الأربعاء، 23 أبريل، 2008

مهرجان التسوق

من احب الهوايات لاى ست انها تشترى
تشترى ايه مش مهم
المهم انها تشترى
و نظرا لانى ست برضه زى اى ست
باحب اشترى اوى
كنت بافرش شقتى الجديده و كان لازم اغير الفرش
بصيت لقيت اسعار الصالونات و السفرات نار يا حبيبى نار رغم انها ما تختلفش كتير عن حاجاتى القديمه
قلت ايه اعمل واعيه و اشترى اقمشه جديده و اجدد الصالون و السفره كده اوفر
و قد كان
سالت اصدقائى احسن مكان فين الاقى فيه اقمشه
قالولى وكالة البلح بس لازم تفاصلى

ده انا ملكة الفصال و الله لا بهدلهم هناك
و نزلت انا و طارق جوزى ، انا اخر شياكه و جوزى حاطط لى السماعه البلوتوث فى ودنه
المهم رحنا محل شيك هناك و شفت قماش عجبنى لونه لانى ما بافهمش فى الخامات اوى
و سالت الراجل بكام ده
قاللى بميه و عشره جنيه
قلت له لا لا لا
ده غالى خالص
خليه بستين جنيه بس
قالى طيب ماشى عشان خاطرك اقص كام متر

قلت له لا خليه خمسه و خمسين
قاللى حاضر برضه بس ترضيلى انا اشيل الفرق ده
قلت له اه شيل الفرق عادى ما الناس لبعضيها يا اخى

المهم جبت القماش و جبت منجد مخصوص جالى البيت و قعد يعمل فى القماش يوم كامل و خد مبلغ و قدره و قاللى يا مدام القماش بيبقع بسهوله اوى خلى بالك و كمان خفيف شويه
قلت له حاحاول احافظ عليه بقى اعمل ايه

تانى يوم انا و جوزى ماشيين بالعربيه فى الازهر و الاقى قماش اخو اللى انا شارياه عند محل حقير خالص
قلت لجوزى لو سمحت نزلنى هنا اسال عليه
الزحمه يا ايمان و بتاع
عشان خاطرى يا طارق

نزلنى طارق
لقيت المتر بكام يا اساتذه
باربعتاشر جنيه و قابل للفصال لسه
يانهار اسود ومنيل

يعنى ممكن لو قرصت على الراجل سنه اخده باتنين جنيه المتر


و لقيت الدم فار فى دماغى و خلاص وشى احمر و كنت حاموت

راح جوزى قعد يهدى فى يا حبيبتى اهدى خلاص بقه مش مهم
قلت له مش مهم؟؟؟
قسما عظما لازم تودينى دلوقتى حالا

و نقاش طويل عريض وهوه مصر انى مش حاخد حقى و انا مصره انى حاخده تالت و متلت كمان

و طبعا كالعاده انتصرت فى النهايه لانى قلت له انى حاخد تاكسى و اروح لوحدى و انا اساسا مش عارفه السكه

الباشا جوزى جه معايا المحل و وقف مؤدب و ساكت
لقيت الراجل بيبيع قماش لواحده و بيقولها ده ارخص سعر يا مدام و اسالى بره
قلت لها يا مدام اوعى تشترى دول نصابين و اكيد حاتلاقى ده اغلى سعر و انا سالت بره

الراجل انذهل عشان هوه ما كانش فاكرنى , قلت له انا عايزه صاحب المحل
يا مدام فيه ايه
قلت له صاحب المحل حالا و الا انا مورايش حاجه و مقطوعه
حاقعدلك هنا طول النهار كل ما يجيلك زبون اطفشه اوكى

جه صاحب المحل و سالته متر القماش ده بكام
قاللى بتلاتين جنيه
قلت له الافندى ده قاللى ميه و عشره
الاعيب التجار بقه و قعد يقولى اصل فيه خامات و بلا ازرق
قلت له اوعى تفتكرنى هانم انا من بولاق و حيات ربنا لو ما جبت لى حقى دلوقتى لاروح على البوليس كمان و انت حر
قاللى طلباتك
قلت له حاخد عشرين متر قماش من نفس النوع ببلاش اعمله ستاير عشان انا شديته على الصالون فعلا و مش نافع و حسبى الله فيكم ( انا كنت شاريه سبعه متر على فكره )

