و النبى و حشتونى اوى من الاسبوع اللى فات

باعتذر عن عدم كتابة مذكرات الاسبوع اللى فات ده عشان كان هوه لوحده مذكرات و الله العظيم

يعنى بداية يوم الاتنين صباحا بابا اتصل بى فى الموبايل الساعه حوالى سبعه و دى مش عادته قلت خير يا رب المره دى

قالى لى ان زوجة عمى توفت الى رحمة الله هى كانت مريضه الله يرحمها لكن كانت سنها صغير و اولادها لسه شباب صغيرين اوى طبعا زعلت جدا و كلمت جوزى ( عشان هوه كان بايت فى المستشفى مع والدته العيانه برضه ) و قلت له انا رايحه اعزى فى الزقازيق يا طارق قاللى طيب انا حاحصلك

و نزلت جرى بالعربيه و يعنى دست شويه بسرعه بصو هوه مش شويه هوه من الاخر الرادار مسكنى على ميه تسعه و تلاتين

المهم نزلت اقول للصول معلش يا بيه و النبى يا بيه اصلى رايحه عزاء يا بيه

لقيته موقف واحد على ميه و سته

قمت انكتمت خالص اعمل ايه فى الميه تسعه و ثلاثين كيلو فى الساعه بتوعى دول

خد رخصتى و ادانى وصل قلت له معلش مش ممكن ادفع دلوقتى اى حاجه لسيادتك و اخد الرخصه و النبى اصل عمرها ما انسحبت و شكل صورتى فيها منيل قوى

المهم بص لى بصه كده و عمل لى حركه بايده

يعنى مش هامه كلامى

انسحبت فى هدوء شديد

و سقت المره دى على ميه و تسعه و اربعين بقه هوه وصل و اللا اكتر

بعدين مش معقول يعملو اتنين رادا رفى يوم واحد ؟؟؟

و صلت الزقازيق و رحت لمامتى الشغل عشان نروح نعزى و بابا قاللى ان العزاء فى فاقوس

( بالنسبه للاجانب فى المنطقه دى بلد جنب الزقازيق حضراتكم )

و بعدين مامتى اقترحت انها هى اللى تسوق عشان انا اكيد اعصابى تعبانه قلت لها ماشى يامامتى سوقى

و بعدين مشينا فى الطريق خطر على بالى اكلم بابايا بعد نص ساعه كده من مشينا

كلمته قاللى ان الستات فى الزقازيق عادى و ممكن اعزيهم هناك

ماما قالت يا ريتنا اتصلنا من الاول

قلت لها مش مهم يا ماما احنا ما مشيناش غير مترين فى النص ساعه دى

ده انا خايفه يسحبو منى الرخص المره دى عشان البطء

لو فيه رادار بيصور كان زماننا طالعين فيه طول الوقت و مش سايبين فرصه لحد تانى

كل الكلام ده فى سرى طبعا عشان ما قدرش اقول لمامتى كده

عشان هى حاسه انها سريعه

رجعت تانى و رحت البيت عشان العزاء

و كانت يا عينى بنت عمى فى حاله سيئه

و طبعا كل مواجع الدنيا اتقلبت على عشان افتكرت احمد حبيبى الله يرحمه و عشان طنط امينه كمان كانت عزيزه على اوى

المهم فؤجئت بمكالمه من طارق بيقول لى انا مش حاقدر احصلك عشان مامته دخلت الانعاش

يادى المصيبه

طبعا جريت تانى عشان الحق اكون جنبه و انا بدعى ربنا يستر

فاكرين يا جماعه لما قلت فوق ان مش ممكن يعملولى اتنين رادار فى يوم واحد؟

طلع ممكن

اه و الله

و اكتشفت بنفسى لما لقيت نفس الصول بنفس الفانله بنفس البنطلون لمؤاخذه واقف لى على الناحيه التانيه

