين هديه من فودافون

درجه اولى

سفلى

يعنى اجدع حاجه خالص فيك يا استاد بعد المقصوره

و اشترتهم منه الواحده بميتين خمسه و سبعين جنيه حلو و الله مش بطال

و كلمت حبيبى

بوريوووووو جبت لك تذاكر يا جبيبى بس مش درجه تانيه

رد على : مش مهم يا منونه ممكن تالته المهم نشوف عمك رونالزينهم ده هاهاها

قلت له عيب عليك الميس تقعد فى تالته

اولى سفلى يا حبيبى !!!! كان حايتجنن و قعد ينادى صحابه و سامعاهم بيهنوه و يحضنوه زى ما يكون خد الكاس

و لما عرفو بكام ماصدقوش عشان كلهم جايبين اغلى من كده بكتيييييييير

و قاللى صحابى بيقولو ايمان ارجل واحده اشترت تذاكر النهارده هاهاها

تانى يوم رحت المدرسه عشان كان عندى حصتين الصبح و كان لازم اؤدى الواجب الوطنى برضه بس رحت بالترينينج و خليت عايده الشغاله تعملى ساندوتشات تكفينى انا و احمد و صحابه

جالى حبيب قلبى و كنت جايباله فانلة ابو تريكه رقم 22 وجابلى عيالى من المدرسه الاول عشان نادين طول عمرها كانت تقول نفسى خلولى يجيبنى مره واحده من المدرسه

و حصل جابها و حضرنا نفسنا و علمنى خدعة المياه اياها خلانى اخد قزازيتين عشان ادى واحده للراجل ع الباب و اضحك عليه و ادخل بالتانيه

و طارق الله يكرمه وصلنى انا وهو عشان الزحمه كانت مهوله و مش عارفين نركن العربيات فين

و انا داخله معاه الاستاد ماسكه فى دراعه قلت له ياواد حايفتكرك متجوزنى و انا اكبر منك كده عشان فلوسى هاهاها

قاللى اكبر منى ايه بس يا ام المن ده انتى نونو حتى شوفى انت طول ايه و نا طول ايه

فى دى كان عنده حق

كان اطول منى بمتر مثلا ..............

دخلنا و هناك اكتشفنا ان درجه اولى سفلى اغلى من علوى عشان كده ما ينفعش صحابه يدخلو معانا لكن احنا ممكن نطلع لهم فوق

قلت له يا احمد روح لصحابك و سيبنى هنا

قاللى ايه ده ان شاء الله مش ممكن انا جاي معاكى انتى مش معاهم

استجدعته اوى الصراحه و طلعت معاه فوق رغم انى كنت قاعده جنب جد تريكه ( ابو ابو تريكه عشان احمد قاللى ان اللى جنبى دول عيلة ابو تريكه كلها )

و لم اندم لحظه انى طلعت فوق عشان لقيت مسخره مستنيانا تلاته صحاب احمد زى العسل هانى و حسام و هلا و ساعات يقولوله هيطه هاهاها

و بعدين قعدو يعملو دوشه جامده اوى و يشجعو بفظاعه من قبل الماتش بست ساعات من عينة بقه

اعمل له ايه ........... مانويل جوزيه ؟؟

قول الحق ........... خليك جرىء .............. النادى الاهلى ............. احسن فريق

اسكوبارارارا اسكوبارارارو ابو تريكه ابو تريكه

انا قاعده اتفرج زى ما اكون رحت الملاهى هاهاها

و بعدين لقينا ممثل اسمه امير كراره قدامنا و كل مصر رايحه تتصور معاه

قلت لاحمد روح يابنى اصورك معاه قاللى مش باحبه بس استنى

راح له و قالله كابتن امير كابتن امير

الفنان العظيم بص له و قاله عايز تتصور معايا ؟؟؟
احمد اداله الكاميرا و قاله

لا بس ممكن تصورنى مع اختى و اصحابى لو سمحت ؟؟ هاهاهاها

و صورنا الراجل فعلا و هوه مذهول مذهول يعنى

بس مخرج و الله امير كراره الصوره دى هوه اللى مصورهالنا

بعدين التتار جاعو طلعت الساندوتشات

اخدوها و قعدو ياكلوها زى عبد الحليم و صحابه فى فيلم الوساده الخاليه

يعنى زهقانين كده و بياكلو بالعافيه و مش طايقين نفسهم

لقيت احمد بيقول : جرى ايه يا واد انت و هوه بالنسبه لستكو اللى عملت الساندوتشات دى ما فيش ميرسى ه قوم بوس ايد ستك يا واد منك له فضحتونا

مش كفايه قاعدين تهللو و تشجعو وهى قاعده تقرا يا غجر ( فعلا كان معايا كتاب لنجيب محفوظ تسع ساعات بقه استغلهم )

