الخميس، 8 مايو، 2008

يوم حزين ..............


من سنه




يوم الخميس عشره خمسه
الساعه خمسه الصبح
جرس الموبايل بتاعى ضرب
انا مش عارفه هوه ضرب امتى
عشان انا لقيت نفسى واقفه بارد يعنى مش فاكره صحيت ازاى و لا رحت ازاى لحد الموبايل
بس لما لقيت نمرة
والدى
رديت عليه

ايمان فى خبر وحش
انهرت على الارض عشان ما قدرتش اصلب طولى
قلت اكيد دى مش جدتى او جوز خالتى او مرات عمى
دى يا اما والدتى يا اما ................ اخويا
و لو كانت ماما
كان احمد زمانه صوته بيعيط وهو اللى كان زمانه كلمنى ...............
كل ده فى ثوانى معدوده فصلت بين بابا و هو بيقولى حاقولك خبر و حش
و هوه بيقولى .....................
احمد اخوكى توفى الى رحمة الله
ااااااااااااااااااااااااااااااااااااااااااااااااااااااااااااااااااااااه
لا ما قلتش كده ما قلتش اه خالص
سالته ازاى ؟
رصاصه من مسدس واحد صاحبه كانو رايحين فرح و طلعت غلط
سالته : و ماما ؟
قالى متبهدله ع الاخر الحقيها
ما قلتش لبابا حاجه تانيه
بس قعدت الف فى الاوضه حوالين نفسى و انا باخربش ايديا و اقول يا رب اكون نايمه
يارب يكون ده كابوس
يا طارق اصحى الحقنى يا طارق بابا بيقول احمد مات
بابا بيقول احمد مات يا طارق
كل ده و صوتى مش طالع خالص خالص
صحى طارق و ما قالش ولا كلمه
و لا حضننى و لا لم كيانى اللى كان متبعتر
انا من يوميها متبعتره
كان نفسى حد يلمنى , يضمنى
لكن للاسف ما لقتش
المصيبه ما كانتش بتاعتى لوحدى عشان حد تانى يلمنى
كلنا كنا فى الهم زى بعض
اتوضيت و صليت الفجر
و دعيت وقلت يا رب
انت عملت كده و دى ارادتك
انت حاتتصرف مع ماما يا رب
انا مش حاقول ولا كلمه
بس انت حاتتصرف انا عارفه

و كلمت اختى فى دبى
مروه كان نفسى احمد اللى يتصل يقولك ايمان ماتت , احمد مات يا مروه
احمد مات ابننا مات اخونا مات الباشمهندس مااااااااااااااااااااااااات
مش عارفه قلت لها ازاى , ده ابننا فعلا ياما شلناه انا و هى , و ياما خدمنا و شال ولادنا

لحد هنا جوزى خد السماعه و كلم جوز اختى عشان ما كنش فى اى كلام تانى يتقال
ما قدرتش اكلم اختى الاصغر عشان دى كانت صاحبته , صديقته كانو بيذاكرو سوا
كان بيمشى وراها فى الكليه يعاكسها و بعدين لما تلتفت عشان تبهدله تلاقيه هوه تغرق فى الضحك




و كان يقولها انت اخر البنات المحترمات
كنت باكلمه فى وسط الاسبوع اقوله نكته عشان لما اشوفه اخر الاسبوع يحيكهالى عشان منه هوه كانت احلى.......... كتير

كنا كلنا بنقول له انت اكتر واحد بتضحكنا فى الدنيا دى




قدر الله انه كمان يكون اكتر واحد يبكينا




نزلت من القاهره للزقازيق و انا باتمنى ما وصلش
حاجه تحصل و انا كمان اموت و ما وصلش
و سبت بناتى عند بنت خالتى اللى كلمت الدنيا كلها و قالت لهم على اللى حصل وهى بتحاول تدارى عن البنات ان خالهم حبيبهم صاحبهم اخوهم مات
وصلت و شفت بابا
وقلت لنفسى اهه ابوكى يا ايمان خديه فى حضنك
لقيت بابا حزين و بيكتم كتمان فظيع
حتى ما خلانيش اعيط على كتفه
بعدنى عنه بلطف عشان ما يديناش فرصه نعيط
يا ريتك يا بابا سبتنى انهار و اعيط
قاللى روحى شوفى ماما يا ايمان
ماما
مش قادره اشوف ماما
حاتكون عامله ايه ماما؟
رحت البيت و مش عارفه ايه اللى خلانى امشى فى كل الكوريدورات و الاوض و الم كل حاجات احمد
لميت كل الاحذيه بتاعته فى صدرى و غسلتها بدموعى
قلت لنفسى عشان لما ماما تصحى ما تشوفهاش تزعل
ماحدش يقولى ده تفكير غبى
عشان ما كانش فى تفكير اساسا
و دخلت اوضة ماما
لقيتها بتقول لى
حد يصحينى من الحلم ده كفايه كده صحونى بقه يا ناس
و عرفت اللى جرى
هى اللى ردت على التليقون اللى قالها ابنك مات و موجود فى المشرحه
و صحت بابا اللى قام يقول
لا حول ولا قوة الا بالله انا لله و انا اليه راجعون
الاتنين الكبار دول يا رب ينزلو الفجر يركبو تاكسى عشان
يدورو على احمد فى المستشفى و القسم
و ماما تتصل باحمد و تقول له رد يا احمد يا حبيبى رد على
و بابا يقابل عامل فى المستشفى ويقول له
ما تزعلش منى يا حاج
بس ابنك ...................................................فعلا مات
احتسبت عندك اللى جرى لامى و ابويا يا رب
اللهم اجعل احمد فرطا و ذخرا لهم يا رب