يا نهار اسود اعمل ايه دلوقت ده الوصل الاولانى ما كملش ساعه فى جيبى

و بعدين ايه الوطينه دى

هوه ما فيش غيرى فى مصر النهارده و اللا ايييييييه

المهم نزلت للراجل و انا باحاول ارسم اجمل ابتساماتى

( تخيلو بقه فى الظروف دى كانت ابتسامتى شكلها ايه )

واضح ان ابتسامتى الجميله ما عجبتوش خاااااالص

لانه قاللى رخصك يا مادام

قلت له يا راجل انت لسه ساحبها من ساعه انت لحقت تنسانى

تصدق بالله انت راجل امير ده انا فاكراك موقفنى عشان ترجعهالى

ما نفعش برضه الحوار ده

و الراجل كشر و منيل بنيله

رحت بقه معيطه و قلت له حرام عليكم يا ناس

انا عندى ظروف انا راجعه من عزا

و رايحه لواحده فى اوضة الانعاش

و اعصابى تعبانه و رحت معيطه ودى كانت اسهل حاجه اعملها فى اليوم ده

اسهل من الابتسامه الجميله بكتير

عشان الدموع كانت اصلا واقفه مستنيانى

تقريبا صعبت على الراجل وقاللى طب ورينى الوصل

وريته الوصل و وريته عشرين جنيه كمان

فسكت و سابنى امشى و حمدت ربنا انه ما سحبش رخص العربيه كمان

المهم وصلت عند مدينة السلام كده و قررت قرار

لقيت الدنيا زحمه و الساعه اتنين و نص و لازم الحق الولاد فى المدرسه الساعه تلاته

فلازم امشى من الطريق الدائرى من بره عشان الحق اوصل بسرعه

مش حاطول عليكم دخلت دخله واحده غلط

و ده كل اللى انت محتاجه فى القاهره

دخله و احده غلط ممكن تغير حياتك

عشان دى بتبقى غالبا سكة اللى يروح ما يرجعش

قعدت ادور على اى يو تيرن

يا نهار اسود ما فيش

هوه اللى يغلط يقعد عمره كله يدفع تمن غلطته

مافيش اندو

يا نهار اسود دى اليافطه مكتوب عليها المرج

ايه المرج ده

فين القاره دى

ايه الحتت دى

و بعدين بدات اخش فى حتت زراعيه و شوارع صغيره بقه

وبعدين قلت اكلم حد فى التليفون و غالبا رامى عشان طارق مش فايق لى دلوقتى

( رامى ده جوز بنت خالتى اللى انا عاملاه بدل موبينيل تمن تلاف )

المفاجاه السعيده التليفون قطع شحن

و تاكدت انى عمرى ما حاعرف ارجع بيتنا تانى

و انى تهت للابد

و انى حاعجز و اموت فى المرج ده

و بعدين فرضا لقيت رامى حاقوله ايه

انا عند بتاع البوظه جنب العربيه الكارو بشويه كده

انا اصلا مش عارفه انا فين

يا مرك يا ايمان

المهم لقيت راجل محترم راكب عربيه محترمه و قلت حاساله

قاللى يا مدام انتى مش حاتعرفى ترجعى لوحدك ايه اللى جابك هنا

تعالى و رايا انا رايح مدينة السلام

قلت الحمد لله حاجه من الاتنين

يا حيوصلنى

يا اما حيقتلنى و ارتاح بقه من اللى انا فيه ده

المهم وصلنى للاسف

وصلت مدينة السلام تانى بعد ساعتين

يا لهوتىىىىىىىىىىىىالعيال زمانهم روحو و اللا لسه فى المدرسه

بس الحمد لله روحت البيت الساعه خمسه و لقيت طارق روحهم

بصو انا ماكانش قصدى ان المذكرات المره دى تكون مضحكه خالص

بالعكس دى ماسى فى حياتى

لكن الظاهر انى انا كده حتى ماسى حياتى مسخره

لانى بعد ما خلصتها برضه لقيتها تضحك و شكرا انكم انتظرتونى لحد النهارده و مستنيه تعليقاتكم

