الناس كلها متعوده على انها لما تروح تصيف ، تلاقى الجو فى بلاد المصايف احسن من الجو فى موطنهم الاصلى
اه فعلا
ده كان زمان
قبل اختراع التكييف
اللى خلى الانسان فى المصيف يتعذب و يحلم بليله واحده هاديه ينامها فى التكييف
طبعا اهل الاسكندريه حايزعلوا منى ، و يقولولى ليه يا ايمى كده ، ده اسكندريه طراوه ع الاخر
صح يا اهالى الاسكندريه
بس ده فى حالة ان الانسان ينام و يفتح جميع الشبابيك و الشيش عشان تعمل تيار هوا مع بعضها
و ده بيخلى الجو رائع طول الليل ، لكن مع الجو الرائع ، الناس على البحر ما بتنامش
على راى الروايه الشهيره
لا احد ينام فى الاسكندريه
لدرجة ان اختى مره قعدت تراقب البشر على البحر لمدة اتناشر ساعه متواصله
و توصلت لنتيجه رائعه
ان الناس دى متمسمره فى البحر و الشاطىء
ما بيتحركوش و ما بيناموش
و طلبت منى تدخل البلاج بنفسها عشان تتاكد انهم بجد مش ماكيتات دعايه زى بتوع المدن الجديده
و الناس اللى ما بتنامش دى مش لازم تعمل دوشه
طبعا لازم
ولما ما بيناموش بيعملوا دوشه جامده جدا
مصيفين بقه و فرحانين
طيب يا ايمان ما تناموا الصبح لما الناس دى تروح
ايوه لما الناس دى بتروح ، بييجى ناس غيرهم ورديه تانيه يعنى
ده بالاضافه ان الشمس بتيجى و تسلقنا زى البيض
و نفضل كلنا ننتقل من اوضه لاوضه حسب اتجاهات الشمس ، لدرجة انى كان ممكن اخترع الساعه الشمسيه لو ما كانش حد سبقنى و اخترعها
لانى اصبحت فى اى لحظة اقولك الساعه كام بمجرد ما اشوف الشمس فى انهى اوضه
و للاسف ما كنتش رايحه الهولوكست ده لوحدى ، كان ممكن استحمل ، لا كان معايا اولاد اخواتى و اخواتى
و العيال دى عمرها ما شافت حر
و لا عمرهم ناموا ببيجامه كت او نص كم
دايما باكمام عشان التكييف فى البلاد العربيه مركزى
و هما كلهم متربيين هناك
و بناتى كمان ، لو ما سمعوش زنة التكييف ما فيش نوم خالص ، ده غير انهم اصبحوا بيستحموا كل خمس دقائق عشان الحر
و العيال الصغيره كلها لابسين بنطلون بيجامه و فانله حمالات من فوق و شعرهم لازق على راسهم و شكلهم بيئه بيئه بالمضبوط
قلت معلش يا ايمى اشترى مروحه
ايه المروحه دى ، ده اختراع فاشل فاشل
و كل اللى بتعمله انها بتطير الدبان
اه اصلى نسيت اقول ان فتح الابواب و الشبابيك بيؤدى لدخول الدبان
مع ان البواب حلف ان الدبان عمره ما يطلع الدور الستاشر لما جيت اشترى سلك للشبابيك
لكن الظاهر الدبان بيطلع فى الاسانسير و يدوس الزرا ر كمان
و بما انى لم احضر عائلتى باكملها لتتعذب معى فى بيتى الجديد بالاسكندريه
كان لزاماً على ان اقوم بتركيب تكييف فى الشقه
ان شالله واحد كبير فى الرسبشن يخفف الحر شويه و خلاص
و اتصلت بعدد من الشركات اللى كانت بتسالنى من غير معاينه كده عايزه تكييف كام حصان ، كان كل مصرى اصبح خبير خيل فى لحظه واحده
و كان سؤال اكثر من شركه ليس هدفه اقل سعر
بل هدفه الاساسى ، اسرع تركيب
و بالفعل تعاقدت مع الشركه التى اعطتنى ميعاد فى اليوم التالى مباشره للتركيب
و بدات الحكايه
جاء العمال الساعه الثامنه مساء ، و بعد شد و جذب و مناقشات قرروا مكان التكييف و مكان الكومبرسور فى البلكونه
و لما طلبت وضع الكومبرسور على السور
هددونى انهم كده لازم يشيلوا السور و يركبوه تانى
خفت جدا عشان ممكن يركب اى كلام و انا فى الدور الستاشر و ما عنديش استعداد اخاطر
و سبتهم يشتغلوا
لقيت واحد فيهم شايل هيلتى ( شنيور كبير جدا يستخدم لخرق الخرسانه ) و دخل الرجل فى الحائط بالشنيور و ظل يحفر مده طويله جدا و فوجئت بعد هذا الحفر
ان الافندى دخل فى حيطه بالطول ، مدماك طوب يعنى عشان كده ما خرجش من الناحيه الثانيه
و تم صناعة تل رمل احمر صغير
و عندما تنبه للخطا
وعدنى باصلاحه
و الحمد لله قعد يركب التكييف بدون تفاصيل كثيره ست ساعات متواصله ، من الساعه تسعه مساء الى الساعه الرابعه فجرا
و اصبح العمال عشره و العيال تلعب معاهم و ينادوهم باسماءهم ، حتى الشغاله حفظت الشاى بتاعهم فى كام معلقة سكر
و بعد ان انتهوا و مشوا و العيال عملوا احتفال رائع بالتكييف الذى اشتغل و الحمد لله
فوجئت ببركة مياه فى البلكونه تحت الكمبرسور ، و ايضا ان جميع المواسير لم يتم عزلها بالشريط و تركت لتصدا فى هواء الاسكندريه الرطب
طبعا اول حاجه عملتها لما صحيت من النوم
انى اتصلت بفرع الشركه فى الاسكندريه اللى اعتذروا لى بشده
و ارسلوا نفس عمال امبارح و معهم خبير اجنبى و مهندس كبير اوى
و عملوا التالى
فكوا التكييف بالكامل و الكمبروسو و اعادوا تركيبه باكمله مره اخرى
عشان كان راكب غلط خالص و اخر عك وفى تلك المره اصررت ان يتم تركيبه خارج البلكونه عشان الدوشه
و بعد الاعتذارات المريره من جانبهم طالبونى بربعمية جنيه تطويل مواسير
لطمت على وشى
يخربيت كده ، انا مالى ، غلطاتهم انا ادفع تمنها ليييه
لو كنت فى اى مكان محترم فى العالم كان ممكن ارفع عليهم قضيه و اكسبها
و اقسمت بالله العظيم انى لن ادفع
ولما كلمنى مدير الفرع فى التليفون بطريقه مش عاجبانى
قلت له شوف يا باشا تكييفك اتفك خلاص
ابعت خده و ادينى فلوسى
بيس يا مان
طبعا الراجل خاف منى عشان حس انى مجنونه
فسكت تماما و لم يطالب بقيمة المواسير
و التركيب خد برضه ست ساعات هذه المره
رغم انى ركبت تكييفات شقتى باكملها فى القاهره فى ساعتين بس
و حمدت الله للمره الثانيه و العيال عملوا احتفال اخر و اشتغل التكييف شغل جميل جدا و الحمد لله نمنا فى سلام و امان
و صحيت الصبح فرحانه انى عرفت انام و لسه جايه امشى تحت التكييف
لقيت نفسى ماشيه فى بركة مياه بداخل الرسبشن و جزء من الماء دخل فى التلفزيون من الخلف
الى هذا الحد لم استطع الاحتمال ، الحقونى يا ناااس التكييف حايموتنىى ى ى ى ى
رن جرس الباب ، و جدت جارى فى الدور التلاتاشر يشكو ان خرطوم التكييف بينقط ميه عنده فى البلكونه
دخلت احاول اجيب الخرطوم باستخدام مقشه عشان بعيد عنى شويه
لقيت جارتى اللى تحت طالعه تزعق
انتم يا للى بتنفضوا المقشات ع الصبح
فى حاجات حاتقع علينا
الى هنا و احسست انى مستهدفه
ان الناس كلها مضطهدانى و مش طايقانى و جايين عشانى مخصوص
و كنت حاعمل زى حلمى فى الفيلم الجديد
و ادخل اكتب على اللاب توب :
عزيزى رئيس الجمهوريه ............. نرجو التكييف حايموتنى
ثم فكرت فى شىء اخر
رحت جبت العقد اللى انا كاتباه مع الشركه و رقم موبايل على العقد اتصلت بيه مباشرة
رد على راجل محترم اخر حاجه
قلت له انا ايمان بتاعة التكييف
رد : ايمان مين يا فندم
قلت : بتاعة الاتناشر ساعه تركيب
و لقيته ما يعرفش حاجه عن مشكلتى الاليمه اللى الدمعه فرت من عينيه لما حكتهاله بتفاصيلها الاليمه
لكنه تعاطف معايا جدا و اتصل بمدير فرع الاسكندريه و انا معاه ع التلفون و طلب منه ييجى بنفسه يصلح الخطا الاخير
و بالفعل بعد نصف ساعه لقيت الشركه كلها عندى بخبراءها و عمالها و مديرها بنفسه و حسيت ان الشركه خلاص حاتفتح فرع تانى عندى فى البيت ، كان ناقصهم بس الفراش بتاع الفرع
و لما ا دخلوا طبعا عملنا الشاى و الكركديه ما خلاص اصبحوا عشره
و كل واحد فيهم عرفت بيحب يشرب ايه بكام معلقة سكر
الله يجازى الشاى الدلما
الظاهر هو السبب اللى بيخليهم ييجوا عندى تانى
و بدلا من ان اغتاظ او اتنرفز عليهم
و جدت نفسى و ياللسخريه
اضحك ضحك هستيرى
و قلت لهم يا جماعه انا حاسه ان ده التكييف الوحيد اللى عندكم فى الشركه ، ماهو بالطريقه دى مش حاتلاقوا وقت تركبوا غيره
و وجدتهم هم ايضاً بعد ان كان على وجوههم الاسف و الالم
يغرقون فى الضحك
و يتعجبون من ان هذه الحكايه لم تحدث ابدا مع غيرى
انا بس
و طبعا انا طمنتهم ان ده عادى عندى ، مافيش حاجه تحصل عادى كده لازم كل حاجه تبقى معرقبه كده و منيله بنيله هاهاها ، و كان نفسى اديهم لينك المذكرات دى عشان يعرفوا بنفسهم حياتى البائسه
المهم اكتشفوا هذه المره انهم نسو ورقة الضمان بداخل الجهاز
عشان كده انكتم و جاب ميه
وشويه و كان ممكن يجيب زيت كمان
و حسيت انى لازم اعمل ليله لاهل الله
بمناسبة نجاتى انا و اولادى من التكييف
عارفين انا طلعت اتصلت بمين
رئيس مجلس ادارة الشركه شخصياً ، الاستاذ ميراكو كارير هاهاها
و ان حظ اللى ركبوا التكييف طلع منيل بنيله و كان هو موجود بنفسه للرد على بس برضه لازم اشكر هذا الانسان
عشان هو انسان محترم
و ودعت عمال التكييف بكل الم ، و انا باجيب زير عشان اكسره وراهم
و اخلص من الموال ده
و طبعا كانت اجازتى انتهت و كان المفروض ارجع القاهره ، لكنى قررت امدها بضعه ايام ، نقاهه يعنى
عشان ارتاح من التكييف و اللى جرالى منه