قاللى حاضر
طبعا جوزى كان فى حالة ذهول
كان فاكر انه مش حايرضى و حايعند معايا
لكن انا نفسى استغربت
ما ضاع حق و راءه مطالب و الله


المهم تانى يوم نزلت جاليرى شيك اوى اوى و لقيت قماش تحفه على صالون عنده و سالته القماش منين
قاللى من فلان و ده محل مشهور اوى اوى
و قلت له حضرتك فاكر بكام الا حضرتك اسمك ايه
قاللى انا استاذ معوض
قلت له طب فاكره بكام
قاللى استاذ ابراهيم صاحب المحل بيبيعلى بخصم غير الناس يعنى باخد خصم كبير لو عايزاه ابقى اشتريهولك منه و اعملهولك على الصالون اللى يعجبك
قلت له انا عايزه قماش بس من غير صالون
قاللى لا يا مدام ما ينفعش لازم تاخدى صالون من عندنا

مشيت خلاص على راى الاستاذ الكبير وائل جسار

و رحت المحل المذكور و لقيت القماش اللى عجبنى بميتين جنيه المتر
و سالت فين الاستاذ ابراهيم
جه الاستاذ ابراهيم
قلت له اهلا استاذ ابراهيم انا جايالك من طرف خالو معوض و قاللى ان حضرتك حاتعملى اللى انا عايزاه

قاللى اهلا و سهلا بالغاليين نقى اللى انت عايزاه و عينى ليكى

نقيت بقه قماش للصالون و لاتنين بيرجير و بعدين الراجل عملى لى خصم مهول يعنى حوالى الف جنيه خصم
اكيد يا جماعه هوه مش خسران مش حايبيع بخساره عشان معوض لكن احنا ماشيين فى البلد دى ناكل على قفانا و يتنصب علينا يوميا ....................

بس الشهاده لله كل ما شوف القماش منورعلى الصالون ادعى علطول لخالى الاستاذ معوض هاهاهاهاهاهاهاه
ا


http://www.facebook.com/topic.php?uid=5663673625&topic=4103&start=0&hash=f5e28f793234360ee02b901a80e7dfd3
لينك التعليقات على الجروب لو عندكم حكايه شبيهه شاركونا

الخميس، 17 أبريل، 2008

العين صابتنى و رب العرش نجانى ................

الحسد .............
ايه رايكم
موجود و مذكور فى القران و اللى يقول غير كده يبقى كداب
لكن عمركم شفتوه كده بعنيكم
و فى تلاثه ايام ورا بعض
اليوم الاول :
وصلت الشغل بالعربيه ( اللى كانت جديده و قتها و كان كل الناس بصالها شويه عشان حلوه و مقلوظه ) و ركنتها و طلعت الفصل لحد هنا و الامر طبيعى
بعد شويه لقيت واحد زميلى ربنا يخليه جاى يجرى بسرعه و يقول
ميس ايمان ميس ايمان
فى حد راجل قاعد فى عربيتك
يا لهوى ............. تلاقيه جوزى بس نسى حاجه و جاى ياخدها ماهو معاه مفتاح
لا يا ميس ما عتقدش انه جوزك
ليه انت تعرف جوزى
كل ده و انا باجرى ع السلالم
لا الحقيقه ما حصليش الشرف بس اعرف الراجل اللى فى العربيه وهو مش جوزك
بابص من الشباك فى احد الادوار و انا نازله
لقيت منظر غريب جدا
راجل لابس لمؤاخذه فانله و اندر وير و قاعد فى عربيتى
يا فضيحتك وسط العربيات يا عربيتى
يقولو عليكى ايه و فى راجل قاعد عريان كده فيكى ..........
طبعا عند المنظر ده توقفت و اديت المفتاح لزميلى و قلت له و النبى انزل شوف الحكايه اصلى خايفه من الراجل ده
و بعدين يمكن يكون بيزرع قنبله و لا حاجه فى العربيه عشان انا اصلى مستهدفه شويه

طلع ايييه
راجل مجنون من اللى بيمشو فى الشوارع و بيجرب كل اكر العربيات
و لجل حظى كنت نسيت اقفلها فى اليوم ده بالذات