واحد فيهم قاللى متشكر يا طنط

لقيت احمد اداله بوكس شنيع و قالله

نط ايه يا بغل انت دى ايمان قد بنتك........... مليتو البلد

معلش يا اختى ما تزعليش من صحابى حاجه عره و الله هاهاهاها

و انا ما كنتش زعلانه بالعكس

وانا قاعده بعت رسايل لكل صحابى حول العالم اقولهم انى فى الاستاد مش مهم بتفرج على مين ولا مهم باعمل ايه

المهم انى كنت فرحانه انى مع احمد

وكلمت ماما و قلت لها ماماااا انا وقعت فى فيلم اوقات فراغ الحقينى و قعدت تضحك و كان ردها

اخوكى حايكلم الشيخ صالح يشيل الفيلم ده من الاى ار تى ( كان ايامها على سينما ) علشان طول النهار اسال اخوكى اوعى تكون بتجيب بانجو يا واد

اوعى تكون تعرف ستات يا منيل عشان كده قرر يطلب ايقاف الفيلم من اي ار تى سينما

المهم التشجيع الجنونى استمر لحد ما بدا الماتش

يا خرابى

ايه الشلوحه دى

الاهلى اتلب اربعه صفر لمؤاخذه

يانهار اسود امال يابان ايه و بتاع ايه

يا ريتنا لاعبنا اسمنت اسيوط فى المئويه و خلاص يا دى الفضايح و الاستاد مليان زملكاويه جايين يفرحو فى الاهلى اهم اخيرا لقو حد يغلبه و القرعه تتباهى بشعر اى حد ما تعرفوش اساسا هاهاهاهاه
و قبل الماتش ما يخلص بدقيقه

قام هانى صاحب احمد مشى

يا نهار اسود ده هانى اللى حايوصلنا البيت

و طلع احمد يجرى وراه و يقول لى اصله اهلاوى اوى يا منى تلاقيه بيعيط دلوقتى

و انطلق احمد يجرى و يصيح

يا هاااااانى ارجع الاهلى جاب خمس اجوان فى الدقيقه الاخيرااااه

يا هاااانى ارجع الاهلى كان لابس اصفر مش احمر يا خويا ( برشلونه كان لابس اصفر )

المهم الحمد لله لقيناه قبل ما يعمل فى نفسه حاجه

و طلعت انا و احمد و صحابه مدلدلين من الاستاد بس بنضحك اخر حاجه و الله

و بعدين ناس زملكاويه مشيو ورانا بطبله

و قعدو يغنو

ياحلوه يا بلحه يا مأمعه

شرفتى اخواتك الاربعه الاربعه الاربعه

مش حاقولكم المجهود اللى عملته عشان اسيطر على الفريق الاحمر ده عشان ما يضربوش العيال دى و يطلعو فيهم كبسة الاربع اجوان

و فضلت مشكله واحده

كلهم حايروحو بيوتهم انما انا اورى وشى لجوزى فى البيت ازااااااااااااااااااااااااااااااااااااااااااى ؟؟؟؟؟ مش انتى مرات الزملكاوى استحملى بقه يا ستى

حاولت امنع نفسى الاسبوع ده و اكتب فى اى موضوع تانى
لكن الوقت و الجو وكل حاجه حوالى غصبت على اكتب فيه عشان هوه كمان مسيطر على تفكيرى جدا جدا و مش قادره افك منه خالص
عشان كده ارجو تستحملونى لو ما ضحكتوش زى كل مره
او حتى لو بكيتو على عكس كل مره

طبعا اللى يعرفنى كويس حايعرف ان دى كانت اخر مره اقعد مع احمد عشان هوه توفى بعد اليوم ده بايام قليله اوى

يوم 11/5 / 2007

ارجو ما كونشى تقلت عليكم بالحكايه دى

و صدقونى انا مش بابكى و انا باكتبها

لا بابتسم و انا باسترجع كل ذكرى جميله حصلت فى اليوم ده و ادعيله

عشان هوه كان بسمه كبيره ماشيه ع الارض

و ربنا اختار لها مكان تانى

اختار لها السما

اللهم ارحم احمد و امنح الاجر اضعاف لكل من يدعو لحبيبى بالرحمه

ده لينك جروب احمد ارجو الا تبخلو عليه بالدعاء

http://www.facebook.com/group.php?gid=5024194793

و ده لينك التعليقات بتاعكم المعتاد ما تبخلوش على انا بقه بتعليقاتكم الجميله

http://www.facebook.com/topic.php?uid=5663673625&topic=4103&start=90&hash=a8f5c970003c01c9f4eb9d8659038735