كل سنه و انتم طيبين

لينك التعليقات على الجروب

http://www.facebook.com/topic.php?uid=5663673625&topic=4103&start=240&hash=18353204a11dd635a14039515bd67420

احلى حاجه عندى اسمع تعليق منكم

خلصت سنه اولى اعدادى

و المفاجاه الكبرى جدا

طلعت الاولى على المدرسه ، رغم انى كان كبيرى فى دبى الثانيه عشان محمد اللى حكيت لكم انه كان فى صيدله و بيحضر فى سادسه ابتدائى معانا اللى كان معقدنى

الصراحه برضه كانت الشيماء صديقتى فى النوتردام معقدانى برضه ، ودى كانت اول مره اطلع عليها الاولى ، بعدها طلعت الاولى تانى

بس فين بقه فى ثانويه عامه عشان انا كنت علمى علوم و هى علمى رياضه هاهاه

غير كده لم يتسن لى بعد ذلك ( حلوه يتسن دى ) انى اطلع عليها الاولى

بس برضه انا حاسه انها ما كاتش عن حق

عشان انا كنت واخده كل الماث قبل كده و الانجليش كان فى جيبى الصغير

يعنى زى ما حكيت كنت باذاكر سوشال و فرنساوى بس

طبعا جت نتيجتى فى الفرنساوى غير سعيده

طلعت الثامنه ع المدرسه

و بالرغم من كده كانت مدام دريه فخوره بى اوى اوى رغم انى كنت باعيط

عشان عرفت امشى حالى رغم انى جديده فى الكار هاهاها

و دخلت تانيه اعدادى و ابتدت المواضيع تتعقد و كان بيدرسلى ماث مسيو اسمه عليوه شلبى و النبى ينفع مدرس مات يبقى اسمه كده ؟

و كنت باعتمد على نفسى تماما

و عرفت ان فيه اختراع اسمه دروس

الناس بتاخدها فى السيانس و المات

لكن انا فشر ، عمرى ما خدت درس و كنت باعتبرها عيبه فى حقى ، و كمان مدرسة السينس بتاعتى مدموازيل ايمان كانت هى السبب الرئيسى انى دخلت علمى ........رياضه

عشان كرهتنى فى العلوم اللى ربنا خلقها كلها

عدت تانيه اعدادى على خير و طلعت التانيه بعد الشيماء ، بس عادى زى الزمالك كده تانى الدورى استمريت فى هذا المركز سنين

المعجزه بقه

انى طلعت الثانيه فى الفرنساوى و خدت شهادة تقدير

و كنت وقتها كل ما اذاكر فرنش افتكر اغنية

اتقدم اتقدم و كفايه خلاص تتندم

من فيلم النمر الاسود ، بس انا كنت بيضه شويه هاهاهاها

و جاءت الاعداديه

و الناس قالولى انها شهاده ، و سالت

يعنى ايه شهاده يا ناس ؟

مش سنه زى اى سنه ؟

قالوا لااااه لازم تاخدى دروس و بتاع

نفضت و قلت ربنا يعدلها زى ما عدلها السنين اللى فاتت

و فعلا عملت كده فى كل المواد اعتمدت على نفسى كعادتى و قطعت الدنيا مذاكره

بس الماث

فى تالته اعدادى لقيت حاجات جديده فى الماث عمرى ما خدتها ، زى مثلا السيركل فى الهندسه و شغلها كله و بهدله جامده
حاولت افهم من نبيل ( اسم المستر بتاعى )
ما قدرتش خالص
بالعكس ده نبيل الله يسامحه نسانى اللى كنت عارفاه اساسا

حقيقى بعبقريته كان حايخلينى اخش ادبى و الله العظيم

طيب تعملى ايه يا بت يا ايمان
رحت بعد الدراسه ما بدات بشهر كده لواحده صاحبتى و طلبت اخد درس عند المستر اللى بيديها
و حصل رحت معاها الحصه اللى بعدها
و الله الراجل ده عمرى ما شفت زيه فى حياتى

اول مره شفته عيطت
عشان زعقلى و قاللى انتى فاكره نفسك عبقريه يا ست هانم
الدروس عندى بدات من نص تمانيه و انتى جايالى نص تسعه بعد ما قربت اخلص المنهج
رديت عليه : باردون يا مستر اصلى كنت فاكره حافهم من مدرس الكلاس
ما عجبوش ردى عليه و زاد على كمان : اقعدى فى الاخر خالص هنا اما نشوف
طبعا اترزعت و قعدت اعيط طول الحصه ، بلا انقطاع ، و انا باحلف انى ما عتبش المكان ده تانى
و البنات كلها فى الحصه حوالى سبعتاشر بنت ادونى مناديلهم و خلصتهم