النهارده حاحكى لكم ذكرى يوم سعيد

من سنتين كانت بطولة كاس الامم فى مصر

و كانت اول مره اروح الاستاد فى حياتى فى الدور قبل النهائى

و زى مانتو كلكم عارفين الحمد لله مصر اتاهلت للنهائى

و بدات ادور على وسايط فى وزارة الداخليه و سفارة مصر فى القاهره عشان الاقى تذاكر

لدرجة انى وسطت ناس فى المخابرات

و مش لاقيه تذاكر ابدا ابد

ا و خلاص كنت بدات افقد الامل

و حجزت ترابيزه فى كافيه و سكتت

بس يوم المباراه الصبح لقيت هاتف بيقولى انزلى يا ايمان حاتلاقى تذاكر

و قد كان

نزلت عند النادى الاهلى و لقيت تذاكر بتتباع زى المخدرات كده

و لازم الراجل يتكلم معايا الاول

و يعمل انترفيو

و بعدين يفيش القوامش

و يخش يكلم الكبيره جوه

و بعدين يجيبلى تذاكر

المهم بعد كل هذا الاكشن

جبت تذاكر درجه اولى و مش عايزه افتكر كانو بكام عشان كان مبلغ شويه وهمى يعنى

المهم قعدت ادعى يا رب يا رب ما نتكسفش عشان حازعل بالجامد ع التذاكر دى

روحت البيت عشان اقول لولادى و لطارق يلبسو لقيت طارق لابس هوه و العيال

و مستنينى ع السلم

فيه ايه يا بنى انت عرفت منين انى جيت تذاكر

قاللى مش قلتى حاتجيبى تذاكر يبقى لازم جبتى مانا عارف دماغك هاها

المهم طبعا نزلنا رحنا الاستاد زى ما الناس كلها عارفه قبل الماتش بحوالى خمسه و عشرين ساعه كده

ليه مش فاهمه بس دى عاداتنا و تقاليدنا فى البلد الغريبه دى

و ندى و نادين لونو وشهم و انا كمان بالمره

و قعدنا بقه الساعات الطويله دى من غير اكل و لا ميه عشان احنا ما كناش عاملين حسابنا اننا حانلاقى تذاكر

و كمان عشان اى ميه بياخدو مننا الزجاجات

( احمد حبيبى اخويا الله يرحمه علمنى خدعه جامده جدا فى موضوع الميه ده يعنى ناخد زجاجتين واحده صغير ه و التانيه كبيره و لما يقولى معاكى ميه ازعل اوى و اديله الصغيره و انا زعلانه ع الاخر و ادخل و معايا الكبيره )

المهم كل المطاعم جوه الاستاد زحمه موت و كل الناس واقفه بالساعات عشان تجيب اكل و فيهم جوزى و ما عرفش برضه

قلت له استنى طيب انا حاروح رحت وقفت لقيت الشباك بتاع المطعم عالى قوى رحت لولد طويييل واقف عند الراجل بيشترى و قلت له و النبى يا بنى ممكن تجيبلى معاك كذا و كذا المهم الولد طلع محترم اوى و جابلى

اليوم ده كان الشعور الوطنى عالى اوى اوى عند الناس

لدرجه انى اثناء الماتش بنتى احتاجت تروح التواليت خمسه و عشرين ساعه بقه

و كانت الناس قاعده بين المدرجات و على السلالم وفى كل حته

و كانو بيساعدونى و يشيلوها عشان اعرف اعدى و اوديها الحمام

هما كده المصريين مستنيين بس حاجه تجمعهم على هدف و احد

لكن للاسف عمرنا ما عرفنا اوقات ذروة اشتعال الشعور الوطنى دى

و رجعت كالمنتصره الجباره و العيال كلت و الحمد لله المهم كل ساندوتش كان فيه يعنى بربع جنيه فراخ او لحمه عشان الزحام الجامد ده و بعدين الناس كانت بتشجع من قبل الماتش