دفنت وشى فى صدر امى و قلت لها يا ريتنى انا يا ماما ياريتنى انا بداله يا امى
قالت يا ريتنى انا يا بنتى بعد الشر عليكى ربنا يخليكى لولادك
ياحبيبتى يا امى قادره تفكرى فى و فى اولادى دلوقتى فى اللحظه دى ؟
دخل طارق
قالتله انت يا طارق اللى بتجيبلى كل حاجه عايزاها
هاتلى احمد يا حبيبى هاتهولى دلوقتى حالا عايزااااااااه

و ما فاتش غير دقايق و لقيت البيت اتملا ناس من كل الدنيا و كانت الساعه لسه سبعه الصبح
لكن الشارع كله كان عندنا و خالاتى جم من القاهره و اسماعيليه و جدتى والده امى
و انا زى ما يكون باتفرج على فيلم او باغرق فى البحر او الموج بيشيلنى و بيحطنى
و ما بعيطش خالص و كل ماحد ييجى عايز يصوت اطرده بره عشان ما حدش يصوت على احمد خالص

و فجاه و كان قبلها يوم حر جدا
المطر نزل من السما بغزاره شديده جدا
انا محستش بنفسى الا وواحده قريبتنا بتجيبنى من الشارع
انا نزلت الشارع و بصيت للسما و هى مفتوحه و بتبكى على احمد
و ما قلتش غير
يا ايتها النفس المطمئنه @ ارجعى الى ربك راضية مرضيه @ فادخلى فى عبادى و ادخلى جنتى
اقسم بالله العظيم ثلاثا
انى كنت ناظره الى السماء و المطر يملا عيناى
ثم توقف المطر للحظه
كان السماء تسمعنى
و بعد هذه اللحظه عاد المطر اقوى بكثير مما كان

وصل ابن خالتى فطلبت منه الذهاب للمستشفى
عايزه اشوف احمد
منعنى طارق انى اشوفه مع انى كان نفسى اشوفه
فوجئت بمنظر المستشفى
كل شباب الزقازيق هناك
سيارات تملا عشر شوارع مرصوصه حول المستشفى
و حبايبى كلهم واقفين و عينيهم فى الارض مش بيبكو و مش بيتكلمو
بس واقفين مشدوهين و مش مصدقين
ان اللى كان صاحب الدنيا كلها و مالى الدنيا حياه
فى لحظه ارادها له مولاه
راح و لم يبق غير ذكراه




ثم سمح الشيخ الذى قام بالغسل لاصحابه ان يدخلو
جريت بسرعه عمرى ما عرفتها فى نفسى حتى زوجى لم يستطع اللحاق بى
كان احمد بينادينى
و هناك حاول زوجى ان يشدنى من الداخل
لكن الشيخ اكرمه الله وهو طبيب بالمناسبه قاله سيبها
سيبها تودعه
اودعه لاه مش عايزه اودعه لا
عايزه احضنه و ابوسه ممكن
قاللى ممكن
دخلت و امسكت قدميه الملفوفه فى الاكفان و غسلتهما بدموعى و قبلاتى
ثم
احتضنته
مين قال الميت بيكون متخشب و متصلب
احمد كان فاضل بس يلف دراعه حوالى و يضمنى اكتر لصدره
ياه عمرى ما شميت فى حياتى رائحه زى رائحة احمد و اكفانه
زى ما يكون رائحه من الجنه حبيبى يا اخويا طول عمرك كنت كده
انا فاكره لما كنا ننزل عشان نخرج و يضطر انه يشيل حاجه مثلا ينزلها معانا يقول استنونى خمس دقايق اخد دش تانى و انزل
لحد دلوقتى الريحه دى ما بتفارقنيش , قرات له سورة يس و دعاء المتوفى كاملا
و بعدين تحركت الجنازه
كل اللى كان يشوفنا فى الشارع يفتكره فرح
فى جنازه فيها مئات العربيات و كل عربيه مليانه ناس
فى جنازه يمشى فيها الافات و يترفع فيها النعش فوق على امتداد الاذرع مش على الاكتاف و يتحرك و الناس واقفين فى مكانهم بس بيتداولوه بينهم و هما واقفين مكانهم
فى دفن يتم فى خمس دقايق مسافه ما قريت الدعاء
و كان المنظر مهيب
الشمس فى طريقها للمغيب و المقابر فى وسط مزارع و اشجار
و فى وقت ما الشمس بتنزل كان حبيبى بينزل








