السبت، 31 مايو، 2008

ذكريات الطفوله المشرده 2

ملخص ما سبق : تحت اهه اقروه هوه انا فاضيه
العيال اللى فى الفصل المتعدد الجنسيات بتاعى ، لما ميس سميره بتاعة الماث ، و ميس ساميه بتاعة الموسيقى ، حبونى اوى ده غير ميس فيوليت اوف انجليش
كلهم كانوا شايفيين انى عبقريه عشان جيت من السعوديه حيث المناهج اسهل بكتير و ما دخلتش تقريبا تالته خالص او دخلتها كده ، و خرجت من الناحيه التانيه و فى ايدى جزمة سندريلا
و مع كل الظروف دى ، اول ما توفرت لى بيئه صحيه للتعلم
حلوه بيئه صحيه دى ؟
بقيت شاطره و بريمو ، غاروا منى ، و بدأوا يعملوا خطط عليى
ايه هى الخطط ؟
مريعه شنيعه
مش حاقدر اتكلم
معلش حاقول ، و احده فيهم اسمها نائله تتصل بى و تقول انها التانيه اللى اسمها رلى
و انا صغيره ما كنتش فاهمه ليه يعنى ايه الفرق هما اصلا صحاب و مع بعض و متفقين
و قلت يمكن لما اكبر شويه ابقه افهم الموضوع ده
و حياتكم لحد دلوقت ما فهمت ليه نائله عملت نفسها رلى ؟
و فى يوم من الايام نظرت لى ميس سميره بحب و قالت ، البت دى ذكيه ، تعالى يا ايمان انتى امسحى البورد
بصيت للشله المفتريه ، لقيتهم كلهم بيكزوا على سنانهم ، قلت للميس ، معلش يا ميس جمانه هى ان تشارج ( المسئوله )
ميس سميره استغربت ، و قالت مين قال كده
من النهارده انت يا ايمان المسئوله عن مسح السبوره فى حصتى
و دى كانت اسعد لحظه فى حياتى المهنيه ، اذ انى انتصرت على الاعداء و بقيت بامسح السبوره ، مين عارف ، يمكن كمان شويه ، اوزع الكراسات ع العيال
و بعدها بكام يوم ، واحده منهم اسمها ريا
قصدى اسمها ربى ، قالت لى يا ايمان لما افتح المقلمه بتاعتك يبقى عايزه اغش منك فى الدين ، تبقى تغششينى ماشى ؟ و بعدين نتصاحب بقه
بصراحه كانت اول مره حد فيهم يكلمنى كويس ، و العرض كان مغرى
اللهم اخزيك يا شوشو ، و بعدين افتكرت مامتى
يا ايمان لا تغشى و لا تغششى يا حبيبتى ............كلمة مامتى المأثوره
المهم جه امتحان الدين ، و البت تفتح فى المقلمه ، و ترزع فيها و تقفل ، و انا اقول لها ششش بسسس
ما فيش فايده
قمت و قلت : يا ميس ، البنت دى عايزه تغش منى
و كانت غلطة عمرى
كل الشله اجمعت و اقسمت ، انى انا اللى بغش منها ، يا جماعه ازاى شوفو درجاتى و درجاتها ، و الميس بقت محتاره ، مش عارفه تعمل ايه ، و بعدين
قالت لى بكل الاطه : اقعدى يا ايمان عيب تفتنى على صاحبتك
و كانت كبسة العمر ، اتعلمت بعدها درس العمر برضه
لما حد يفتح لك المقلمه ، غششه و اسكت
و مع ذلك قعدت اذاكر و ادح ، و بعد ما كنت باطلع الرابعه و الخامسه ، مشيت من الفصل و انا التانيه عليه ،
ليه مش الاولى ؟
عشان كان فيه ولد اسمه محمد محمد الكاتب ، مش عارفه ده كان فى صيدله او هندسه و بيحضر معانا فى رابعه ابتدائى ولا ايه ظروفه
عارفين يعنى العقد النفسيه ، جابهالى كلها و الله
شاطر بغباء يعنى ، فعشان كده كان الاول ع الفصل هوه التانى بعد محمد الكاتب
عشان هوه حاجز حضرتك علطول الاول
ياترى هوه فين دلوقتى ؟
مرت ايام دبى بحلوها و مرها ، كانت برضه اجمل من مصر ميت مره و انضف ، و كنت برضه بحب مصر ، عمرك شفت عيله صغيره كده بتحب مصر
يعنى هناك كل جمعه بابا كان يودينا اوتيل و ننزل البيسين و اوبن بوفيه و عيشه
و ارجع بالليل اعيط زى النكديه ، عايزه اروح لطنط توحاه
دى خالة والدى الله يرحمها و كانت جدتى الحقيقيه
و بمناسبة البيسين مره قعدت انا ومروه نعيط لماما
عايزين نروح البحر الحقيقى
صحابنا بيروحو جبل على ينزلو البحر المملح عايزين نروحه
مش كله بيسين بيسين ( انا عارفه عيال فقر ماشى
المهم بابا قعد يحذرنا
