الجمعة، 4 يوليو، 2008

ذكريات الطفوله المشرده -4

خلصت سنه اولى اعدادى
و المفاجاه الكبرى جدا
طلعت الاولى على المدرسه ، رغم انى كان كبيرى فى دبى الثانيه عشان محمد اللى حكيت لكم انه كان فى صيدله و بيحضر فى سادسه ابتدائى معانا اللى كان معقدنى
الصراحه برضه كانت الشيماء صديقتى فى النوتردام معقدانى برضه ، ودى كانت اول مره اطلع عليها الاولى ، بعدها طلعت الاولى تانى
بس فين بقه فى ثانويه عامه عشان انا كنت علمى علوم و هى علمى رياضه هاهاه
غير كده لم يتسن لى بعد ذلك ( حلوه يتسن دى ) انى اطلع عليها الاولى
بس برضه انا حاسه انها ما كاتش عن حق
عشان انا كنت واخده كل الماث قبل كده و الانجليش كان فى جيبى الصغير
يعنى زى ما حكيت كنت باذاكر سوشال و فرنساوى بس
طبعا جت نتيجتى فى الفرنساوى غير سعيده
طلعت الثامنه ع المدرسه
و بالرغم من كده كانت مدام دريه فخوره بى اوى اوى رغم انى كنت باعيط
عشان عرفت امشى حالى رغم انى جديده فى الكار هاهاها
و دخلت تانيه اعدادى و ابتدت المواضيع تتعقد و كان بيدرسلى ماث مسيو اسمه عليوه شلبى و النبى ينفع مدرس مات يبقى اسمه كده ؟
و كنت باعتمد على نفسى تماما
و عرفت ان فيه اختراع اسمه دروس
الناس بتاخدها فى السيانس و المات
لكن انا فشر ، عمرى ما خدت درس و كنت باعتبرها عيبه فى حقى ، و كمان مدرسة السينس بتاعتى مدموازيل ايمان كانت هى السبب الرئيسى انى دخلت علمى ........رياضه
عشان كرهتنى فى العلوم اللى ربنا خلقها كلها
عدت تانيه اعدادى على خير و طلعت التانيه بعد الشيماء ، بس عادى زى الزمالك كده تانى الدورى استمريت فى هذا المركز سنين
المعجزه بقه
انى طلعت الثانيه فى الفرنساوى و خدت شهادة تقدير
و كنت وقتها كل ما اذاكر فرنش افتكر اغنية
اتقدم اتقدم و كفايه خلاص تتندم
من فيلم النمر الاسود ، بس انا كنت بيضه شويه هاهاهاها
و جاءت الاعداديه
و الناس قالولى انها شهاده ، و سالت
يعنى ايه شهاده يا ناس ؟
مش سنه زى اى سنه ؟
قالوا لااااه لازم تاخدى دروس و بتاع
نفضت و قلت ربنا يعدلها زى ما عدلها السنين اللى فاتت
و فعلا عملت كده فى كل المواد اعتمدت على نفسى كعادتى و قطعت الدنيا مذاكره
بس الماث
فى تالته اعدادى لقيت حاجات جديده فى الماث عمرى ما خدتها ، زى مثلا السيركل فى الهندسه و شغلها كله و بهدله جامده
حاولت افهم من نبيل ( اسم المستر بتاعى )
ما قدرتش خالص
بالعكس ده نبيل الله يسامحه نسانى اللى كنت عارفاه اساسا
حقيقى بعبقريته كان حايخلينى اخش ادبى و الله العظيم

طيب تعملى ايه يا بت يا ايمان
رحت بعد الدراسه ما بدات بشهر كده لواحده صاحبتى و طلبت اخد درس عند المستر اللى بيديها
و حصل رحت معاها الحصه اللى بعدها
و الله الراجل ده عمرى ما شفت زيه فى حياتى

اول مره شفته عيطت
عشان زعقلى و قاللى انتى فاكره نفسك عبقريه يا ست هانم
الدروس عندى بدات من نص تمانيه و انتى جايالى نص تسعه بعد ما قربت اخلص المنهج
رديت عليه : باردون يا مستر اصلى كنت فاكره حافهم من مدرس الكلاس
ما عجبوش ردى عليه و زاد على كمان : اقعدى فى الاخر خالص هنا اما نشوف
طبعا اترزعت و قعدت اعيط طول الحصه ، بلا انقطاع ، و انا باحلف انى ما عتبش المكان ده تانى
و البنات كلها فى الحصه حوالى سبعتاشر بنت ادونى مناديلهم و خلصتهم