كلا اذا بلغت التراق و قيل من راق
و تاكدت فجيعة الفراق
للاهل و الرفاق
و داعا ابديا للدور و الاسواق و الاقلام و الاوراق

اللهم اجعل احمد فرطا و ذخرا لوالديه و شفيعا مجابا لنا و للمسلمين يا رب العالمين
انت عالم بما تخفى الصدور
الهمنى وامى و اخوتى و والدى الصبر يا رب
و ارزق حبيبى جنتك بدون حساب و لا سابقة عذاب يا الله
اللهم اغفر لاحمد و ارحمه
و عافه و اعف عنه
و اكرم نزله و وسع مدخله
و اغسله بالماء و الثلج و البرد
و نقه من الذنوب و الخطايا كما ينقى الثوب الابيض من الدنس
امانه عليكم الدعاء بالرحمه و المغفره
و اسفه اذا كنت ضايقتكم
لكن مش بايدى حقيقى
مش بايدى خالص
بقالى سنه اخبىء دموعى فى ضحكه
كل من يعرفنى يعلم انها ضحكه جوفاء
لا تتعدى شفتاى
لكن قلبى ............
لن اقول قلبى جريح
لا قلبى ليس فى مكانه
لقد انخلع على احمد
لو كان بيد الانسان ان يفتدى احدا بحياته
لاخدت رصاصتك فى صدرى راضيه يا اخى الحبيب
و لكنت اسعد الناس بها
لكن عزائى انك عشت سعيدا و مت سعيدا
و لم ترى ما رايناه من اهوال فراقك و عذاب فقدانك




لكن ده مش حايمنعنى




لما حد فيكم يسالنى ويقولى لى




مالك




حاقول




احمد واجعنى
ده لينك جروب احمد ارجو الدعاء له على حائط الجروب و شكرا

43 التعليقات:

اهو ده عيبه يقول...

ايمان انا مش عارفه اقولك ايه

انا عماله اقرا واعيط
اعصابى بجد تعبت
من اول تليفون الفجر اللى جالك ده لحد باقى التفاصيل وانا حساها لحظة بلحظة
لانى عشتها بس الشخص اللى راح منى كانت امى
ومن ساعتها وانا فاقدة الاتزان وفعلا زى ما قلتى كان نفسى انا اللى اموت وتفضل هى

ربنا يصبرك يا ايمان ويصبر كل انسان فقد عزيز عليه
ويرحم جميع اموات المسلمين ان شاء الله برحمته

محمد حسن أحمد مرسي يقول...

حرام عليكي يا ايمان
بهدلتيني تاني
منك لله
مش قادر آخد نفسي من العياط

إنا لله و إنا إليه راجعون
قدر الله و ما شاء فعل

أنا بإذن الله لازم آجي لكم بكره

Pink Unicorn يقول...

ابمان
مش حاقدر اقولك اكتر من ربنا يصبركو
انا كمان اتوجعت .. و جربت
ماما راحت منى برضه من سنة
والألم ما بيخفش و الجرح ما بيتنسيش

وعشان كده عايزاكى ماتفضليش تفكرى نفسك باليوم الحزين و تفاصيله ..
افتكريه وهو بيضحك .. و هو سعيد
دايما فكرى نفسك باللحظات الحلوة اللى عشتوها و ادعيله ربنا يجعل له الأخرة احسن من الدنيا
وحاولى دايما تطردى لحظة الفراق من تفكيرك .. الوجع اكبر من اننا نركز فيه يا ايمان

ربنا يرحم احمد و يرحم امى و كل اموات المسلمين و يجمعنا باحبائنا فى الجنة اللى ماندوقش فيها تانى الم الوداع

رحاب احمد

Crystal Lobna يقول...