يا بنات الموج عالى اوى هناك حاتتبهدلوا
ما لناش دعوه عايزين نروح البحر
ماشى حاوديكم
و حسيت فى عينين بابا نظره كده غير مريحه
و رحنا البحر
اول ما نزلنا بسلامتنا موجه شنيعه مليانه رمل و حصى كبير كده
ديش فى وشى انا و مروه لقينا نفسنا جنب ماما تحت الشمسيه
و حاولنا للمره التانيه
و نفس العلقه بالضبط و الرمل فى الميه بيخبط فى وشنا و هو رمل كبير كده و بيوجع
المهم تانى مره قعدنا بقه جنب ماما
جه بابا : مانزلتوش ليه الميه يا حلوين
احنا : خلاص نزلنا شكرا عيزين ناكل و النبى
مش عارفه انا لقيت البحر اتقلب كده بقه فوق و السما تحت
عشان بابا راح شايلنى انا و مروه
و رمانا فى البحر
انا سايق تلاتين كيلو عشان تقولو نزلنا
و دينى لانتو نازلين البحر
و احنا نعاااايط
خلاص يا بابا و الله ما نقول نروح البحر تانى
و هو ابدا و الله لازم تنزلو البحر
خلاص يابابا و دينا البيسين براحتك اخر مرااااه
لو حد فيكم كان فى جبل على ساعتها و شاف المشهد التالى
عيال بتعيط و تنزل الميه و هى بتعيط و الموج يرميهم بره
و و يرجعوا تانى ينزلوا الميه معيطين
دول يبقو انا و مروه
و مش الهة جبال الاوليمب اللى كانت عاملالنا العقاب ده
لا ده بابانا حضراتكم هاهاها
وهو كان فين
كان فى الميه عشان كان خايف نغرق
ماهو برضه الضنى غالى
بس مش اوى الظاهر
من الحاجات اللى كانت بتجننى برضه فى دبى مع ان االناس هنا فى مصر فى اول التمانينات كانوا بيروحوا ملحق هلتون رمسيس خصيصا عشان يستعملوها
السلالم الكهربائيه
انا كانت عقدة عمرى ان مافيش مول فيكى يا دبى الا فيه سلالم كهرباء
و رغم انى عايشه هناك ، كنت امشى اتنين كيلو لحد ما الاقى سلم عادى انزل من عليه
كنت حاسه ان السلم ممكن يشفطنى و اطلع منه مدرجه
زى توم فى الكارتون بتاع القط و الفار
لا ما تخافوش
دلوقتى باطلع و انزل عادى خلاص
ده بعد ما لقيت ولادى بينزلو على الطالع بالعكس و لا هاممهم
اتكسفت اوى اوى اوى
طبعا كان العمر ده كله مر علينا من غير ما نحضر شتاء فى مصر ابدا ، و لا فى غيرها عشان الدول العربيه صيف بس ، اختى الصغيره مروه
( هى فى دبى حاليا بالمناسبه السعيده دى
كانت كل شويه تطلب من بابا نروح محل معين فى الغرير
كان اكبر مول فى دبى مروه بتقول عليه دلوقتى بقه خان الخليلى بتاعهم هاهاه
المهم رحنا المحل ده
الست عايزه تشترى ايه ؟
زحافات تزلج على الجليد و عصيان بتاعتها
بابا سالها : ايه يا بنتى عايزاهم ليه
مروه : يا بابا مش رايحين مصر و بتقولو هناك فى شتاء ، ناخد دول برضه نستعملهم فى التزلج
@#$%^%$%##%$#@$#@$@@
لا دى حاجات بابا قالها لمروه مش حاقولها لكم
و عدت الى بلدى بكل الفرحه ، و كدت اقبل ارض المطار من فرحتى بالعوده النهائيه
يا حبيبتى يا مصر يا مصر ، يا حبيبتى يا مصر يا مصر
طبعا كده فكرتكم بكاس الامم الافريقيه
و فى المطار جاء المفتش بتاع الجمرك عشان يبهدلنا
قصدى عشان يفتشنا
و كان معانا ستريو بابا حطه فى كيس و اداهولى اشيله عشان كان معانا فيديو وبلاوى متلتله حاتتجمرك فقال خلاص بقه مش لازم ده كمان
جه مفتش الجمارك الجميل سال بابا معاكم حاجه تانيه
بابا رد لا خلاص
انا بقه : يا بابا حضرتك نسيت ده يا بابا الكيس اللى معايا يا بابا
و سياحه بقه
جه بقه مفتش الجمرك و سالنى ايه ده يا حبيبتى مسجل
قلت له لا ايه مسجل ده
ده استريو يا عموووووو
@$##^%^%$&^%&^%&^%^%$$#^%*&
^%^$^%$%^$%$#%$#$#^%$##*&*&*&%
دى بقه حاجات بابا قالهالى انا لما طلعنا من مطار القاهره
و وصلنا مصر و بدانا الصدمات الحضاريه ..............يتبع
تعليقاتك مستنياها هنا و على الجروب كمان
لينك التعليقات

