الأربعاء، 23 أبريل، 2008

مهرجان التسوق

من احب الهوايات لاى ست انها تشترى
تشترى ايه مش مهم
المهم انها تشترى
و نظرا لانى ست برضه زى اى ست
باحب اشترى اوى
كنت بافرش شقتى الجديده و كان لازم اغير الفرش
بصيت لقيت اسعار الصالونات و السفرات نار يا حبيبى نار رغم انها ما تختلفش كتير عن حاجاتى القديمه
قلت ايه اعمل واعيه و اشترى اقمشه جديده و اجدد الصالون و السفره كده اوفر
و قد كان
سالت اصدقائى احسن مكان فين الاقى فيه اقمشه
قالولى وكالة البلح بس لازم تفاصلى

ده انا ملكة الفصال و الله لا بهدلهم هناك
و نزلت انا و طارق جوزى ، انا اخر شياكه و جوزى حاطط لى السماعه البلوتوث فى ودنه
المهم رحنا محل شيك هناك و شفت قماش عجبنى لونه لانى ما بافهمش فى الخامات اوى
و سالت الراجل بكام ده
قاللى بميه و عشره جنيه
قلت له لا لا لا
ده غالى خالص
خليه بستين جنيه بس
قالى طيب ماشى عشان خاطرك اقص كام متر

قلت له لا خليه خمسه و خمسين
قاللى حاضر برضه بس ترضيلى انا اشيل الفرق ده
قلت له اه شيل الفرق عادى ما الناس لبعضيها يا اخى

المهم جبت القماش و جبت منجد مخصوص جالى البيت و قعد يعمل فى القماش يوم كامل و خد مبلغ و قدره و قاللى يا مدام القماش بيبقع بسهوله اوى خلى بالك و كمان خفيف شويه
قلت له حاحاول احافظ عليه بقى اعمل ايه

تانى يوم انا و جوزى ماشيين بالعربيه فى الازهر و الاقى قماش اخو اللى انا شارياه عند محل حقير خالص
قلت لجوزى لو سمحت نزلنى هنا اسال عليه
الزحمه يا ايمان و بتاع
عشان خاطرى يا طارق

نزلنى طارق
لقيت المتر بكام يا اساتذه
باربعتاشر جنيه و قابل للفصال لسه
يانهار اسود ومنيل

يعنى ممكن لو قرصت على الراجل سنه اخده باتنين جنيه المتر


و لقيت الدم فار فى دماغى و خلاص وشى احمر و كنت حاموت

راح جوزى قعد يهدى فى يا حبيبتى اهدى خلاص بقه مش مهم
قلت له مش مهم؟؟؟
قسما عظما لازم تودينى دلوقتى حالا

و نقاش طويل عريض وهوه مصر انى مش حاخد حقى و انا مصره انى حاخده تالت و متلت كمان

و طبعا كالعاده انتصرت فى النهايه لانى قلت له انى حاخد تاكسى و اروح لوحدى و انا اساسا مش عارفه السكه

الباشا جوزى جه معايا المحل و وقف مؤدب و ساكت
لقيت الراجل بيبيع قماش لواحده و بيقولها ده ارخص سعر يا مدام و اسالى بره
قلت لها يا مدام اوعى تشترى دول نصابين و اكيد حاتلاقى ده اغلى سعر و انا سالت بره

الراجل انذهل عشان هوه ما كانش فاكرنى , قلت له انا عايزه صاحب المحل
يا مدام فيه ايه
قلت له صاحب المحل حالا و الا انا مورايش حاجه و مقطوعه
حاقعدلك هنا طول النهار كل ما يجيلك زبون اطفشه اوكى

جه صاحب المحل و سالته متر القماش ده بكام
قاللى بتلاتين جنيه
قلت له الافندى ده قاللى ميه و عشره
الاعيب التجار بقه و قعد يقولى اصل فيه خامات و بلا ازرق
قلت له اوعى تفتكرنى هانم انا من بولاق و حيات ربنا لو ما جبت لى حقى دلوقتى لاروح على البوليس كمان و انت حر
قاللى طلباتك
قلت له حاخد عشرين متر قماش من نفس النوع ببلاش اعمله ستاير عشان انا شديته على الصالون فعلا و مش نافع و حسبى الله فيكم ( انا كنت شاريه سبعه متر على فكره )

قاللى حاضر
طبعا جوزى كان فى حالة ذهول
كان فاكر انه مش حايرضى و حايعند معايا
لكن انا نفسى استغربت
ما ضاع حق و راءه مطالب و الله


المهم تانى يوم نزلت جاليرى شيك اوى اوى و لقيت قماش تحفه على صالون عنده و سالته القماش منين
قاللى من فلان و ده محل مشهور اوى اوى
و قلت له حضرتك فاكر بكام الا حضرتك اسمك ايه
قاللى انا استاذ معوض
قلت له طب فاكره بكام
قاللى استاذ ابراهيم صاحب المحل بيبيعلى بخصم غير الناس يعنى باخد خصم كبير لو عايزاه ابقى اشتريهولك منه و اعملهولك على الصالون اللى يعجبك
قلت له انا عايزه قماش بس من غير صالون
قاللى لا يا مدام ما ينفعش لازم تاخدى صالون من عندنا