اللهم ياحنان يامنان ياواسع الغفران اغفر له وارحمة وعافه واعف عنه واكرم نزله ووسع مدخله وأغسله بالماء والثلج والبرد ونقه من الذنوب والخطايا كما ينقى الثوب الأبيض من الدنس

اللهم أبدله دارا خيرا من داره وأهلا خيرا من أهله وزوجا خيرا من زوجه وأدخله الجنة وأعذه من عذاب القبر ومن عذاب النار

اللهم عامله بما انت اهله ولا تعامله بما هو أهله

اللهم ان كان محسنا فزد فى حسناته وان كان مسيئا فتجاوز عن سيئاته

اللهم أدخله الجنة من غير مناقشة حساب ولا سابقة عذاب

اللهم انزله منزلا مباركا وانت خير المنزلين

اللهم انزله منازل الصديقين والشهداء والصالحين وحسن أولئك رفيقا

اللهم أجعل قبره روضة من رياض الجنة ولا تجعله حفرة من حفر النار

اللهم أفسح له قبره ومد بصره وأفرش قبرة من فراش الجنة

اللهم أعذه من عذاب القبر وجاف الأرض عن جنبيه

اللهم أملأ قبره بالرضا والنور والفسحة والسرور

اللهم قه السيئات ومن تق السيئات يومئذ فقد رحمته

اللهم أغفر له فى المهديين واخلفه فى عقبة فى الغابرين واغفرلنا وله يا رب العالمين وأفسح له فى قبره ونور له فيه

اللهم إن أحمد فى ذمتك وحبل جوارك فقه من فتنة القبر وعذاب النار وانت أهل الوفاء والحق فأغفر له وارحمه إنك أنت الغفور الرحيم

اللهم ارحمه كما رباني صغيرا

اللهم لاتحرمنا أجره ولا تضلنا بعده

اللهم اجعل عن يمينه نورا وعن شماله نورا ومن امامه نورا ومن فوقه نورا حتى تبعثه آمنا مطمئنا فى نور من نورك

واخر دعوانا ان الحمدلله ... الفاتحة على روحه الطاهرة

و الله ملاقيتش حاجة أقولها و ربنا يصبركوا جميعا و تلتقوا فى الجنة أن شاء الله بعد عمر طويل

سراج الماضي يقول...

إن العين لتدمع وان القلب ليحزن وانا على فراقك ياأحمد لمحزونون.....

sporefominghuman.. يقول...

السلام عليكم
انا متابعة جروب احمد من زمان علي الفيس بوك بس لسه شايفةالبلوج ده دلوقتي
ربنايرحمه يا رب انا مكنتش اعرفه بس كنت عارفه صحابه في هندسة وانا كنت معاه في المدرسة في ابتدائي وكانت مامتك بتدينا في الفصل وانا كنت بحبها قوي
وكنت اسمع عن احمد من عمروعمرو وكانواكلهم بقولوا عليه دمه خفيف قوي و طيب
أنا آلاء نافع من نفس دفعته بس في طب
وربنا عالم قد ايه الواحد حزن يا مس ايمان علي احمد مع اني مكنتش عارفاه و ساعتها والله اتمنيت اني اكون عرفته اكتر
وانا واثقة من كمية الحب اللي كل الناس بتتكلم عليه انه في مكان احسن بكتير من اللي احنا فيه هنا
ربنا يصبرك و يصبركوالدتك والعائلة كلها

shimaa fekry يقول...

الله يرحمه ويغفر له
رغم ان دى المره التانيه الى بسمع القصه الا إن دموعى عمالا تنزل منى زى المطر ومقدرتش احوش نفسى خالص
سمحينى يا ايمان
بس انا عرفا ان اكيد ربنا رحمه من الدنيا هو ربنا دايما ياخد الناس الكويسين
يارب ارحمد احمد اسامه ونورله قبره و اجعله روضه من رياض الحنه امين يارب العالمين

ahmed يقول...

ربنا يرحمه يا رب ..... هوا و كل المسلمين يا رب

هبه مجيد يقول...

انا اول مره اقرر اكتب تعليق علي حاجه
ومعرفش اكتب ايه
انا عارفه احساسك اوي لاني حسيته ف صاحبتي وطبعا انت اكتر
بس حرااااااااااام عليكي ياايمان


البقاء لله
والحمد لله

عاشقة الوطن يقول...

السلام عليكم

ازيك ياإيمان

ربنا يصبركم ويعوضكم خير ان شاء الله

ربنا يرحمك ياأحمد وان شاء الله فى الجنة

وربنا يجمعنا بيه فى الجنة يارب

distogi يقول...

