الخميس، 19 يونيو 2008

ذكريات الطفوله المشرده - 3

عدنا الى بلادنا الحلوه
حاتقولولى الشوارع زحمه و مش نضيفه ................... حلوه برضه
حاتقولو الزقازيق ما فيهاش اوتيل نروحه فى الويك اند ........... حلوه برضه
اسمع حد يقول المدرسه ما فيهاش بسين و لا حصنه .............. حلوه رغم كل ده برضه

ليه حلوه ؟ بناسها ، و الله جنه من غير ناس ما تنداس فعلا
احلى واطيب شعب فى الدنيا شعب مصر
اد ايه طيبين و مرحبين و متصالحين مع الدنيا رغم كل اللى شايفينه
لاحظوا الكلام ده كان سنة اربعه و تمانين ، و كان الناس بالهم اروق شويه ، و الاخ كان لسه جديد بقاله بتاع سنتين فى الحكم ولا حاجه
فى البدايه ماما لم تجد مدرسة لغات انجليزيه فى الزقازيق ، و بعدين لقينا واحده بس كانت لسه جديده بقالها كام سنه و اكبر فصل فيها فى سنه سادسه و انا كنت رايحه اولى اعدادى
و كان فيه برضه مدرسه عريقه هى النوتردام ، بس كانت اللغه الاولى فيها فرنساوى ، و انا علاقتى بيه سطحيه فى حدود
je suis
وكان الخياران كلاهما مر ، يا اما اروح المدرسه الانجليزى و انزل سنه ، و كان اصلا سنى صغير كان عندى عشر سنين و كان ممكن ادخل عادى
يا اما اروح النوتردام و اناضل هناك بقه و انا و نصيبى

طبعا ما رضتش انزل سنه ، هو انا هبله اروح تانى سنه سادسه ، ده انا لما صدقت خلصتها

و توكلت على الله و قلت اديها فرنش

المدرسه جميله بصراحه ، من غير ما نقارنها بمدرسة دبى ، كانت زى القصر الاسقف عاليه و الفصول واسعه جدا ، و جواها تشابل او كنيسه صغيره للسيرات المديرات بتوع المدرسه
لا كانت حلوه ، بس كان النظام فيها صارم
بخصوص الدرس كود ، و اليونى فورم ، و التوكه لازم تكون بيضه و صغيره ، و الشراب سوكت ابيض و ممنوع يطول لحد الركبه ، و الجيب كسر و لازم تكون مكويه
و ياما خدوا منى توك ملونه و سابونى شعرى مفرود طول اليوم ، و كنت باشوف التوك دى بعينى بتتباع فى معرض المدرسه اخر السنه ( توك وارد الخارج بقه هاهاهاها
احلى حاجه فى المدرسه دى البنات ، حلوين و طيبين ، و صحابى لحد دلوقتى ، دى ميزة انك تكبر فى بلدك ، بتربى ذكريات
يعنى فين هما رلى و ربى و جمانه دلوقتى ؟ ما عرفش ، و احسن انى ما عرفش لانهم زمانهم بدل ما كانوا بنات منفسنين بقم ستات منفسنين هاهاها
اما جيهان و حنان و شيماء و رحاب صديقاتى ، لسه باشوفهم الى الان ، و كبروا برضه ، و بقوا ستات كبار طيبين ، ربنا يخليهم كلهم

المهم انى كنت باقعد بطيخه الاول فى حصص الفرانسيه ، و دى كانت ماساه ، لانى عمرى فى حياتى ما كت بطيخه
فكنت باخد الكراسات بتاعة البنات القديمه عشان احفظ الفربات من اول ما اخترعوا الفرنساوى
يعنى اللى العيال دى خدته فى ست سنين كنت باذاكره انا فى شهرين
و الله لسه فاكره اسامى الدروس ، درس درس