راحت ندى بنتى مزعقه لشاب صغير قاعد يزعق ورانا و قالت له بلاش دوشه بقه صدعتنا

راح الولد قالها جرى ايه يا ندى انت جايه تستجمى فى الاستاد و اللا ايه

طبعا كنا كلنا اتعرفنا على بعض عشان القعده الطويله دى

و نادين سمعتهم بيقولو حضرى حضرى راحت بعلو صوتها حجرييين حجرييين و فرجت علينا الاستاد كله

يقولو ايه عليها ابوها قهوجى و اللا ايييه

طبعا انتو عارفين الى حصل فى الماتش و ضربات الجزاءو ماما سوزان وهى بتبوس بابا حسنى لايف على الهوا

و ابو تريكه العسل و هوه مش عارف ان دى اخر ضربه لكن طبعا من الصريخ الجنونى بتاعنا عرف لوحده

بعنى فى النهايه كنا بقالنا مثلا سبعمية ساعه فى الاستاد بس بصراحه كان الموقف يستاهل و عمرى ما حانسى اليوم ده

بس الغريبه بقه و احنا مروحين لقينا عساكر الامن المركزى واقفين يقولولنا ما فيش حلاوة ما ربنا نصركم بجه

هما دلوقتى بيجيبو عساكر من افغانستان و اللا ايييييييييييه

ما تبخلوش على بتعلقاتكم

كنت مره رايجه اشترى طلبات من طيبه مول و عشان عارفه ان طريق النصر زحمه جدا رحت من ورا عشان اركن
فوجئت بانسان غريب عسكرى كده بيقولى ممنوع يافنضم تركنى هنا
ليه يا عم الحاج العسكرى
عشان هنا مقر امريكى و ممنوع الركن
قلت له يا عم دى مش مدينه نصر برضه فى القاهره و انت اكبر دليل على ان دى مصر قاللى لا بس هنا ممنوع احسن الضابط يبهدلنى
قلت له اندهلى طيب الضابط
جه انسان تانى غريب برضه بس ضابط و قال لى معلش مش حاينفع هنا يا مدام عشان ده مقر سكن مدرسين المدرسه الامريكيه
يا نهار اسود
ده انا كنت باحسبه مقر الامم المتحده دى حتى مش الجامعه الامريكيه دى ام المدرسه الامريكيه اللى كل مدرسينها كانو شغالين فى ماكدونالدز فى امريكا بربع جنيه فى الشهر

للدرجه دى احنا اتبهدلنا فى بلدنا
قلت له ماشى يا سيدى و بالنسبه للمدرسين المصريين يعنى يركنو فين
قاللى هناك فى الحته الضلمه دى
رحت الحته الضلمه و انا خايفه عشان كان معايا بناتى فى العربيه ورا و خايفه امشى بيهم حته كبيره فى الشارع بالليل
المهم اللى يخاف من العفريت يطلع له طلعت لى واحده متختخه كده بجلابيه و مصره تقره لى الودع
يا ستى انا مش باحب الحاجات دى ابعدى عنى
لاحظو انى جوه العربيه و الشباك مفتوح
الست فضلت لازقه لى و قعدت تستعرض مهارتها بانها تقولى انى محسوده
اصلا أي انسان مصرى جرب كده تقوله انه محسود حايصعب عليه نفسه قوى و يصدق
قلت لها محسوده على ايه يا ستى الله يسهلك
قالت لى فى واحده فى عيلتك تخينه و واحده رفيعه
طيب بالذمه اقول ايه ما كل العيلات اللى فى الدنيا فيها واحده تخينه و واحده رفيعه
المهم انها نصحتنى اخلى بالى عشان الرفيعه عاملالى عمل ماشى يا ستى شكرا
و استمرت ......