ان لله و ان اليه راجعون اللهم اني عبدك ابن عبدك احتسبنا احمد عندك له منزله وافره في الجنه فغفرله و ارحمه و ادخله فسيح جناتك و صبراهله يا رب العالميين احم بن عمتي و لظروف السفر لم نكن علي اتصال داءم و لكن صدمه كبيره اوي علي الكل و قلمنا اوي اوي فراقه بس لا اعتراض علي قضاء الله ابدا و ده اختيار ربنا لان اكيد منزلته عند الله احسن من الدنيا بكتير يا رب يرحمه و يصبر عمتي و ابوه و اخواته و اهله جميعا الفتحه علي روحك يا زينه الشباب و زينه الجنه انشاء االله امين يا رب العالمين

distogi يقول...

ان لله و ان اليه راجعون اللهم ارحمه و اغفرله و ادخله روضه من رياض الجنه و اللهم اهله يا رب الصبر و الاحتمال علي فراق الغالي امين يا رب العالمين

Z_Diva يقول...
أزال المؤلف هذا التعليق.
Z_Diva يقول...

elbaka2 lillah ya iman, we rbna ysbrko, weg3l kol d3ako we d3a kol elnas leh fe mizan 7sanato, we isa yg3lo shafi3 likm yom el2eyama

thebird يقول...

السلام عليكم
أن كلامك احزني جدا وادعي له بامن يكون مثواه الجنة باذن الله وتعازية لاسرة الشهيد

doaa يقول...

يا ايمان...اكتبي وطلعي كل اللي جواكي...الوجع موجود في كل من فقد حبيب...انا عارفة ان كلامك بيوجعك قبل ما يوجعنا وبيؤلمك اكتر ما يؤلمنا الف مرة وزيادة..لكن صدقيني..في ذكريات جوايا عن وفاة امي ما لقيتش حد اكلمه فيها لان كل اللي حوالي كانوا متألمين ومش ناقصين عيلة زيي تزود المهم...والحاجات دي لسة جوايا لحد دلوقتي...مش لاقية حد اشاركه فيها..والوقت عدى وفات..وماعادتش ينفع خلاااص..خرجي كل حاجة يا ايمان..وكلنا هنسمعك..ونعيط وماله اما نعيط هي الدموع وحشة..اهي بتغسل قسوة القلوب على الاقل..دودو الشامي

doaa يقول...

ايمان..هستنى بقية ذكرياتك..وبقية خواطرك...وكلي اذان صاغية..انا وكل من يحبوك ويحبوا احمد وهم كثييرووووووووون

ahmad يقول...

أشعر فعلا بمعاناتك وألم صدرك من صدق كلماتك التى أبكتنى عن تلك اللحظات الأليمه التى مرت عليكى كما مرت علينا -نحن اصدقاءه-,و ما جعلنى أشعر بها أكثر انى فقدت صديقى الأقرب ذو الثلاثه و عشرون ربيعا منذ ما يقرب من اسبوعين تاركا الالم و الحزن لنا و لأهله و الذى كلما تذكرته بكيت و لم ادر ما افعل الا ان ادعوا الله ان يلهمنى الصبر

ما أردت أن أذكره لك(عسى الله ان يصبرك بها)هى تلك الخاطره التى تسيطر على عقلى كلما تذكرت صاحبى و التى من~َ الله بها على~َ ليخفف عنى ما أشعر به من غصة فى صدرى من شدة شوقى لصاحبى و هى ان اتذكر اننا سنلتقى يوما ما...نعم سنلتقى ان شاء الله..فان أكثر ما يؤثر فيننا اننا نشعر ان موت الحبيب هى نهاية كل شىء..و لكن لو تفكرنا و علمنا و ايقنا اننا سوف نلتقى يوما مافى الحياه الحقيقيه التى ارادها الله لنا فان ذلك يذهب عنا الحزن كثيرا...

اجلس و احدث نفسى:"الدنيا ديه كلها خمسين ستين سنه بالكتييير و تخلص و بعديها نتقابل فى مكان احسن مليون مره من اللى احنا فيه ده"

يقول الشاعر :فلا جزع ان فرق الدهر بيننا...فكل امرئ يوما به الدهر فاجع

ماتفكريش ان أحمد مات..فكرى انه مسافر بره و بعد شويه كلنا هنروح نشوفه

اسأل الله لك و لاهلك الصبر و الهدايه و ان يرحم أخى و حبيبى أحمد و جميع اموات المسلمين فهو ارحم الراحمين

mortymarty يقول...