المفاجاه هى

انى فهمت ماث

لاول مره من سنتين

افهم ماث

فهمت من الراجل ده كل حاجه ، هوه كان معجزه بصراحه ، و كنت باعيط فى اخر الحصه من السعاده مش من الحزن

و رسم مساله و سالنى سؤال عن زاويه معينه :

و رديت عليه و انا باتشهنف : ما ينفعشى اصلا الرسمه اللى حضرتك راسمها

لازم مادام الانجل اكيوت يكون الارك بتاعها مينور اهىء اهىء اهىء ، حضرتك راسمه ماجور

( الترجمه : لازم الزاويه تكون مرسومه على قوس اصغر من نص دايره طالما هى زاويه حاده )

سالنى ، انت عرفتى منين ، كنت بتاخدى درس قبل ما تجيلى ، قلت له هىء هىء لاه عااا فهمت من حضرتك دلوقتى عاااااا

الراجل انبهر

و قالى انتى فعلا عبقريه ، انتى اسمك ايه

رديت و انا حاسه انه بيتريا على و حايرمينى بره ، و نا لما صدقت بدات افهم

اسمى ايمان اسامه سعادتك

راح مستر احمد سليمان قايلى طيب تعالى اقعدى جنب جيجى صاحبتك هنا قدام عشان انتى مش شايفه كويس من وراء

المهم الراجل ده مش حانساه طول حياتى عشان اعاد لى الثقه بنفسى بعد ما كنت خلاص حسيت انى متخلفه عقليا

وفى اليوم ده قررت لتانى مره اخش هندسه

و بعد الحكايه دى بسنين طويله

جالى طالب فى تالته اعدادى اسمه كريم

مامته قالتلى كريم مش شاطر فى الماث و خلى بالك حايتعبك يا ميس ايمان

و قعدت مع كريم حصه واحده و بعدين سالته سؤال

رد على رد صح ، قلت له عرفت منين يا كريم كنت بتاخد درس ؟

قاللى كريم لا يا ميس حضرتك قلتيها من شويه

ساعتها حسيت ان طفولتى رجعت تانى ، و شفت فيه نفسى و انا صغيره ، بس ان شاء الله يكون احسن منى

و قلت لمامته مين قالك ان كريم وحش فى الماث

قالت المدرسين بتوعه

قلت لها هما اللى مش كويسين فى الماث

كريم ده عبقرى

علمى رياضه من الاخر

الباشمهندس كيمو

انا كنت بادرس كيمو فى تانيه ثانوى السنه اللى فاتت

و جاب ماشاء الله تمانيه و تسعين و نص فى الميه

و طبعا قفل ماث وان بكل سهوله

هو دلوقت فى تالته ثانوى و كنت باديله احصاء السنه

بس ربنا يسترها عشان الامتحانات المنيله دى

اللى كانت السبب فى اكتئابى الاسبوع اللى فات و ما كتبتش مذكرات خالص كرامه لامتحان الاحصاء اللى كان هباب

اقولكم سر ؟

كريم قفل امتحان الاحصاء ، ماشاء الله لا قوة الا بالله

صحيح الديك الفصيح من البيضه يصيح

ده مثل معناه ان اللمعه و الذكاء دول هبه من الله سبحانه و تعالى ، بس اللى يكتشفهم من صغره

ربنا يهدى كل الولاد و يخليهم و ينجحهم يا رب

يتبع الاسبوع القادم باذن الله

امتحانات الاعداديه و الغش بالميكروفون .......................

مش عايزه اقول يعنى انى بافتح خمسين مره فى اليوم ادور على تعليقاتكم

http://www.facebook.com/topic.php?uid=5663673625&topic=4103&start=210&hash=f4466701d29f7a30a0dd5f01056bd1bc

على الجروب

او هنا فى المدونه

شكرا لكم

عدنا الى بلادنا الحلوه
حاتقولولى الشوارع زحمه و مش نضيفه ................... حلوه برضه
حاتقولو الزقازيق ما فيهاش اوتيل نروحه فى الويك اند ........... حلوه برضه
اسمع حد يقول المدرسه ما فيهاش بسين و لا حصنه .............. حلوه رغم كل ده برضه

ليه حلوه ؟ بناسها ، و الله جنه من غير ناس ما تنداس فعلا
احلى واطيب شعب فى الدنيا شعب مصر
اد ايه طيبين و مرحبين و متصالحين مع الدنيا رغم كل اللى شايفينه
لاحظوا الكلام ده كان سنة اربعه و تمانين ، و كان الناس بالهم اروق شويه ، و الاخ كان لسه جديد بقاله بتاع سنتين فى الحكم ولا حاجه
فى البدايه ماما لم تجد مدرسة لغات انجليزيه فى الزقازيق ، و بعدين لقينا واحده بس كانت لسه جديده بقالها كام سنه و اكبر فصل فيها فى سنه سادسه و انا كنت رايحه اولى اعدادى
و كان فيه برضه مدرسه عريقه هى النوتردام ، بس كانت اللغه الاولى فيها فرنساوى ، و انا علاقتى بيه سطحيه فى حدود
je suis
وكان الخياران كلاهما مر ، يا اما اروح المدرسه الانجليزى و انزل سنه ، و كان اصلا سنى صغير كان عندى عشر سنين و كان ممكن ادخل عادى
يا اما اروح النوتردام و اناضل هناك بقه و انا و نصيبى

طبعا ما رضتش انزل سنه ، هو انا هبله اروح تانى سنه سادسه ، ده انا لما صدقت خلصتها

و توكلت على الله و قلت اديها فرنش

المدرسه جميله بصراحه ، من غير ما نقارنها بمدرسة دبى ، كانت زى القصر الاسقف عاليه و الفصول واسعه جدا ، و جواها تشابل او كنيسه صغيره للسيرات المديرات بتوع المدرسه
لا كانت حلوه ، بس كان النظام فيها صارم
بخصوص الدرس كود ، و اليونى فورم ، و التوكه لازم تكون بيضه و صغيره ، و الشراب سوكت ابيض و ممنوع يطول لحد الركبه ، و الجيب كسر و لازم تكون مكويه
و ياما خدوا منى توك ملونه و سابونى شعرى مفرود طول اليوم ، و كنت باشوف التوك دى بعينى بتتباع فى معرض المدرسه اخر السنه ( توك وارد الخارج بقه هاهاهاها
احلى حاجه فى المدرسه دى البنات ، حلوين و طيبين ، و صحابى لحد دلوقتى ، دى ميزة انك تكبر فى بلدك ، بتربى ذكريات
يعنى فين هما رلى و ربى و جمانه دلوقتى ؟ ما عرفش ، و احسن انى ما عرفش لانهم زمانهم بدل ما كانوا بنات منفسنين بقم ستات منفسنين هاهاها
اما جيهان و حنان و شيماء و رحاب صديقاتى ، لسه باشوفهم الى الان ، و كبروا برضه ، و بقوا ستات كبار طيبين ، ربنا يخليهم كلهم

المهم انى كنت باقعد بطيخه الاول فى حصص الفرانسيه ، و دى كانت ماساه ، لانى عمرى فى حياتى ما كت بطيخه
فكنت باخد الكراسات بتاعة البنات القديمه عشان احفظ الفربات من اول ما اخترعوا الفرنساوى
يعنى اللى العيال دى خدته فى ست سنين كنت باذاكره انا فى شهرين
و الله لسه فاكره اسامى الدروس ، درس درس