فيه شاب فى عيلتك اسمه محمد
على حظها المزفت احنا العيله الوحيده اللى فى العالم الاسلامى اللى ما عندناش و لا شاب اسمه محمد
قالت لى طيب بصى من الاخر فيه واحده عينها واجعاها و عايزه فلوس عشان تعمل عمليه والست التخينه دى مندوبة البنك الدولى اللى بتتولى لم الفلوس عشان العمليه
اعمل ايه يا رب عايزاها تحل عن سمايا ادتها عشره جنيه
قامت مدخله ايدها من الشباك و ماسكه ايدى و بايدها التانيه شدت شعرى من قدام من تحت الحجاب و قطعته
يخربيتك يا هبله عايزه ايه تانى
عارفين عبد الفتاح القصرى فى الفيلم لما نكش شعره و قعد يقول كتاكيييت كتاكيييت
هى عملت كده بقه فلوس للعمليه فلوس للعمليه و انا مرعوبه منها عشان هى هبله باين و عشان كمان ندى و نادين بداو يضغطو على اعصابى نادين عماله تقول ايه ايه ايه ايه عشان ما كانتش لسه بتتكلم و ندى فيه ايه يا مامىى الست دى بتخوف يا مامى
و الست لسه شغاله فلوس العمليه فلوس العمليه رحت قعدت اديها فلوس لحد ما كل اللى معايا فى جيب الشنطه البرانى خلص هديت و مشيت الحمد لله
طلعت بكام الابله فى الشغلانه دى حوالى خمسه و سبعين جنيه كده
المهم نزلت و انا اخر نكد ( شوف الاصرار ) اشتريت الحاجات لندى و روحت و انا زعلانه جدا
تانى يوم كانت بنت خالتى و خطيبها رامى ( اصبح زوجها الان ) بيزورونى و حكيت لهم انى زعلانه موت
راح رامى الله يكرمه قرر ياخدنى القسم و نبلغ البوليس
و دخلت القسم مش حاقول لاول مره عشان انا باروح كتير عشان كل شويه الشغالين بيسرقونى و كده
المهم كل ما نمشى فى القسم نلاقيهم لامين ستات من بتوع الودع دول و واحد افندى جاى يشتكى و يقول خدت منى خمسين و اللى يقول ستين
الحمد لله لست وحدك يا ايمان البلد كلها اتقشطت امبارح
المهم قبل ما اخش للضابط و اتعرف عليها وكده لقيت شله منهم واقفين يقولولى و انت مالك انت كمان يا ست
قلت لهم واحده منكم خدت منى امبارح خمسه و سبعين جنيه
قامت واحده فيهم بكل الاطه طلعتلى كوم فلوس و عدت خمسه و سبعين و ادتهملى و قالتلى روحى بقه يا ست احنا مش ناقصين و النبى
قلت لها هما ما كانوش خمسه و سبعين بالضبط يعنى هما كانو حوالى خمسميه و سبعي...................
و لسه عايزه اهذر راح رامى ساحبنى و هوه فطسان من الضحك وقاللى كفايه بقه يا ايمان انت حاتعملى بيزنس و اللا ايييه
المهم خلصت الحكايه و لما حد فيكم يشوفنى بهزأ حد من الاخوه دول فى عباس العقاد ناحية كنتاكى كده مش عايزاه يسأل ليه عشان اكيد حايعرف لوحده و خلى بالكم من الكتاكيت