بس ما انكرش ان الظروف كنت مواتيه جدا ، عشان ما كنتش باذاكر انجليش خالص لانه كان تافه بالنسبه للى خدته فى دبى
ولا ماث كمان عمرى ما ذاكرته عشان كان نفس اللى خدته السنه اللى فاتت ، و كنت انا ساعات اتطوع اشرح لميس سوزان الحاجات اللى بتشرحها غلط ، الرياضه الحديثه كانت لسه نازله مصر و كانت صعبه حتى ع المدرسين
اما الكارثه القوميه ، و انا اعنى فعلا كلمة قوميه
كانت المواد الاجتماعيه
اللى هى جعرافيا ، تاريخ ، و تربيه قوميه
الماده دى ما كانتش موجوده اساسا فى دبى ، تاريخ ايه بس اللى ياخدوه ، كان ايامها الشيخ زايد الله يرحمه وحد الامارات السبعه بقاله كام سنه بس ، و كل التاريخ اللى بناخده هو ده
ان الشيخ زايد موحد الامارات السبعه
شوف التعقيد بقه اللى العيال كانوا بيتعقدوه لما احكيلهم كده ، و هما طول حياتهم مفحوتين الاسره الاولى و اسباب انهيار الدوله الوسطى والملك سيتى الاول ، و بيبى الثانى ، و مؤامرة مرات ابو اخناتون ضده ( مرات ابوه كانت خالته برضك فى نفس الوقت هاهاهاهاهاه
يا نهار دراسات ؟؟
يعنى انا هاحفظ كل ده ، ده غير جغرافية بلاد العالم كلها ، و المحاصيل التى تشتهر بها ، و عاصمتها و الزى القومى بتاعها ، و الرقصه الشعبيه المفضله ، و كام مره خدوا كاس العالم هاهاهاهاها
و الله العظيم حرام العيال الصغيره تاخد الحاجات دى
بس كله كوم و التربيه الوطنيه او القوميه دى كوم تانى
دى كانت بتتكلم عن الامم المتحده و مجلس الامن ، و الدول الدائمة العضويه
بس الشهاده لله الحاجات دى كانت مفيده جدا و انا لحد دلوقتى فاكراها و حق الفيتو و الكلام ده عمرى ما كنت حاعرفه من غير التربيه الوطنيه
بس لما دخلنا بقه فى مؤتمر باندونج و دول عدم الانحياز و عبناصر و الحاجات المنقرضه دى
حسيت انها رخمت و باخت
الاستاذ اللى كان بيدرسلنا سوسيال ده كان اسمه استاذ تاوضروس
و كان صديق جدى الله يرحمه اللى كان وقتها مات من عشر سنين مثلا
و انا متاكده ان الاستاذ تاوضروس ده حضر مؤتمر باندونج بنفسه ، و راح بلودان مع عبناصر و كمان اشرف بنفسه على استعدادات البلاط الملكى لاستقبال كليوباترا
والا قولولى ، عرف كل الحاجات دى و التفاصيل دى منييين و ازااى الا اذا كان حضرها بنفسه

مش حاكذب و اقول مش باعرف احفظ ، لا باعرف ، و لما باحفظ باحفظ بافترا ، بغباوه يعنى
زى المكتوب فى الكتاب بالضبط و الا فلا
يعنى مش احفظ روح الموضوع ، لاه ، زى الكتاب بالضبط
و بعد امتحان الشهر اللى حسيت انى اديت فيه اداء عالى اوى
اداء جبار
نادانى مسيو تاضروس تانى يوم و قاللى اطلعى يا ايمان
و قلت الاقدار ابتسمت لى ، و دى نتيجة مذاكرتى و دحى العظيم
و ابتسمت ابتسامه اكبر من ابتسامة الاقدار
و طلعت بره وقفت عند المسيو
مسكنى من ودنى ، و قالى مش عيب كده ، انتى غشاشه
يا نهار اسوح
شرفى ، انا عمرى ما غشيت فى حياتى ابدا ابدا يا مسيو و الله
تاضروس الله يرحمه بقى : لا غشيتى ، ده انتى نقلتى من الكتاب نقل مسطره
انا : و الله ما نقلت بالمسطره و لا من غير المسطره ، و يعنى ايه اصلا نقل مسطره دى
و فتحت جاعورة عياط ، تقريبا صحت الناس فى دائرة قطرها كيلومتر من النوم
ده انا عمرى هىءاهىء ، ما غشيت و لا حتى غششت حد ، اهىء اهىء ، حتى البت اللى فتحتلى المقلمه فى دبى اهىء اهىء ، ما غششتاهاش عاااااااا
المهم الراجل شك فى نفسه فعلا من كتر الجاعوره دى ، وقاللى طيب اثبتى انك مش غاشه ، قلت له و الختمه الشريفه يا بيه ما غشيت عااااااااا
قاللى لا هاسالك اسئله و تجاوبى
قلت له لازم تسالنى عشان كرامتى ضاعت كده فى الفصل اهىء اهىءاهىء
العيال ادونى مناديل و خلونى امسح دموعى و هما زعلانين و عمالين يقولو لا يا مسيو ايمان مش غشاشه
المهم الراجل سالنى اسئله فى الماده ، و رديت رد مسطره و انا باتشهنف من العياط المرير
و فوجىء الرجل مفاجأه عمره ، و كان مش عارف يودى وشه فين ، تصدقوا بالله ، انا مكسوفاله لحد دلوقت ، كبسه كبسه كبسه
على راى مدحت شلبى فرحه فرحه فرحه هاهاها
و طبعا رفعت راسى عاليا لتطاول عنان السماء بعد هذا الموقف
و كان فاضل العيال يعملولى زفه على الحنطور و يغنولى والله و عملوها الرجاله
قصدى
كفاره يا زينة الرجاله هاهاهاها
يتبع

تعلقياتكم هنا و على الجروب بتاعى

http://www.facebook.com/topic.php?uid=5663673625&topic=4103&start=210&hash=f4466701d29f7a30a0dd5f01056bd1bc

اكتر حاجه بتسعدنى تعليقاتكم



10 التعليقات:

زفته وقطران يقول...