بس ما انكرش ان الظروف كنت مواتيه جدا ، عشان ما كنتش باذاكر انجليش خالص لانه كان تافه بالنسبه للى خدته فى دبى
ولا ماث كمان عمرى ما ذاكرته عشان كان نفس اللى خدته السنه اللى فاتت ، و كنت انا ساعات اتطوع اشرح لميس سوزان الحاجات اللى بتشرحها غلط ، الرياضه الحديثه كانت لسه نازله مصر و كانت صعبه حتى ع المدرسين
اما الكارثه القوميه ، و انا اعنى فعلا كلمة قوميه
كانت المواد الاجتماعيه
اللى هى جعرافيا ، تاريخ ، و تربيه قوميه
الماده دى ما كانتش موجوده اساسا فى دبى ، تاريخ ايه بس اللى ياخدوه ، كان ايامها الشيخ زايد الله يرحمه وحد الامارات السبعه بقاله كام سنه بس ، و كل التاريخ اللى بناخده هو ده
ان الشيخ زايد موحد الامارات السبعه
شوف التعقيد بقه اللى العيال كانوا بيتعقدوه لما احكيلهم كده ، و هما طول حياتهم مفحوتين الاسره الاولى و اسباب انهيار الدوله الوسطى والملك سيتى الاول ، و بيبى الثانى ، و مؤامرة مرات ابو اخناتون ضده ( مرات ابوه كانت خالته برضك فى نفس الوقت هاهاهاهاهاه
يا نهار دراسات ؟؟
يعنى انا هاحفظ كل ده ، ده غير جغرافية بلاد العالم كلها ، و المحاصيل التى تشتهر بها ، و عاصمتها و الزى القومى بتاعها ، و الرقصه الشعبيه المفضله ، و كام مره خدوا كاس العالم هاهاهاهاها
و الله العظيم حرام العيال الصغيره تاخد الحاجات دى
بس كله كوم و التربيه الوطنيه او القوميه دى كوم تانى
دى كانت بتتكلم عن الامم المتحده و مجلس الامن ، و الدول الدائمة العضويه
بس الشهاده لله الحاجات دى كانت مفيده جدا و انا لحد دلوقتى فاكراها و حق الفيتو و الكلام ده عمرى ما كنت حاعرفه من غير التربيه الوطنيه
بس لما دخلنا بقه فى مؤتمر باندونج و دول عدم الانحياز و عبناصر و الحاجات المنقرضه دى
حسيت انها رخمت و باخت
الاستاذ اللى كان بيدرسلنا سوسيال ده كان اسمه استاذ تاوضروس
و كان صديق جدى الله يرحمه اللى كان وقتها مات من عشر سنين مثلا
و انا متاكده ان الاستاذ تاوضروس ده حضر مؤتمر باندونج بنفسه ، و راح بلودان مع عبناصر و كمان اشرف بنفسه على استعدادات البلاط الملكى لاستقبال كليوباترا
والا قولولى ، عرف كل الحاجات دى و التفاصيل دى منييين و ازااى الا اذا كان حضرها بنفسه

مش حاكذب و اقول مش باعرف احفظ ، لا باعرف ، و لما باحفظ باحفظ بافترا ، بغباوه يعنى
زى المكتوب فى الكتاب بالضبط و الا فلا
يعنى مش احفظ روح الموضوع ، لاه ، زى الكتاب بالضبط
و بعد امتحان الشهر اللى حسيت انى اديت فيه اداء عالى اوى
اداء جبار
نادانى مسيو تاضروس تانى يوم و قاللى اطلعى يا ايمان
و قلت الاقدار ابتسمت لى ، و دى نتيجة مذاكرتى و دحى العظيم
و ابتسمت ابتسامه اكبر من ابتسامة الاقدار
و طلعت بره وقفت عند المسيو
مسكنى من ودنى ، و قالى مش عيب كده ، انتى غشاشه
يا نهار اسوح
شرفى ، انا عمرى ما غشيت فى حياتى ابدا ابدا يا مسيو و الله
تاضروس الله يرحمه بقى : لا غشيتى ، ده انتى نقلتى من الكتاب نقل مسطره
انا : و الله ما نقلت بالمسطره و لا من غير المسطره ، و يعنى ايه اصلا نقل مسطره دى
و فتحت جاعورة عياط ، تقريبا صحت الناس فى دائرة قطرها كيلومتر من النوم
ده انا عمرى هىءاهىء ، ما غشيت و لا حتى غششت حد ، اهىء اهىء ، حتى البت اللى فتحتلى المقلمه فى دبى اهىء اهىء ، ما غششتاهاش عاااااااا
المهم الراجل شك فى نفسه فعلا من كتر الجاعوره دى ، وقاللى طيب اثبتى انك مش غاشه ، قلت له و الختمه الشريفه يا بيه ما غشيت عااااااااا
قاللى لا هاسالك اسئله و تجاوبى
قلت له لازم تسالنى عشان كرامتى ضاعت كده فى الفصل اهىء اهىءاهىء
العيال ادونى مناديل و خلونى امسح دموعى و هما زعلانين و عمالين يقولو لا يا مسيو ايمان مش غشاشه
المهم الراجل سالنى اسئله فى الماده ، و رديت رد مسطره و انا باتشهنف من العياط المرير
و فوجىء الرجل مفاجأه عمره ، و كان مش عارف يودى وشه فين ، تصدقوا بالله ، انا مكسوفاله لحد دلوقت ، كبسه كبسه كبسه
على راى مدحت شلبى فرحه فرحه فرحه هاهاها
و طبعا رفعت راسى عاليا لتطاول عنان السماء بعد هذا الموقف
و كان فاضل العيال يعملولى زفه على الحنطور و يغنولى والله و عملوها الرجاله
قصدى
كفاره يا زينة الرجاله هاهاهاها
يتبع

تعلقياتكم هنا و على الجروب بتاعى

http://www.facebook.com/topic.php?uid=5663673625&topic=4103&start=210&hash=f4466701d29f7a30a0dd5f01056bd1bc

اكتر حاجه بتسعدنى تعليقاتكم

ناسف لقطع ذكريات الطفوله

لكن الثانويه العامه هافه على اوى اوى اوى

يا جماعه انتو فاهمينها غلط

دى هى موحدة القطرين ، موحده الشعب المصرى ن على الهم و الارق

بنات مدرستى ( اللى انا مدرسه فيها )

كانوا بيمتحنوا فى نفس اللجنه مع مدارس اخرى منها التجريبيه و الاقل مستوى

لكن امام اللجنه كان المشهد كالتالى

اب نازل من الميكروباس ، و تحت ابطه جريده و فى يده علبة عصير للبنت

ام جايه مشى من بيتها القريب و معاها زجاجة ميه ساقعه للبنت

اب جاى على عجله و جايب بجنيه عيش بالعافيه من الفرن عشان ياخد البنت يغديها

ام راكبه عربيتها و شغاله مدخنة سجاير و معاها ورا كيس دوريتوس للبنت عشان ضغطها و اطى و بتحتاج حاجه مملحه

شاب صغير راكب تمانيه و عشرين و مستنى اخته الصغيره

راجل فخم و مراته افخم راكبين مرسيدس

ام جايه مع السواق و مدياله مصحف يقرا منه وهى بتقرا من مصحف تانى

عربيه فور باى فور ساده الشارع كله و قدامها بوز فى بوز طابور عربيات ساده الشارع بالعكس

و المفاجاه الكبرى

ماحدش بيزعق و لا زهقان ع التانى ، ولا حد مخنوق م الزحمه و لا بيقول ايه البهايم اللى راكنين فى وسط الشارع دول

كلهم عليهم سهم الله ، و عيونهم شاخصه الى السماء و ده قبل الامتحان ما ينتهى بنصف ساعه

اما انا ، كنت مع تلميذتى و صديقتى الصغيره نيفين ، من كام سنه برضه كنت واقفه نفس الوقفه مستنياها لما تخرج من امتحانها

و النهارده كان عندى ظروف و عربيتى مع زوجى ، فقررت انها تاخدنى بعربيتها و تستنى معايا لحد ساعة الحسم لما البنات تطلع