المفاجاه هى

انى فهمت ماث
لاول مره من سنتين
افهم ماث
فهمت من الراجل ده كل حاجه ، هوه كان معجزه بصراحه ، و كنت باعيط فى اخر الحصه من السعاده مش من الحزن

و رسم مساله و سالنى سؤال عن زاويه معينه :

و رديت عليه و انا باتشهنف : ما ينفعشى اصلا الرسمه اللى حضرتك راسمها

لازم مادام الانجل اكيوت يكون الارك بتاعها مينور اهىء اهىء اهىء ، حضرتك راسمه ماجور
( الترجمه : لازم الزاويه تكون مرسومه على قوس اصغر من نص دايره طالما هى زاويه حاده )
سالنى ، انت عرفتى منين ، كنت بتاخدى درس قبل ما تجيلى ، قلت له هىء هىء لاه عااا فهمت من حضرتك دلوقتى عاااااا

الراجل انبهر

و قالى انتى فعلا عبقريه ، انتى اسمك ايه

رديت و انا حاسه انه بيتريا على و حايرمينى بره ، و نا لما صدقت بدات افهم

اسمى ايمان اسامه سعادتك

راح مستر احمد سليمان قايلى طيب تعالى اقعدى جنب جيجى صاحبتك هنا قدام عشان انتى مش شايفه كويس من وراء

المهم الراجل ده مش حانساه طول حياتى عشان اعاد لى الثقه بنفسى بعد ما كنت خلاص حسيت انى متخلفه عقليا
وفى اليوم ده قررت لتانى مره اخش هندسه
و بعد الحكايه دى بسنين طويله
جالى طالب فى تالته اعدادى اسمه كريم
مامته قالتلى كريم مش شاطر فى الماث و خلى بالك حايتعبك يا ميس ايمان
و قعدت مع كريم حصه واحده و بعدين سالته سؤال
رد على رد صح ، قلت له عرفت منين يا كريم كنت بتاخد درس ؟
قاللى كريم لا يا ميس حضرتك قلتيها من شويه
ساعتها حسيت ان طفولتى رجعت تانى ، و شفت فيه نفسى و انا صغيره ، بس ان شاء الله يكون احسن منى
و قلت لمامته مين قالك ان كريم وحش فى الماث
قالت المدرسين بتوعه
قلت لها هما اللى مش كويسين فى الماث
كريم ده عبقرى
علمى رياضه من الاخر
الباشمهندس كيمو
انا كنت بادرس كيمو فى تانيه ثانوى السنه اللى فاتت
و جاب ماشاء الله تمانيه و تسعين و نص فى الميه
و طبعا قفل ماث وان بكل سهوله
هو دلوقت فى تالته ثانوى و كنت باديله احصاء السنه
بس ربنا يسترها عشان الامتحانات المنيله دى
اللى كانت السبب فى اكتئابى الاسبوع اللى فات و ما كتبتش مذكرات خالص كرامه لامتحان الاحصاء اللى كان هباب
اقولكم سر ؟
كريم قفل امتحان الاحصاء ، ماشاء الله لا قوة الا بالله
صحيح الديك الفصيح من البيضه يصيح
ده مثل معناه ان اللمعه و الذكاء دول هبه من الله سبحانه و تعالى ، بس اللى يكتشفهم من صغره
ربنا يهدى كل الولاد و يخليهم و ينجحهم يا رب
يتبع الاسبوع القادم باذن الله
امتحانات الاعداديه و الغش بالميكروفون .......................
مش عايزه اقول يعنى انى بافتح خمسين مره فى اليوم ادور على تعليقاتكم
على الجروب
او هنا فى المدونه
شكرا لكم

10 التعليقات:

غير معرف يقول...

جميلة الحلقة دى يا ايمان يا كبيرة

و احلى ما فيها
عملية اعادة الثقةاللى انتى مريتى بيها

انا بقى كان احساس التخلف العقلى ملازمنى طول سنين الدراسةفى الماث

فعلا كان بيجيبلى نكد و احباط

و كنت باطلعة على المدرسين بتوعى
سواء فى المدرسة او برايفت
: )))
احسن يستاهلوا

انا مش وش ماث اصلا

انا بموت فى حاجة اسمها تاريخ و جغرافيا
و انا صغيرة فى خمسة ابتدائى
كنت باجيب كتب جمال بدوى اللى عند بابا فى المكتبة ( غاوى هو كمان )و اقراهاو اروح المدرسة ابهر المدرسين بمعلوماتى
و لا الجغرافيا... كان عندى اطلس مش عند المدرسة بتاعتى :)) ,كان فى اخره كام صفحة معلومات عن البلاد المختلفة
كنت اقعد اتفرج عليهم و احفظهم بسهولة, اشى اعلام و اشى عملات و مساحة الدولة و عدد السكان :)))

هبلة انا ...ها :))

بس و الله كانت ايام حلوة

انما قوليلى

الأغنية الجميلة دى بتاعت مين؟؟؟

تشكرات افنظم

نيفين عيد

دعاء اسامه عواد يقول...