البقاء لله وربنا يرحمه ويصبركم جميعا
انا كنت سمعت عن الحادثه بس مش بنفس التفاصيل ده كانت مختلفه شويه
بس لما حكيتى دلوقتى مش قادره اقولك ع الواحد حاسس ب ايه؟
الاحداث صعبه اوى طبعا وتبليغ الخبر صعب بس عشان الواحد عدا عليه مواقف زى ده ويمكن من اشد الحاجات ده الحوادث
الواحد بيبقى رايح المستشفى وعمال يدعى ربنا انه لأ لأ وان فيه غلط وانه لسه عايش
ربنا يصبركم وكفايه ان الكل بيحبه وبيدعوله وده من عمله الصالح عشان اللى يعرفه واللى ميعرفوش بيدعيله
ربنا يجعل مثواه الجنه

amany safwat يقول...

بجد يا ايمان مش عارفة اقولك اية...انا مش قادرة امشك دموعى من اول ما قريت كلامك.......بجد ربنا يرحم احمد و يصبركم جميعا.......
بس معلش فية سؤال...انا قريت فى تعليق ان مامتك مدرسة؟؟؟؟؟ممكن لو ماما مدرسة فى مدرسة اللغات تقولى لى اسمها اية عشان انا مامتى كانت مدرسة فى مدرسة اللغات؟؟؟؟؟؟
شكرا يا ايما و يارب اشوفك قريب انتى و مروة.........و على فكرة...مستر محمود ياسر بيسلم عليكى انتى و مروة :)
لا الة الا اللة

Hanan يقول...

إنا لله و إنا إليه راجعون... مش عارفة أقول حاجة تانية يا ماننى...

مش قادرة أقولك إنى حاسة بيكى لأن فراقه كمان وجعنى بس مهما كان مش حيكون زيك...

بسم الله الرحمن الرحيم

اللهم : ياحنان يامنان ياواسع الغفران اغفر له وارحمة وعافه واعف عنه واكرم نزله ووسع مدخله وأغسله بالماء والثلج والبرد ونقه من الذنوب والخطايا كما ينقى الثوب الأبيض من الدنس

اللهم : أبدله دارا خيرا من داره وأهلا خيرا من أهله وزوجا خيرا من زوجه وأدخله الجنة وأعذه من عذاب القبر ومن عذاب النار

اللهم : عامله بما انت اهله ولا تعامله بما هو أهله

اللهم : ان كان محسنا فزد فى حسناته وان كان مسيئا فتجاوز عن سيئاته

اللهم : أدخله الجنة من غير مناقشة حساب ولا سابقة عذاب

اللهم : انزله منزلا مباركا وانت خير المنزلين

اللهم : انزله منازل الصديقين والشهداء والصالحين وحسن أولئك رفيقا

اللهم : أجعل قبره روضة من رياض الجنة ولا تجعله حفرة من حفر النار

اللهم : أفسح له قبره ومد بصره وأفرش قبرة من فراش الجنة

اللهم : أعذه من عذاب القبر وجاف الأرض عن جنبيه

اللهم : أملأ قبره بالرضا والنور والفسحة والسرور

اللهم : قه السيئات ومن تق السيئات يومئذ فقد رحمته

اللهم : أغفر له فى المهديين واخلفه فى عقبة فى الغابرين واغفرلنا وله يا رب العالمين وأفسح له فى قبره ونور له فيه

اللهم : إن : أحمد فى ذمتك وحبل جوارك فقه من فتنة القبر وعذاب النار وانت أهل الوفاء والحق فأغفر له وارحمه إنك أنت الغفور الرحيم

اللهم : لاتحرمنا أجره ولا تضلنا بعده

اللهم : اجعل عن يمينه نورا وعن شماله نورا ومن امامه نورا ومن فوقه نورا حتى تبعثه آمنا مطمئنا فى نور من نورك

fatma mohamed يقول...

البقاء لله أنا والله مش قادرة امسك دموعي بجد ربنا يرحمه ويصبركو انا مش عارفة اقول حاجة غير ان شاء الله ربنا يجمعكو في الفردوس الاعلى من الجنة ان شاء الله_انا لله وانا اليه راجعون

Sara يقول...

ربنا يصبرك يارب بجد اكيد حاجة صعبة ويارب يارب تكون اخر احزانك وافضلي ادعيله دايما طول عمرك
ربنا يصبرك

Hanan Mahmoud يقول...

مش عارفة اقولك ايه بجد يا ايمان
برغم انى قوية ومش ببكى على موت حد غريب عنى الا انى مقدرتش احبس دموعى
ربنا يصبركم كلكم على قد غلاوته
حاسة بيكى اوى بس لو علمتم الغيب لاختارتم الواقع دى ارادت ربنا ومفيش حد يقدر يقف ضدها
ربنا مايحرقش قلب حد ابدا
وربنا يصبركم على فراقه ويعوضكم عنه خير اللهم امين

دعاء اسامه عواد يقول...