انا بحجز
حقرا واجي

زفته وقطران يقول...

تصدقي وتؤمني بالله انا طول عمري ببحب التاريخ
لكن اول مره اعرف ان مرات ابو اخناتون
تبقي خالته
وحياتك كنت فاكراها بنت خالته
اهئ اهئ
ياخسارة مزاكرتي
ودحي

اختك
زفته




يووه نسيت
انت حبيبتي يا منمون

ايمان اسامه محمد عواد يقول...

و انى حبيبتى يااااا
مش حاقول هاهاها
و كمان مش حاقول الاسم الوحش اللى انت مسمياه لنفسك ده
عشان انتى جميله يا حبيبتى

ايمان اسامه محمد عواد يقول...
أزال المؤلف هذا التعليق.
دعاء اسامه عواد يقول...
أزال المؤلف هذا التعليق.
غير معرف يقول...

بصي يا ماني
انا يعني هصحح لك معلومة
ايامي انا
التاريخ اتطور قوي في الامارات
كنا بناخد التاريخ الاسلامي
ومع احترامي للسادة الفراعنة ربنا يحاسبهم بفضله وعدله مطرح ما راحوا
لكني استفدت جدا بمعرفة تاريخ ديني
من قبل مولد الرسول
الى مراحل استعمار والتحرير في العالم الاسلامي
مرورا بمول الرسول وبعثته والمرحلة المكية والمدنية والغزوات والفتوحات والخلفاء الراشدين
والدولة الاموية والعباسية والعثمانية وسقوط اخر الخلافات الاسلامية والوقوع تحت الاستعمار العسكري
والحملات مثل الفرنسية وحملة فريزر
واكتشاف العالم الحديث على يد كولومبس وماجلان
والوصول للهند عن طريق راس الرجاء الصالح
واشياء اخرى
ارى من منظوري البسيط انها اكثر فائدة من دراسة عصور الفراعنة
لاني صراحة
ما ببحبهمش
دول لما واحد بيظلم ويفتري على الناس بيقولوا عليه فرعون
انا احب ناس ظالمة مصت دم الشعب ده وسخرته علشان تبني قصور وتعيش فخامة
تخيلي كدة بعد الف سنة يجي التاريخ يقول اننا كنا بنعيش ازهى عصور الشافيفة لاننا كنا محكومين بالحديد والنار
والباقي نكمله سوا بعدين
لما اشوفك في الزقازيق الحلوة
وحشتيني جدا
وبجد يا ماني
عمار يا امارات
بجد-من غير زعل يعني

tarek alghnam يقول...

الرائعة ايمان
ماشاء الله عليكى وعلى اسلوبك الرائع
سعيد بدخولى مدونتك الرائعة
واتمنى التواصل معى
ولى زيارات اخرى لكى
تقبلى تحياتى
ودمتى بحفظ الله

غير معرف يقول...

انا اول مرة اقرا المذكرات بتاعتك النهاردة اهو يا ايمان بس بجد بجد انتى هايلة واسلوبك رائع وفوق الرائع كمان بجد انا مبسوطة اوى اوى وبقولك استمرى والى الامام....بجد ممتعة موووت

منى

انت تسال والكمبيوتر يجيب يقول...

الأخت العزيزه صاحبة المدونه المتميزه
تجيه طيبه من اول برنامج اذاعى فى الشرق الأوسط عن النت والمدونات والتفاصيل فى موقعنا ومدونتنا وبالتوفيق دائما ان شاء الله وان كان لنا ملحوظه عابره عن جروب الفيسبوك وهو استخدام كلمة لفرز بمعنى محبى فلانه وللأسف هذه الكلمه تعطى معنى مختلف تماما وهو عشيق او عشيقه والكلمه الصحيحه هى فانز
FANS
عنوان مدونتنا
http://netonradio.blogspot.com
والموقع
http://dear.to/cairo

محمد سويلم يقول...

هاي إيمان, أنا رحاب عبدالعزيز, ايه الحلاوةدي والله رجعتيني لأيام النوتردام.

Template by:

Free Blog Templates