احلي حاجة في المذكرات دية استاذ احمد سليمان عشان انا برضة اخدت عندةوبحبة جدا جدا وربنا يدية الصحة يا رب اللي بياخدوا عندة كانهم بيخشوا في المكنة يطلعوا منة بال الفول مارك كمان استاذ محمود ياسر ..واحلي حاجة ان المذكرات دية غيرلتي المود عشان المود كان بعافية شوية..تسلم الذاكرة اللي فاكرةوالايد اللي كاتبة

زفته وقطران يقول...

اولا انت عبقريه من يومك يامنمون
لا تقولي استاذ ولا اي حد

وربنا يباركلك ف كيمو ويكتر من امثاله


وحشاااااااااني
كتييييييييييييير

دودو يقول...

انا فاكرة اني سمع اسم المستر ده من اولاد خالتي برضه
على كل يا ماني الديك الفصيح من البيضة يصيح فعلا
انا فاكرة اني لما كنت شاطرة زمان برضه كنت دودة قراية وبحب اقرا اي كتاب واكون مثقفة وبحب اشارك في كل شئ مش فاهمة العيال في المدارس دلوقتي مقفلين دماغتهم على المذاكرة بس ليه ده المدرسة فيها حاجات جميلة جدا بس هما مش حاسين بيفرطوا في ايه
حمدا لله على السلامة وحشتينا جدا

Rosie يقول...

حلو قوى يا ميس ايمان..و كل سلسلة ذكريات الطفولة..أنا ما كنتش عارفة أرد عشان كنت فى امتحانات الحصاء المنيلة اللى بتقوللى عليها و غيرها..بس خضرتك قوللتى فى الأول كنت علمى علوم عشان كده طلعتى الولى على شيماء و بعدين علمى رياضة عشان دخلتى هندسة؟؟حلو قوى مرة تانية و عايزة اشكر المدرس اللى رجعلك الثقة عشان ساعد ان يبقى عندنا ميس ايمان اللى خلت الناس تحب حصة الماث -و دى معجزة-و ر جعت الثقة لناس كثير...اه بالمناسبة فين منتدي صبايا اللى قوللتيلى عليه عشان مش عارفة اوصله
منة سميح

ام محمد و عمر يقول...

السلام عليكم يا مدام ايمان
اما متابعة المدونة بتاعتة حضرتك و القصص علي الفيس بوك كمان الله ينور
بس فيه سؤال عندي
حصرتك خريجة هندسة صح ؟ طب منييييين بتدرسي في مدرسة ماث و احصاء؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
معلش قفلت معايا شوية

سلام

CAIROCOMPUTER يقول...

حلقة الخميس 10-7 عنك
برنامج انت تسال والكمبيوتر يجيب

Eng. Rehab يقول...

i have just found ur blog today... i've been following ur facebook group for a while and i like ur style... but ur blog is more helarious...
i love it and u have a wonderful graceful way of flowing story-telling...
good luck...
one thing, i still dunno how u converted from engineering to teaching... i'm a mechanical engineer by the way... i'll dig deeper in ur blog maybe i'll find an answer...
i really love you :D

Desert cat يقول...

اصدقائى الأعزاء المدونين والمدونات
غداً الخميس 10/7/2008
يتم إذاعة حلقة خاصة من برنامجنا الإذاعى
أنت تسأل والكمبيوتر يجيب
والذى يذاع يومياً الساعه 9.10 صباحا على اذاعة البرنامج العام عدا يوم الجمعه

عن أ/ ايمان اسامه محمد عواد مدرسة رياضيات اقم لها بعض تلاميذها جروب على الفيسبوك حبا فيها .
يمنكم سماع الحلقة فى نفس وقت إذاعتها من خلال موقع البرنامج
http://dear.to/cairo
تمنايتنا بدوام التواصل

غير معرف يقول...

بجد يا ايمان اسلوبك رائع وومتاز انا اول مرة ادخل اقرى اللي انت كاتباه

فكرتيني بالذي مضى في السعودية وحاليا دبي

ربنا يوفقك

Template by:

Free Blog Templates