انا دعاء اختك يا حبيبتى ازيك يا منى

noha kamal يقول...

ezayek ya eman,
ana kont a3da 2a2ra el blog el gedeed beta3 el ghesh we ba3deen areet el blog da.. mesh 3arfa 2a2olek eih bas ana fag2a 7aseet eny a3raf a7mad men zaman we eno akhoya ana kaman we begad rabna yesabarek ana 3arfa ad eih el ebtela2 sa3b bas rabna 7aysabarko we yedeeko el kodra enoko tezawedo 7asanato dayman we akeed akeed el7ozn kebneer bas rabna dayman lih 7ekma fe kol 7aga raban mesh bey3mel 7aga we7sha kolo lelsale7
ya rab ya ahmad tekon feljanna ma3 el sal7een wal abrar ya raaaaaab we tekon sabab fe korb ahalk menak fel janna ya rabb

Dena_cause يقول...

انا مش حاسة ان عندى كلام بس الله يرحمة و اللى زى اخوكى مش بيموت انا بحس بس اللى بيموتوا هما الناس اللى مش كويسة عشان محدش بيبقى عايز يفتكرهم لكن اللى زى اخوكى و عمل اللى عملة فى دنيتة معاكو و مع الناس اللى حوالية اللى واضح من كمية الناس اللى حضرت الجنازة فا دة عمرة ما هيموت عشان حبكم ليه هيحييه ..بس مش عارفى اقول حاجة تانى غير البقاء لله

غير معرف يقول...

لا حول ولا قوة الا بالله

انا لله وإنا إليه راجعون

ربنا يصبرك يا ايمان

انا اول مرة ادخل واقرى مذكراتك ده وعمال اضحك من الصبح على اسلوبك وطريقتك الممتعه

لكن زي ما اضحكتيني فعلا ابكيتيني

الله يرحمه

الادهم محرم

doaa يقول...

بجد انا مش عارفه اقولك ايه ربنا يرحمه ويسكنه فسيح جناته ويصبر اهله على فراقه وما يكتبش الفراق على حد لان فعلا الفراق ده اصعب شئ فى الدنيا على فكره دى اول مره فى حياتى اكتب تعليق على اى حاجه بس بجد انا اتاثرت جدا وحاسه زى ما اكون عارفاه الله يرحمه ويرحم جميع موتى المسلمين اللهم امين
انا لله وانا اليه راجعون

غير معرف يقول...

السلام عليكم و رحمه الله و بركاته
يعلم الله كم انا حبيتك وحبيت اخوكى احمد الله يرحمه ويحسن اليه بس الدموع تغمرنى من كتر البكاء والله يصبرك ويصبر اهلك بجد اوجعتنى القصه بشكل موجع ولا ازال ابكى عليه من حكاياتك عنه على الجروب

البقاء لله يقول...

ايمان ...... انا مش لاقى حاجةاقولها لك عشان تخفف بيها عنك , انا باباى مات من 44 يوم بالظبط و لسه موجوع اوى اوى - الفراق صعب اوى.

كل اللى اقدر اقولك عليه انك تحتسبيه عند ربنا فى جنة النعيم ... واحد زيه لازم يكون ان شاء الله فى الجنة .

ايمان ادعيله بكل اللى تقدرى عليه , اعتبرى نفسك بنته الصالحة و ادعيله كتيييييير على قد ما تقدرى , اعملى له صدقة جارية , حجى و اعتمرى عنه , و الحمد لله هو ساب الدنيا بكل ما فيها الى جنة ربنا ,و اسأل الله العلى القدير ان يكرمك باخ فى الله يعوضك عنه.

غير معرف يقول...

ربنا يرحمه يا رب
فكرتينى ببابا بس هو انا نسيته؟؟؟
الناس الحلوة راااحت ...
راحو كلهم وخدوا حتى الاحساس بالدنيا

انا مش عايزة حد انا عايزة بس بابا

غير معرف يقول...

بجد حرام كدة قلبتي المواجع فتحتي جرح قديم ربنا يصبرك بجد ويصبر كل واحد فقد حد غزيز علية صدقيني بكتبلك ودموعي مش قادرة احوشها ربنا يرحمة ويرحم موتي المسلمين جميعا ويصبرك ويصبرنا كلنا

غير معرف يقول...

يارب تجعلة من اهل الجنة ويصبرك ويصبر امةوابوة

غير معرف يقول...

اللهم اجعل مثواه الجنة يارب العالمين

غير معرف يقول...