نزلت بنت واحده بتعيط

بس ، اعطت الاشاره

كل اولياء الامور اشتغلو فى العياط و الصويت قبل ما يشوفوا عيالهم حتى

البنت دى انا عارفاها كنت بادرسها فى اولى ثانوى

صرخت يا جماعه ما تخافوش

البت دى بليده

ان شاء الله الامتحان سهل باذن الله

و بعدها بثانيه كان الامتحان فى ايدى ، يا نهار احوس

العيال زمانهم متشلوحين فوق

متبهدلين فوق

مدمرين فوق

بس ما قلتش كده لاولياء الامور الملهوفين اللى اتلموا على قبل ما بناتهم تنزل

الحمد لله انا شرحت

cyclic quad

رغم انه فى منهج تالته اعدادى

اه الحمد لله قلت للعيال ازى يعملو

common denominator

و تذكرت ايضا ان فى مساله حلتها معاهم امبارح جت بالارقام فى الامتحان

لا و قلت ان فيه عماره بتعلى فى مساله الاليفاشن ، تفرق ايه لمايجيب بالونه بتنزل

اثبتى يا بت يا ايمى

ان شاء الله عيالك حايحلوا كويس

شويتين و نزلوا بقه كلهم

اللى ما فى حد مش بيعيط

و جم بناتى الحلوين ، تربية ايدى ، بادرسهم ستريت من اولى اعدادى لثانويه عامه

و على و جههم ابتسامه

الحمد لله

يا ما انت كريم يا رب

العيال حلت حلو

حلو اوى

و فيه منهم قفلوا الامتحان كله بالاختيارى بالاجبارى

تصدقوا اليوم ده اسعد من يوم ما انا نفسى حليت حلو فى الثانويه ؟

صحيح السنه اللى فاتت و اللى قبلها كمان الحمد لله كل ولادى جابو فول مارك

بس الامتحانات كانت سهله و عبيطه

احساس مختلف تماما لما تكون الامتحانات منيله بنيله

و العيال تحل

يا ما انت كريم يا رب

هدير - نيرمين -غاده - سمر - هديل - يارا - شيرين - احمد - مصطفى - عمر - داليا - نيرين - ندى .................... اسفه اذا كنت نسيت حد

انتم احلى ولاد فى العالم ، خليتو اليوم اللى كان شكله وحش امبارح

من اسعد ايام حياتى

السنه اللى فاتت كانت ظروف المراجعه فى نفس وقت وفاة احمد اخويا رحمه الله

بس كان معايا ناس ، عمرى ما شفت و لا حاشوف زيهم

كنت باقولهم انا جايه القاهره بكره يا ولاد عشان نراجع

الاقى امهاتهم يتصلوا بى

اوعى تيجى يا ميس ايمان ، قولى نخليهم يحلوا ايه و هما يحلوه ، ما تقلقيش عليهم

و بالفعل قضيت اسبوعين ما شفتهمش

و لما شفتهم

كل ما افتكر اعيط

تخيلوا دفعة باكملها جايين لابسين اسود

كان الحزن فى عيونهم عشان خاطرى لا يوصف

ايه الاخلاق دى و الاحترام ده

و كمان لقيتهم حالين جميع امتحانات السنين الماضيه لحد الامتحان اللى كان سنة قطز حلوه برضه

عشان كده ربنا جازاهم و جازانى انا كمان خير

يا رب نجح كل اولادنا و اولاد المصريين يا رب

دول غلابه هما و اهاليهم حقيقى

مش مسموح للانسان المصرى يرفع راسه لفوق

مش مسموح له فى لحظه يفوق

مش مسموح برضه فى يوم باله يروق

نقول ايه لنا رب كبير فى السما عالى فوق

يفرجها علينا و على ولادنا

و مسيرها يوم تتعدل

و تحلى و تروق

تعليقاتكم على الجروب اتبع اللينك ده

http://www.facebook.com/topic.php?uid=5663673625&topic=4103&start=180&hash=e810233e40fc991d3a4d435c1470c643

وشكرا مقدما للتعليقات

ملخص ما سبق : تحت اهه اقروه هوه انا فاضيه

العيال اللى فى الفصل المتعدد الجنسيات بتاعى ، لما ميس سميره بتاعة الماث ، و ميس ساميه بتاعة الموسيقى ، حبونى اوى ده غير ميس فيوليت اوف انجليش

كلهم كانوا شايفيين انى عبقريه عشان جيت من السعوديه حيث المناهج اسهل بكتير و ما دخلتش تقريبا تالته خالص او دخلتها كده ، و خرجت من الناحيه التانيه و فى ايدى جزمة سندريلا

و مع كل الظروف دى ، اول ما توفرت لى بيئه صحيه للتعلم

حلوه بيئه صحيه دى ؟

بقيت شاطره و بريمو ، غاروا منى ، و بدأوا يعملوا خطط عليى

ايه هى الخطط ؟

مريعه شنيعه

مش حاقدر اتكلم

معلش حاقول ، و احده فيهم اسمها نائله تتصل بى و تقول انها التانيه اللى اسمها رلى

و انا صغيره ما كنتش فاهمه ليه يعنى ايه الفرق هما اصلا صحاب و مع بعض و متفقين

و قلت يمكن لما اكبر شويه ابقه افهم الموضوع ده

و حياتكم لحد دلوقت ما فهمت ليه نائله عملت نفسها رلى ؟

و فى يوم من الايام نظرت لى ميس سميره بحب و قالت ، البت دى ذكيه ، تعالى يا ايمان انتى امسحى البورد

بصيت للشله المفتريه ، لقيتهم كلهم بيكزوا على سنانهم ، قلت للميس ، معلش يا ميس جمانه هى ان تشارج ( المسئوله )

ميس سميره استغربت ، و قالت مين قال كده

من النهارده انت يا ايمان المسئوله عن مسح السبوره فى حصتى

و دى كانت اسعد لحظه فى حياتى المهنيه ، اذ انى انتصرت على الاعداء و بقيت بامسح السبوره ، مين عارف ، يمكن كمان شويه ، اوزع الكراسات ع العيال

و بعدها بكام يوم ، واحده منهم اسمها ريا

قصدى اسمها ربى ، قالت لى يا ايمان لما افتح المقلمه بتاعتك يبقى عايزه اغش منك فى الدين ، تبقى تغششينى ماشى ؟ و بعدين نتصاحب بقه

بصراحه كانت اول مره حد فيهم يكلمنى كويس ، و العرض كان مغرى

اللهم اخزيك يا شوشو ، و بعدين افتكرت مامتى

يا ايمان لا تغشى و لا تغششى يا حبيبتى ............كلمة مامتى المأثوره

المهم جه امتحان الدين ، و البت تفتح فى المقلمه ، و ترزع فيها و تقفل ، و انا اقول لها ششش بسسس

ما فيش فايده

قمت و قلت : يا ميس ، البنت دى عايزه تغش منى

و كانت غلطة عمرى

كل الشله اجمعت و اقسمت ، انى انا اللى بغش منها ، يا جماعه ازاى شوفو درجاتى و درجاتها ، و الميس بقت محتاره ، مش عارفه تعمل ايه ، و بعدين

قالت لى بكل الاطه : اقعدى يا ايمان عيب تفتنى على صاحبتك

و كانت كبسة العمر ، اتعلمت بعدها درس العمر برضه

لما حد يفتح لك المقلمه ، غششه و اسكت

و مع ذلك قعدت اذاكر و ادح ، و بعد ما كنت باطلع الرابعه و الخامسه ، مشيت من الفصل و انا التانيه عليه ،

ليه مش الاولى ؟

عشان كان فيه ولد اسمه محمد محمد الكاتب ، مش عارفه ده كان فى صيدله او هندسه و بيحضر معانا فى رابعه ابتدائى ولا ايه ظروفه

عارفين يعنى العقد النفسيه ، جابهالى كلها و الله

شاطر بغباء يعنى ، فعشان كده كان الاول ع الفصل هوه التانى بعد محمد الكاتب

عشان هوه حاجز حضرتك علطول الاول

ياترى هوه فين دلوقتى ؟

مرت ايام دبى بحلوها و مرها ، كانت برضه اجمل من مصر ميت مره و انضف ، و كنت برضه بحب مصر ، عمرك شفت عيله صغيره كده بتحب مصر