ممكن تبعتولى تعليقاتكم كل التعليقات مرحب بها

حاحكيلكم النهارده عن هوايه غريبه كانت عندى و انا فعلا اعنى كانت كنت لى عاده كده ايييه اتفرج على افلام رعب و مش اى رعب يعنى مش قتل و تقطيع و دم و لا حتى حيوانات مفترسه و امراض غريبه و حشرات و القرف ده
لا رعب معين افلام الاشباح المنيله و الهوايه دى خلاص باى باى و حاتعرفو ليه الفيلم الاول :
THE OTHERS بطولة الفنانه العريقه NICOLE KIDMAN و كان معاها عيلين كده مرعبين
و تلات شغالين رعب اخر حاجه بقه فى الدنيا
المهم الفيلم ده كان صدمة العمر بالنسبه لى لما اكتشفت ان بسلامتهم الابطال المهددين بالاشباح
هما الناس التانيين
يعنى هما بسم الله الرحمن الرحيم الاشباح
و فى مشهد معين فى الفيلم و هو مشهد التلات شغالين الجمال دول بعد ما الولد اكتشف انهم ميتين
و هما واقفين بره الباب الزجاج و فجاه بقم جوه
اقسم بالله العظيم انى شفتهم و طلعولى بالليل
و ما حدش يقولى ان ده كان حلم عشان انا متاكده انى كنت متنيله صاحيه
و دى كانت الضربه الاولى فى عالم الاشباح
الفيلم الثانى
THE GIFT يعنى الفيلم ده قعد فى السينما بتاع ساعه و نص بس ما كملش يعنى فاشل باختصار
لكن اسباب الرعب كانت مختلفه و احب احكى لكم عنه بالتفصيل فى يوم كلمنى اخواتى الاتنين الصغيرين دعاء ربنا يخليها و احمد حبيبى الله يرحمه و قالولى حايجولى عشان نخرج سو ا نروح السيما
رحبت جدا و قلت لهم رعب بقه ماشى
قالو ماشى سالت على اخر فيلم نزل و كان الفيلم ده the giftركبت تاكسى انا و العيال و كان تاكسى منيل بستين نيله
و مكسر و مدغدغ
و مالوش اكره و لا كراسى و لا حاجه ابدا
المهم نزلت من التاكسى بعد مشوار قريب جدا لحد و ندر لاند بس و انا راكبه من اخر عباس العقاد عند السفارات
قلت له كام يا عم قال لى سبعه جنيه و نص
شوف الدقه يا اخى
المهم قلت له حضرتك فهمتنى غلط
انا عندى عربيه مش عايزه اشترى التاكس انا بس حادفع الاجره
المهم دفعت لان الراجل كان خلاص حاينزل من العربيه و يصور قتيل
رحنا السيما لقينا نفسنا احنا التلاته بس اللى داخلين الفيلم ده
راح الموظف قال لازم تكونو اربعه عشان اشغل الفيلم قلنا له يا عم حانشترى كمان كرسى و نسيبه فاضى على اساس ان احنا بنركب بيجو او ميكروباص يعنى
بس دخلنا الله لا يسيئك
المهم انتو عارفين ان احنا فى مصر كل شىء ممكن طبعا
و مافيش حاجه اسمها ممنوع
طبعا دخلنا فى الاخر و لقينا نفسنا فى القاعه الكبييييره احنا التلاته بس يا حلاوه ماشى
و بدا الفيلم و الله ما كانش رعب قوى يعنى انما فجاه و احنا قاعدين فى امان الله لقينا حاجه لطيفه و ناعمه بتلعب فى رجلينا
احنا التلاته طبعا صرخن
ا و قمنا من مكاننا مفزوعين
راح احمد قايل ايه ده هو عشان الفيلم مش رعب قوى جابولنا مؤثرات حيه و اللا ايييييه
المهم كانت مجرد قطه بتتفسح فى السيما
لكن مش وقتها خالص
قعدنا على قرافيصنا طول الفيلم من الرعب من القطط
و بعدين بعد شويه انضم لينا ناس كانو دخلو فيلم تانى ما عجبهمش فجم يقضو بقية الفيلم معانا
و كنا سعداء جدا بيهم لدرجه سيبنا السينما كلها فاضيه و قعدنا جنبهم
و مش عايزه اقولكم كانو حايطقو عشان دول كانو حبيبه باين و مزوغين
و افتكرونا بنغلس ما عرفوش ان احنا كنا فعلا خايفين و مرعوبين و قاعدين نتحامى فيهم
لو سمحتم ما تبخلوش على بتعليقاتكم و حكاياتكم انتم كمان