البقاء لله وحده انا بجد حاسه بيكي قوي لاني صدقتي واختي وزميله عمري توفت وعمرها سابعه عشر سنه بجد انا مش قادره امسك دموعي اللهم اسكنه فسيح جناته واللهم ارحم المسلمين والمسلمات والمؤمنين والمؤمنات الاحياء منهم والاموات

Ramez يقول...

السلام عليكم .. ربنا يرحم أموات المسلمين جميعا .. على فكرة معرفش أي حد و لا حتى أسامة اللة يرحمة و لا حتى حضرتك. بس القصة غريبة شوية .. كنت قاعد ع الانترنت في يوم و بدور على أغنية لعلى الحجار و لقيت الأغنية متركبة على فيديو واحد بصور المرحوم و التاني بصور للأستاذ محمد حسن أحمد مرسي و أتأثرت جدا بالصور لأن الفيديو كان مؤثر فعلا . و فضلت صورة أسامة معلقة في دماغي لحد ما في يوم لقيت الجروب بتاع البطل اللى وقف عربية الأمن المركزي في الثورة و قعدت أقرا التعليقات فلقيت تعليق حضرتك فدخلت ع البروفيل بتاعك و بقلب في الصور لقيت صورة أسامة اللى منسيتهاش خالص سبحان اللة و ختى معرفوش فقعدت أدور لقيت البلوج فحبيت أكتب لحضرتك و أقولك الأرواح الطيبة بنحسها حتى ولو منعرفهاش زي صورة الشهيد مصطفى الصاوي .. كأني أعرفة و صورتة صعب تتمسح من الذاكرة . على فكرة أول مرة شفت صورة المرحوم أسامة في الفيديو من حوالي 3 سنين و دلوقتي أعرف الصورة من وسط الصور و أنا حتى معرفش صاحبها .. اسف للإطالة بس حبيت أطمنكوا انة ان شاء الله في الجنة لأن صورتة فيها شيء غريب ان أشوفها مرة و أفضل فاكرها بعد سنين.. اللهم أرحم موتانا وموتى المسلمين . أمين

hossamnoour يقول...

لا اجد كلمات توصف شعورى ولكن
اسأل الله له المغفره
اللهم اغفر له وارحمه وادخله فسيح جناتك
والهم اهله الصبر امين

غير معرف يقول...

بصى يا ايمان انا مش عارفه اقولك ايه بس انا بجد حاسه بيكى اوى و بحالك ...انا اخويا اتوفى برده من شهرين اسمه حازم و كان عنده 20 سنه بس اتوفى فى حادثة عربيه و انا مش حقدر اوصفلك هو كان بالنسبالى ايه احنا الفرق ما بينا سنتين بس و عايزه اقولك انه كان بيعيط من خوفه عليا فتصورى بقا لما اكتر انسان كان بيخاف عليا( بعد ربنا سبحانه و تعالى طبعا) مات بصى انا قلبى كان بيتقطع و انتى بتحى عن اخوكى الله يرحمه لانى كنت حاسه انك بتحكى عن جنازة حازم اخويا الله يرحمه و الحمد لله هو قبل ما يدفن كان معموله 4 عمرات و لحد دلوقتى بقو 13 بس انا خلاص فيه حاجه جوايا اتكسرت و مش ترجع تانى و انا بالرغم انى لسه عارفة قصة اخوكى دلوقتى بس و الله ادعيلو و اقرالو الفاتحه و اقرالو قرءان زى ما بعمل لحازم بالظبط و معلش حطلب منك طلب حاديكى اسم جروب انا و اخويا عاملناه لحازم الله يرحمه ابقى بس اكتبى فيه ادعيه ليه و ماتنسيهوش فى دعاكى (hazem gamal eldin in our hearts ) و انا اسفه لو كنت طولت عليكى

نــــــــــادر ضيــــــــــاء يقول...

إنا لله وإنا إليه راجعون
حرام عليكي يا ايمان قطعتي قلبي بجد
قرأت وكأني أشاهد كل الأحداث
ربنا يرحمه يارب ويصبركم

adel emam يقول...

لا اله الا الله محمد رسول الله ، يعجز العقل عن التفكير والقلم عن الكتابه ، ربنا يرحمنا جميعا

Eman Eman يقول...

بكيتينى ووصفك جعلنى كأننى كنت معكم
الله يرحمه ويصبركم ويكون شفيع لكم يوم القيامه

Eman Eman يقول...

بكيتينى ووصفك جعلنى كأننى كنت معكم
الله يرحمه ويصبركم ويكون شفيع لكم يوم القيامه

Template by:

Free Blog Templates