يعنى هناك كل جمعه بابا كان يودينا اوتيل و ننزل البيسين و اوبن بوفيه و عيشه

و ارجع بالليل اعيط زى النكديه ، عايزه اروح لطنط توحاه

دى خالة والدى الله يرحمها و كانت جدتى الحقيقيه

و بمناسبة البيسين مره قعدت انا ومروه نعيط لماما

عايزين نروح البحر الحقيقى

صحابنا بيروحو جبل على ينزلو البحر المملح عايزين نروحه

مش كله بيسين بيسين ( انا عارفه عيال فقر ماشى

المهم بابا قعد يحذرنا

يا بنات الموج عالى اوى هناك حاتتبهدلوا

ما لناش دعوه عايزين نروح البحر

ماشى حاوديكم

و حسيت فى عينين بابا نظره كده غير مريحه

و رحنا البحر

اول ما نزلنا بسلامتنا موجه شنيعه مليانه رمل و حصى كبير كده

ديش فى وشى انا و مروه لقينا نفسنا جنب ماما تحت الشمسيه

و حاولنا للمره التانيه

و نفس العلقه بالضبط و الرمل فى الميه بيخبط فى وشنا و هو رمل كبير كده و بيوجع

المهم تانى مره قعدنا بقه جنب ماما

جه بابا : مانزلتوش ليه الميه يا حلوين

احنا : خلاص نزلنا شكرا عيزين ناكل و النبى

مش عارفه انا لقيت البحر اتقلب كده بقه فوق و السما تحت

عشان بابا راح شايلنى انا و مروه

و رمانا فى البحر

انا سايق تلاتين كيلو عشان تقولو نزلنا

و دينى لانتو نازلين البحر

و احنا نعاااايط

خلاص يا بابا و الله ما نقول نروح البحر تانى

و هو ابدا و الله لازم تنزلو البحر

خلاص يابابا و دينا البيسين براحتك اخر مرااااه

لو حد فيكم كان فى جبل على ساعتها و شاف المشهد التالى

عيال بتعيط و تنزل الميه و هى بتعيط و الموج يرميهم بره

و و يرجعوا تانى ينزلوا الميه معيطين

دول يبقو انا و مروه

و مش الهة جبال الاوليمب اللى كانت عاملالنا العقاب ده

لا ده بابانا حضراتكم هاهاها

وهو كان فين

كان فى الميه عشان كان خايف نغرق

ماهو برضه الضنى غالى

بس مش اوى الظاهر

من الحاجات اللى كانت بتجننى برضه فى دبى مع ان االناس هنا فى مصر فى اول التمانينات كانوا بيروحوا ملحق هلتون رمسيس خصيصا عشان يستعملوها

السلالم الكهربائيه

انا كانت عقدة عمرى ان مافيش مول فيكى يا دبى الا فيه سلالم كهرباء

و رغم انى عايشه هناك ، كنت امشى اتنين كيلو لحد ما الاقى سلم عادى انزل من عليه

كنت حاسه ان السلم ممكن يشفطنى و اطلع منه مدرجه

زى توم فى الكارتون بتاع القط و الفار

لا ما تخافوش

دلوقتى باطلع و انزل عادى خلاص

ده بعد ما لقيت ولادى بينزلو على الطالع بالعكس و لا هاممهم

اتكسفت اوى اوى اوى

طبعا كان العمر ده كله مر علينا من غير ما نحضر شتاء فى مصر ابدا ، و لا فى غيرها عشان الدول العربيه صيف بس ، اختى الصغيره مروه

( هى فى دبى حاليا بالمناسبه السعيده دى

كانت كل شويه تطلب من بابا نروح محل معين فى الغرير

كان اكبر مول فى دبى مروه بتقول عليه دلوقتى بقه خان الخليلى بتاعهم هاهاه

المهم رحنا المحل ده

الست عايزه تشترى ايه ؟

زحافات تزلج على الجليد و عصيان بتاعتها

بابا سالها : ايه يا بنتى عايزاهم ليه

مروه : يا بابا مش رايحين مصر و بتقولو هناك فى شتاء ، ناخد دول برضه نستعملهم فى التزلج

@#$%^%$%##%$#@$#@$@@

لا دى حاجات بابا قالها لمروه مش حاقولها لكم

و عدت الى بلدى بكل الفرحه ، و كدت اقبل ارض المطار من فرحتى بالعوده النهائيه

يا حبيبتى يا مصر يا مصر ، يا حبيبتى يا مصر يا مصر

طبعا كده فكرتكم بكاس الامم الافريقيه

و فى المطار جاء المفتش بتاع الجمرك عشان يبهدلنا

قصدى عشان يفتشنا

و كان معانا ستريو بابا حطه فى كيس و اداهولى اشيله عشان كان معانا فيديو وبلاوى متلتله حاتتجمرك فقال خلاص بقه مش لازم ده كمان

جه مفتش الجمارك الجميل سال بابا معاكم حاجه تانيه

بابا رد لا خلاص

انا بقه : يا بابا حضرتك نسيت ده يا بابا الكيس اللى معايا يا بابا

و سياحه بقه

جه بقه مفتش الجمرك و سالنى ايه ده يا حبيبتى مسجل

قلت له لا ايه مسجل ده

ده استريو يا عموووووو

@$##^%^%$&^%&^%&^%^%$$#^%*&

^%^$^%$%^$%$#%$#$#^%$##*&*&*&%

دى بقه حاجات بابا قالهالى انا لما طلعنا من مطار القاهره

و وصلنا مصر و بدانا الصدمات الحضاريه ..............يتبع

تعليقاتك مستنياها هنا و على الجروب كمان

لينك التعليقات

http://www.facebook.com/topic.php?uid=5663673625&topic=4103&start=150&hash=04983ba214567ba2e256c33e05821aed

لما كنت فى سنه ثالثه ابتدائى

سافرنا مع مامتى و بابايا من السعوديه لدبى

ورحنا فى نص السنه و مافيش اى مدرسه رضيت تقبلنى

مامتى اتحايلت على واحد مصرى طيب صاحب مدرسه خاصه عشان يدخلنى

وافق بشرط مامتى تشتغل فى المدرسه

و دخلت سنه تالته

و سالت عن الفصل

لقيت فصل واحد بس

قاعد فيه تلات صفوف من العيال

صف كبير ده اسمه سنه اولى

و صف تانى جنبه اقصر منه شويه اسمه سنه تانيه

و صف بتاعى قاعده فيه لوحدى اسمه سنه تالته

اه و الله العظيم ما باكذب

و كانت الميس المناضله تخش الحصه و تقول سنه اولى يركزوا معايا

و لازم احنا فى الوقت ده ما نركزش و ننفض

بس ما نتكلمش

طبعا كان سهل خالص ما اتكلمش انا قاعده لوحدى اساسا

بس قالولى كان فيه بنت تانيه معايا بس اتجوزت

ايوه دى كانت بنت اماراتيه و كبيره عندها خمستاشر سنه باين و بعدين جالها عريس فخرجت من سنه تالته

و بعد ما الميس تعمل شغل سنه اولى تديهم حاجه يحلوها او يكتبوها و تطلب من سنه تانيه تركز

و انا عماله ادعى

يا رب ييجى دور سنه تالته بقه احسن انا حايجيلى تخلف

و فى الاخر لما ييجى دورى

تقعد الميس على الديسك بتاعها و اروح انا عندها عشان تشرحلى لوحدى

اتارى الفصل ده كان فاتح كده صغير عشان منهج مصرى و لغات و كان مختلف عن بقية المدرسه

و رضيت باقدارى الحزينه و استمريت اذاكر و اعمل الواجب

رغم ان الميس عمرها ما كانت بتلاقى وقت عشان تشوفه و لا تصلحه

حتلاحق على مين و لا مين

و كانت رفيعه و عندها برد مزمن و مناخيرها حمرا طول العمر

رغم ان دبى فى منتهى الحر

لكن الظاهر من تكييف الكلاس

و بعد مده لا يعلمها الا الله و مشاكل مع العيال فى الفصل و خناقات

مامتى قدرت تدخلنى مستمعه فى مدرسه حكوميه فى دبى

و بدات مرحله جديده فى حياتى

الفصل ماليان عيال بس انا مش فاهمه منهم ولا كلمه

عشان كلهم اماراتيين و انا حتى فى السعوديه كان مدرستى كلها مصريين و لبنانيين و سوريين