4 التعليقات:

سمرا يقول...

انا اول بوست
عقده نقص بقي
مانا مش ععارفه اجيبها بقي ف الجروب


عارف يامنمون انت لو بنتي وعملت موضوع الجمرك

حرجع بيكي مخصوص
عشان ارميكي ف البحر

ahmed يقول...

ya salam ya salam :D baba baba enta nset da :D 3'lta :d w kman lazem teftkry kalam mamatek f el emt7an :D lma tro7y mkan 3'reb eksbehom el awel :D bas tamam :D w a7sn 7aga enkom shofto el ba7r el 7a2e2y :P:P:P

الاء فهمي يقول...

بجد انت كومدية جدا, كله كوم و حكاية السلم الكهربا دي كوم تاني خااالص, بقى هتطلعي متدرجة زي توم و جيري, همممم ماشي ماشي :))))))))

ايمان بس بليييييييز بلييييز تشيلي البتاع اللعين اللي اسمه الوورد فريفيكاشين ده احسن بيركبلي العصبي ياختشي الله يكرمك :)))))))))

دودو يقول...

ماني حبيبتي..معلهش غبت عنك حبة كنت مسافرة بفسح الواد ابني المهم احلى ذكريات دي بتاعة ايام النضافة والعز اللي احنا مقدرناهوش
وكل شوية اقول انا شفت ايام عمر ابني ما هايشوفها ابدا الحمدلله بس فكرتيني بحاجات جميلة قوي ..زي الغرير اكيد طبعا بقى زي خان الخليلي بعد اللي بيحصل هناك دلوقتي ..على كل حتى الجليد بقى في دبي خلي مروة تتزحلق هناك براحتها بقى..وفكارة اكسبو اللي كان في الشارقة واللعب اللي كانت هناك والنطاطات اللي كنا بنهد حيلنا فيها..ومنتزه الجزيرة والسوق المركزي وايس كريم انكل سام اللي كان بيمشي في الشارع في العربية المكيفة اللي بتعكل موسيقى.احلى ايس كريم في حياتي...ايااااااااام تحفة
كويس اهو شفنالنا يومين من نفسنا قبل ما نشوف الهم بكل الوانه الهبابية...
في انتاظر البقية يا قمر
سلام

Template by:

Free Blog Templates