مشيت خلاص على راى الاستاذ الكبير وائل جسار

و رحت المحل المذكور و لقيت القماش اللى عجبنى بميتين جنيه المتر
و سالت فين الاستاذ ابراهيم
جه الاستاذ ابراهيم
قلت له اهلا استاذ ابراهيم انا جايالك من طرف خالو معوض و قاللى ان حضرتك حاتعملى اللى انا عايزاه

قاللى اهلا و سهلا بالغاليين نقى اللى انت عايزاه و عينى ليكى

نقيت بقه قماش للصالون و لاتنين بيرجير و بعدين الراجل عملى لى خصم مهول يعنى حوالى الف جنيه خصم
اكيد يا جماعه هوه مش خسران مش حايبيع بخساره عشان معوض لكن احنا ماشيين فى البلد دى ناكل على قفانا و يتنصب علينا يوميا ....................

بس الشهاده لله كل ما شوف القماش منورعلى الصالون ادعى علطول لخالى الاستاذ معوض هاهاهاهاهاهاهاه
ا


http://www.facebook.com/topic.php?uid=5663673625&topic=4103&start=0&hash=f5e28f793234360ee02b901a80e7dfd3
لينك التعليقات على الجروب لو عندكم حكايه شبيهه شاركونا

4 التعليقات:

doaa يقول...

حبيبتي مانّي الحلوة دايما..حكاية التجار دي حكاية ..اسأليني انا مش متجوزة شاه بندر التجار ما انتي عارفة الفولة برضه..ايام ما كنت بتجوز كنت انا واماني بنت خالتي بنتجوز سوا هي قبلي بشهر واربع ايام بالضبط المهم رحت معاها الوكالة وهي بتشتري الستاير والبراقع وقماش الانتريه والسفرة والليفنج روم كمان وخدي عنك هات يا فصال متر الستائر الترجال اربع كنارات من 85 جنيه في المتر الى ان وصل 25 جنيه المتر واكيد المعلم كسبان..متر البراقع من 50 جنيه الى 15 جنيه وهكذا وكل ما تشتري الواحد حاسس انه بيضحك عليه بس مش مشكلة..لازم نشتري مش هنجهز يعني ما هو لازم نجهز احسن حاجة علشان انتي عارفة بكرة الضيوف تيجي تتفرج وتفتش في الدولايب كمان وتمسك القماش و و و الخ زي ما انتي عارفة طبعا..المهم انا لما جيت اشرتي جوزي قالي خليكي معايا انا هشتريلك بدل ما يتضحك عليكو وانتو عيلة اصلا فكيكة وما بتفهمش في البياعين..تقريبا هرشنا من بدري..المهم جاب لي اللي اماني جابته بنص التمن تقريبا واقل كمان في بعض اشياء..فوجئت به واخدني سوق الحمزاوي بتاع الازهر..عم عاطف بتاع الستائر واهو من ضمن الحرامية برضه..طلب مني 90 متر براقع للريسبشن فقط
تخيلي 60 ذهبي و30 زتوني..تخيلي وانا كل اللي عندي بره اربع فتحات بلكونتين وشباك وارش الطرقة..المهم رحت جبت توبين
توب 60 متر وتوب30 متر متقفلين
المتر بكام يا باشمهندسة....المتر ب290قرش..أي نعم..تلاتة جنيه الا بريزة....الي اماني شارياه بعد الفصال المميت المستمين ب15 جنيه..واكيد عم حمزاوي برضه كسبان لانه محل تجاري مش سبيل للصدقة...وعجبي...

رئـــــيسـة حزب الأحلام يقول...

السلام عليكم مدونتك حلوة اوى انا اول مرة ازورك بس بجد تحفة حاسة انى قاعدة مع واحدة زميلتة وتحياتى لكى

ahmed يقول...

ya salam 3liky bgd :D b 100 ragel w a7sn 7aga fe3lan enk masbtesh 7a2k w d5lty feh gamed :d w bgd hwa shaklo 7elw awii awi bgd :D la w ela 7kayet 5alo dy hehehehehe :D bgd msh momken :d

Dena_cause يقول...

طب ياريت يعنى تقوليلى فين المحل دة عشان انا ختاو معوض دة اساسا اكتر خال ليا بحبة هههههههه انتى هايلة بجد بغض النظر انى حاسة ان فيه مذكرة قريب هتتحكى عن موقف فى القسم بس ربنا يستر عليكى و على الاستاذ طارق و الله بيناضل هو كمان هههههه حلو اووى ما ضاع حق وراءة مطالب حتى فى اصغر الاشياء و انا عارفة ان االفكرة مش فى الفلوس نفسها انما فى مبدا القرطسة دمتى مدافعة عن حقك يا سيدتى ههههه

Template by:

Free Blog Templates