و المدرسه دى كانت غريبه جدا

كانت بتوزع اكل ع العيال ساعة البريك

ساندوتشات شيدر و لانشون و تفاح و موز و بلاوى كتيره كده

المهم كل اللى استفدته من المدرسه دى الساندوتشات

لان كان عندنا مدرسة ماث فلسطينيه

باكرهها حقيقى الله يسامحها

كانت فاكرانى حاضره السنه كلها زى العيال التانيه

رغم انهم كانوا برضه مش فاهمين حاجه

و مره سالتها سؤال كسفتنى كسفة العمر كله

فكرهت التعليم و فكرت اشتغل اى حاجه بتانيه ابتدائى بقه و خلاص

و احسن حاجه حصلت انى عملت دور رائع فى مسرحية سندريلا فى المدرسه

دور مين ؟

سندريلا ؟

لا اقل شويه

الامير ؟

لا برضه اقل شويه

مرات ابو سندريلا ؟

لا اقل شويه و لاحتى اخواتها و لا الجنيه و لا الفار

امال مين يا ايمان مش فاضل غير الجزمه انتى عملتى دور الجزمه ؟

لاه

عملت دور الراجل اللى كان ماشى مع الامير يقيس للبنات الجزمه

من اعظم ادوارى بصراحه

و باقول جمله واحده بس

لقد امرنى سيدى ان اقيس هذا الحذاء لكل فتاة فى المدينه

و زودت انا من عندى ( بصرف النظر عن مدى فقرها او غناها )

مما جعل المدرسه تنبهر بى و تسمينى محمود ياسين فى دور الجزماتى هاهاهاها

و طبعا ده مش نتيجة نقص فى قدراتى التمثيليه او انى كنت وحشه لا سمح الله

بالعكس لما كنت فى السعوديه كنت باقوم بجميع ادوار البطوله المطلقه

عشان مامتى كانت هى المشرفه على الحفله هاهاها

لكن فى دبى كان فى بنت تانيه مامتها هى المشرفه على الحفله و هى اللى كانت سندريلا

فى الحقيقه كان فيه عدد من المشرفات ولادهم عملوا ادوار من اول سندريلا لحد مرات ابوها و اخواتها

و الدور الوحيد اللى فضل كان الدور الفظيع بتاعى

( بس انا اشترطت عليهم ما البسشى حد الجزمه بنفسى عشان باقرف و انى اعمل نفسى بالبسهم بس )

عدت الايام دى بحلوها ومرها و الحمد لله

و رحت مدرسه تانيه بقه انترناشونال من اول السنه الجديده

كانت مختلفه تماما

ملاعب و حمامات سباحه و موسيقى و كل حاجه جميله

و فى المدرسه دى اتعلمت موسيقى و بابا جاب لى اورج و اصبحت اعزف

و اتعلمت انجليش تحفه

بس عرفت بقه يعنى ايه عيال صغيره كده و منفسنه ، يعنى كان معايا بنات فلسطينيات صحاب بعضهم من زمان

عملوا على رباطيه جامده جدا

و كرهونى فى حياتى

و اول مره اعرف ان ممكن حد يعمل خطط على حد تانى

واحده فيهم اسمها رلى بعتت لى رساله من تحت الماء اول ما دخلنا الفصل

فى اول يوم فى السنه

و كانت الرساله بتقول انها هى رائده الفصل و ربى هى المساعده و جمانه اللى بتمسح البورد

يعنى انسى خالص انى امسك اى مناصب كبيره فى هذا الفصل

و طبعا زعلت لانى كنت لسه عيله و نفسى امسح البورد

ايه انتو فاكرنى مولوده ميس و قرفانه من مسح البورد و لا ايييه ؟

بس اللى عوضنى عن كل حاجه

ميس سميره مدرسة الماث

يا حبيبتى يا ميس سميره ، يا رب يكرمك

كان الماث صعب جدا فى دبى و كنا بناخد فى رابعه و خامسه زى اولى و تانيه اعدادى فى مصر وقتها

و انا كنت ابيض لانى ما رحتش اصلا سنه تالته تقريبا

بس انا كنت باحب الميس و هى كمان عشان كنت شاطره جدا

و ساعتها و انا فى رابعه ابتدائى

قررت انى اخش كلية الهندسه

و زادت نفسنه العيال المنفسنين على

يتبع الاسبوع القادم ..........

فيه ناس لسه بتحب تعلق فى الجروب

اللنك اهه

http://www.facebook.com/topic.php?topic=4103&post=13631&uid=5663673625#post13631

وعلى فكره التعليقات هنا فى المدونه مفتوحه الان

ادخل و سيب تعليقك و ممكن كمان تكتبلى على صندوق الشات اللى ع اليمين ده

ايه العنوان ده يا ايمى

انتى بطلتى كتابة مذكرات و بقيتى بتكتبى خيال علمى

لا بس اسمعونى :

وانا فى سنه اولى مدنى

يعنى بعد اعدادى هندسه مباشرة

و كنت خلاص عرفت انى ما عدتش شاطره زى زمان و لا حاجه

و تقبلت فكرة ان كل العيال اللى معايا فى الكليه دى جايبين مجاميع برضه

و انى خلاص بقيت بليده

و ده اصلا ستايلش اكتر من انى اكون دحاحه

( الكلمه دى زى ما يكون دجاجه )

كان عندنا ماده اسمها احصاء و كومبيوتر، و كان المفروض انها هايفه عشان هى مش من صميم دراسة المهندس المدنى

دى تبع كهرباء اكتر و هما بياخدوها بتوسع جامد جدا

ما كانش لسه اتعمل نظام التيرم و كنا بنمتحن اخر السنه و كنت يعنى ممشيه حالى فى الامتحانات الشهريه

( اه يا جماعه فى امتحان شهر فى كلية هندسه و امتحان تيرم و ميد تيرم و كوارتر وواجب كمان و مش فاضل غير انى كنت اشيل شنطه على ظهرى و احيي العلم الصبح و منهم لله اللى ضحكو عليا و قالولى لما تروحى الكليه حاترتاحى من شغل المدارس )

المهم اننا رحنا اجازة نص السنه الاقصر و اسوان انا وبابا و ماما و اختى الصغيره مروه

و بعدين قابلنا هناك مييين

الدكتور بتاع الاحصاء و حاسميه دكتور م

بابا اتعرف عليه عشان كان نازل معانا فى نفس الاوتيل و ماما اتعرفت على مراته

و هوه كان سمعته فى الكليه مش ولا بد و انه بيسقط العيال و لمؤاخذه يعنى

بيعاكس بنات الكليه

بس على مين انا قلت لبابا و لا يهمك انا ممتازه فى الاحصاء دى بالذات

ده انا كنت بادى دروس فيها و انا فى اعدادى هندسه

لكن مشكلتى كانت فى الكومبيوتر كنا بندرس لغة الفورتران

ما نا ستغربت زيكم برضه

قلت هوه انا داخله كلية الالسن عشان ادرس لغة الفورتران و لغة التوتسى و الهوتو

لكن طلعت دى لغه من لغات برمجة لمؤاخذه الحاسب الالى

بس ما كنتش خايفه برضه رغم انى كنت انا و انتيمتى ماهى تحف فى الماده دى

بس برضه قلنا الاحصا حاتشيلها

المهم بابا ربنا يكرمه قعد يظبط فى الدكتور م ده و يعزمه ع الغدا و العشا و كباب و بتاع عشان التظبيط المظبوط

و حياتكم

اول محاضره بعد اجازة نص السنه

طردنى خاين العيش و الكباب انا و ماهى مع بعض

ليه ؟

و النبى مانا فاكره كنت نايمه باين

او يمكن مادام انا و ماهى انطردنا سوا يبقى كنا بنتكلم و نتفق اننا نروح للكوافير

بعد المحاضره

و لقيت كل الاطفال فى الدفعه بيبصولى انا و ماهى بشفقه شديده جدا و نا مش عارفه فيه ايه ( لحد الوقت ده )

راح الخبراء اللى معانا ( الخبراء دول اللى هما ساقطين و شايلين احصا )

قالولنا اننا بالشفا كده شلنا الاحصاء الف مبروك

يا لهوى الحقى يا ماهى شلنا الاحصاء

عشان الافندى ده لما يطرد طالب لازم يشيلهاله

و الكومبيوتر مع السلامو عليكو من بدرى اساسا

و امتحنا اخر السنه

و الله العظيم حليت كويس فى الاحصاء

انما النيله التانيه دى مش فاكراها خالص

المهم ان الدكتور المحترم ده كلمنى فى البيت و قاللى اروحله المكتب بعد الامتحانات و قبل النتيجه

