الخميس، 27 مارس، 2008

ايمى و افلام الرعب










حاحكيلكم النهارده عن هوايه غريبه كانت عندى و انا فعلا اعنى كانت كنت لى عاده كده ايييه اتفرج على افلام رعب و مش اى رعب يعنى مش قتل و تقطيع و دم و لا حتى حيوانات مفترسه و امراض غريبه و حشرات و القرف ده
لا رعب معين افلام الاشباح المنيله و الهوايه دى خلاص باى باى و حاتعرفو ليه الفيلم الاول :
THE OTHERS بطولة الفنانه العريقه NICOLE KIDMAN و كان معاها عيلين كده مرعبين
و تلات شغالين رعب اخر حاجه بقه فى الدنيا
المهم الفيلم ده كان صدمة العمر بالنسبه لى لما اكتشفت ان بسلامتهم الابطال المهددين بالاشباح
هما الناس التانيين
يعنى هما بسم الله الرحمن الرحيم الاشباح
و فى مشهد معين فى الفيلم و هو مشهد التلات شغالين الجمال دول بعد ما الولد اكتشف انهم ميتين
و هما واقفين بره الباب الزجاج و فجاه بقم جوه
اقسم بالله العظيم انى شفتهم و طلعولى بالليل
و ما حدش يقولى ان ده كان حلم عشان انا متاكده انى كنت متنيله صاحيه
و دى كانت الضربه الاولى فى عالم الاشباح
الفيلم الثانى
THE GIFT يعنى الفيلم ده قعد فى السينما بتاع ساعه و نص بس ما كملش يعنى فاشل باختصار
لكن اسباب الرعب كانت مختلفه و احب احكى لكم عنه بالتفصيل فى يوم كلمنى اخواتى الاتنين الصغيرين دعاء ربنا يخليها و احمد حبيبى الله يرحمه و قالولى حايجولى عشان نخرج سو ا نروح السيما
رحبت جدا و قلت لهم رعب بقه ماشى
قالو ماشى سالت على اخر فيلم نزل و كان الفيلم ده the giftركبت تاكسى انا و العيال و كان تاكسى منيل بستين نيله
و مكسر و مدغدغ
و مالوش اكره و لا كراسى و لا حاجه ابدا
المهم نزلت من التاكسى بعد مشوار قريب جدا لحد و ندر لاند بس و انا راكبه من اخر عباس العقاد عند السفارات
قلت له كام يا عم قال لى سبعه جنيه و نص
شوف الدقه يا اخى
المهم قلت له حضرتك فهمتنى غلط
انا عندى عربيه مش عايزه اشترى التاكس انا بس حادفع الاجره
المهم دفعت لان الراجل كان خلاص حاينزل من العربيه و يصور قتيل
رحنا السيما لقينا نفسنا احنا التلاته بس اللى داخلين الفيلم ده
راح الموظف قال لازم تكونو اربعه عشان اشغل الفيلم قلنا له يا عم حانشترى كمان كرسى و نسيبه فاضى على اساس ان احنا بنركب بيجو او ميكروباص يعنى
بس دخلنا الله لا يسيئك
المهم انتو عارفين ان احنا فى مصر كل شىء ممكن طبعا
و مافيش حاجه اسمها ممنوع
طبعا دخلنا فى الاخر و لقينا نفسنا فى القاعه الكبييييره احنا التلاته بس يا حلاوه ماشى
و بدا الفيلم و الله ما كانش رعب قوى يعنى انما فجاه و احنا قاعدين فى امان الله لقينا حاجه لطيفه و ناعمه بتلعب فى رجلينا
احنا التلاته طبعا صرخن
ا و قمنا من مكاننا مفزوعين
راح احمد قايل ايه ده هو عشان الفيلم مش رعب قوى جابولنا مؤثرات حيه و اللا ايييييه
المهم كانت مجرد قطه بتتفسح فى السيما
لكن مش وقتها خالص
قعدنا على قرافيصنا طول الفيلم من الرعب من القطط
و بعدين بعد شويه انضم لينا ناس كانو دخلو فيلم تانى ما عجبهمش فجم يقضو بقية الفيلم معانا
و كنا سعداء جدا بيهم لدرجه سيبنا السينما كلها فاضيه و قعدنا جنبهم
و مش عايزه اقولكم كانو حايطقو عشان دول كانو حبيبه باين و مزوغين
و افتكرونا بنغلس ما عرفوش ان احنا كنا فعلا خايفين و مرعوبين و قاعدين نتحامى فيهم
لو سمحتم ما تبخلوش على بتعليقاتكم و حكاياتكم انتم كمان

2 التعليقات:

محمد حسن أحمد مرسي يقول...

ايمان
انتي فظيعة
اسلوبك ساخر جدا و لذيذ جدا
و حسيت فعلا بأفلام الرعب اللي انتي شفتيها
و فكرتيني بمواقف بتحصل في عز الفرجة على أفلام الرعب بتخلي شعر الراس يقف

mo2a يقول...

3arfa ya Eman ..ana dakhalt film the others f 2l cinema lamma nezel ma3a so7aby ...w kanmor3eb gdn tab3an ...w tab3an sawatna lamma 2l set 2lle mn gher 3enen de fat7et 2l dolab 3ala 2l 3ayelen ...bs 2l fekra ba2a 2nn bgd kharagt mn 2l film w ana mesh fahma ya3ne meen tele3 2eh :D...bs ba2a w feeen 3ala mafhemt :D:D:D::D
w 3ala fekra u have a good style in writting .. i like it ;D

Template by:

Free Blog Templates