عشان ادور على ورقتى وسط الورق وهو ينجحنى

قلت لماما لاه
الشرف غالى يا اماى
مكتب ايه اللى اروحله فيه ده
ما يقبض الروح الا اللى خلقها
و ماما برضه قالتلى و انا كنت حاخليكى تروحى يعنى خللى اللى عنده يعمله
خاين الكباب ده

و المفاجاه اننا فعلا شلنا الاحصا و الكومبيوتر كماده و احده

منك لله يا دكتور م انت و دكتور الكومبيوتر

بس الشهاده لله دكتور لغة الفورتران ده ما لوش ذنب

ده احنا ما كناش نعرف لغة الفورتران دى بتتكتب من اليمين للشمال و لا من فوق لتحت اصلا

عدت الايام و كان النظام بيقول اننا نمتحن الماده اللطيفه دى تانى سنه و احنا فى سنه تانيه

نروح نمتحنها مع دفعة سنه اولى

و كان فيه امتحان مهم جدا الدكتور بتاع الفورتران قال اللى يعدى منه خلاص ينجح اخر السنه مهما عمل عشان عليه خمسه و اربعين فى الميه و كان الدكتور بتاع الاحصا كمان مشى من الكليه يعنى ما فيش مشاكل

الامتحان ده كان هيصه من غير لجنه و لا بتاع و داخل المدرج نفسه

قعدت انا و ماهى حبيبتى وسط طلبة الدفعه الاصغر مننا

نقرا الاسئله

يا نهار اسود

ده احنا لسه مش فاهمنها برضه يا ماهى

ده انا قلت يمكن لمانكبر شويه نعقل و نفهمها

فطست ماهى من الضحك و قالتلى واحنا بقه حانضيع اليوم

ياللا نسلم الورق و نمشى

قلت لها نسلم الورق ليه

على اساس انهم حايحتاجو الورق ده فى حاجه بعد كده

بيحمروا بطاطس و حياحطوها عليها

ده احنا ما كتبناش و لا كلمه

و بعدين ده ورقنا احنا جايبينه معانا مش كراسات اجابه

و الاخوه الاندال بتوع الدفعه دى مش حايغششونا لانهم واضح انهم ماشيين على نفس خطانا الميمونه

و مش فاهمين حاجه

احنا ناخد ورقنا فى ادينا و نمشى يا ختى

و قد كان

خدنا ورقنا و مشينا

و احنا نازلين قابلنا زمايلنا الجدعان معانا فى الدفعه و كانو رجاله

ووقفوا وقفة رجاله

كانوا جايبلنا واحد صاحبهم من دفعتنا بس كهربا

يعنى من الاخر الفورتران دى لغته الاصليه

كان بيتكلم فورترانى لبلب هاهاهاه

حازم زعق لنا و قال انا لسه كنت طالع اغششكم انتم نزلتو ليه بس

قلت له طب خد كده يا حازم تعرف تحل الامتحان ده

طبعا حازم حله فى دقيقه و انا و ماهى عمالين نبص له و عقلنا عاجز عن ادراك نسبة ذكاء هذا الشخص

قتلتله بمنتهى الالاطه انت متاكد من حلولك دى ما توديناش فى داهيه

مش فاكره هوه قاللى ايه بس فيما معناه يعنى يا شيخه اتلهى

قال يعنى كنتى مقفله الورقه

وانا و ماهى قعدنا نكتب الحلول فى الورق الحلو بتاعنا اللى كنا خدناه معانا و ماسلمناهوش

و بعدين بعد ما كتبنا الحلول كلها قلت لها تعالى نغير شويه عشان ما يقولوش علينا غاشين من بعض

ماعندكش حل اخر يا حازم

انذر سولوشن يعنى عشان ما يفتكروناش غاشين

مش عارفه هوه كان بيحاول يعمل حاجه بس تلاته من زمايلنا

اللى كانوا واقفين وقفه رجاله

مسكوه مسكة رجاله

كل ده فين

فى كافيتريا هندسه

و بعدها خدو زمايلنا ورقنا و طلعو بيه تانى المدرج

طبعا ما كانش ينفع انا و ماهى ندخل خالص عشان احنا كنا معروفين زى ورقة البوسته فى الكليه

الاتنين الوحيدين اللى مش محجبين هاهاها

و بعدين اثناء الهيصه بتاعة لم الورق و الدوشه اللى بتحصل عشان كل الدفعه كانت مع بعض فى نفس الوقت

تم دفس ورقنا فى وسط الورق

و استنينا شويه كده كام يوم

و فى يوم لقينا نتيجة الكونترول تست اتعلقت

رحت انا وماهى نبص من تحت لفوق و احنا بندعى يا رب ننجح و مش لاقيين اسامينا

و فيييين

عرفنا

انا وهى طلعنا الاولى و التانيه على الدفعه فى الماده و الدكتور عايز يقابلنا

ماهى طبعا زعلت عشان كانت عايزه تطلع الاولى

انماانا حسيت انها مش حاتعدى و انه حايحصل نوصيبه

كان لازم تغشش بضمير اوى كده يا منيل

لو الدكتور سالنا اى سؤال من اللى فى الورقه مش حانعرف ولا كلمه

دخلنا للدكتور و سالنا قد بدت عليه امارات الذكاء و الخطوره

اهلا بالاوائل ؟ قلتولى بقه انتو شلتو الماده دى ازاى لما انتم بالشطاره دى

انا وماهى فى نفس واحد : ماحنا ذاكرنا يا دكتور

و قررت ماهى ان تفتكس

احنا خدنا كورس فورتران فى الصيف يا دكتور

لقينا الراجل فطس من الضحك و انا و ماهى مش عارفين فيه ايه

و انا بقول لنفسى باين عليه حبنا اوى الراجل ده

الدكتور : اذا كانت اللغه دى اصلا لغه غير مستخدمه اطلاقا و عمر ما حد بياخدها كورس يعنى مش ورد و لا اكسيل عشان تاخدوها كورس يا ختى منك ليها

بالضبط زى ما واحد يقول انا رحت خدت كورس لاتينى فى الايه يو سى

فرحانينلى اوى بالشعر و الماكياج

بكره تخشوا النار و بئس المصير

ليه كده يا عم ما يمكن نتوب و نتحجب ده حتى شاديه تابت

ده فى سرى طبعا

لكنى قلته طيب لما هى لغه ميته بتدوهالنا ليه ؟ مش حرام الظلم ده ؟ احنا من كتر غلبنا اتفقنا مع طالب اكبر مننا فى كهربا

و برقتلى ماهى و هى عايزه تدينى بوكس فى وشى

و كملت انا فى ثقه عاليه

و قعد طول الصيف يشرحلنا فيها لحد ما وصلنا للمستوى الرائع ده

فقرر الدكتور انه يرمى باخر اوراقه لانه واثق اننا غشاشين و جزم

حتى لو ما كناش شايلينها قبل كده دى منظر ناس تذاكر

قال : كل واحده فيكو تكتب اللى حاقوله ده فى ورقه

و كتبنا كل اللى قاله

كان بيقارن الخطوط بسلامته

تصدقوا الدمعه فرت من عينى

و الراجل صعب على موت

عشان لقاه طبعا خطنا و كانت كبسه جامده جدا

و طبعا اسقط فى يده ( حلوه اسقط فى يده دى ؟ معناها كبسه بس بالفصيح)

لما لقى الخط ده خطنا و الدرجه من حقنا مين اللى يمنع طير انه يطير فى السماااااااااا

نجحنا فى الماده و كانت اخر مره نغش

من حازم يعنى

انما كنا بنغش من ناس عاديين زينا كده عشان مش طالبه خالص نطلع الاوائل تانى

و دى كانت اول مره و اخر مره اطلع الاولى فى امتحان فى كلية الهندسه

و الله وحشتونى و ردودكم على وحشتنى اكتر

ممكن تبعتوها على اللينك ده

http://www.facebook.com/topic.php?uid=5663673625&topic=4103

click : reply to topic