و طبعا دخل
و كان عايز يشغل الكاسيت ده اللى قالهولى زميلى من تحت
و انا من فوق مش حايشتغل يا استاذ بيشتغل مع الكونتاكت

و بعدها قفلو زمايلى العربيه و طلعو ادونى المفاتيح
بس كان عندى مشكله اقعد ازاى مكان الاخ ده
جبت جرايد و نزلت فرشتها فى الكرسى و ساعتها لقيت احد زملائى نازل ورايا
جرايد ايه اللى حاتفرشيها يا ميس ايمان
تبيعى على خمستلاف جنيه ؟؟؟؟؟؟؟؟؟؟؟
بس حمدت ربنا عشان بدل المجنون كان ممكن ييجى حرامى ويقلبنى
الحمد لله
العين صابتنى و رب العرش نجانى


اليوم الثانى :
ركنت العربيه اول واحده فى طابور عربيات
و بعدين افتكرت مس جيهان مديرتى بتحب تركن اول الطابور قلت استزوقى يا ايمان و ارجعى ورا سنه
و قد كان رجعت مسافة عربيه واحده
و انا داخله المدرسه لقيت واحده زميلتى ركنت فى الحته اللى كنت سايباها فاضيه
قلت لا حول الله انا كنت سايباها لميس جيهان

و بعد دقائق فى الفصل
لقيت نفس الزميل المحترم جاى يجرى
ميس ايمان الحقى عربيتك يا ميس ايمان
يادى النهار الكحلى هوه ما فيش فى مصر غير عربيتى
اعمل ايه يا ولاد اطلع العربيه معايا الفصل و لا اولع فى روحى و لا اعمل ايه
نزلت لقيت اغرب حادث مرورى ممكن يحصل
اتوبيس سياحى فاخر واقف مش معشق الفرامل
رجع بسلاسه و لطف على عربية زميلتى اللى خدت مكان ميس جيهان ( اللى هوه كان اساسا مكانى ) و عجن عربية زميلتى رفرف بكبوت باكصدام باشاره بهيصه
و بعدين عربية زميلتى ما وقفتش ساكته
راحت مريحه على عربيتى
فوانيس بس اماميه عادى يعنى و شبكه و بتاع
لكن لما شفت عربية زميلتى حمدت ربنا ع اللى جرالى وقلت
العين صابتنى ورب العرش نجانى

اليوم الثالث :
العربيه ريحتنا كلنا و راحت تتصلح و زميلى اللى طالع نازل خلاص قعد يشرب الشاى و ارتاح برضه
بس اليوم ده كان مهم عشان كان فيه صوره للبنات مع المدرسات
قلت يا بت ما تستخسريش فى نفسك البسى فستانك الكحلى اللى ما تلبسش غير مره واحده
عشان البنات لما يكبرو و يشوفو الصوره يقولو كان عندنا ميس مزه زمان

و بعدين الفستان كان حلو
مش راييى
ده راى كل اللى شافنى فى اليوم ده
و مصلاش ع النبى الظاهر
و لاحظو انى كنت اصغر من كده بتمن سنين و لسه شابه
يعنى مدرسات زميلاتى طلعو من الفصل مخصوص عشان يشوفو الفستان
جرى ايه يا ولاد هوه التركيز كله على و اللا اييه
و انا ماشيه فى الكوريدور ( نسيت اوصفلكم الفستان هوه كان عباره عن جزئين واحد تحت قماش تخين عادى وفوقه جاكيت شيفون طويل تونيك يعنى لحد الارض و مفتوح من الجنبين بس جماله ان الاتنين كانو لون واحد بالضبط )
و انا ماشيه اييه الشيفون طرفه طار و مش عارفه رشق فى حاجه غريبه جدا
طفاية حريق فى الطرقه
و اتنتش
يييه , قلت مش مهم دى نتشه صغيره بس كانت مدوره
و كل ما اشوف حد اوريله النتشه عشان يرحمونى و يبعدو عنى
يكون الرد ايييه
دى صغيره وممكن تترفى
دى حتى مش باينه
امال عايزين منى ايييييييه
بعد شويه عرفت عايزين منى ايييه

نزلت اروح مع واحده صاحبتى طيبه عشان مش معايا عربيه بقه خلاص باى باى
و ركبت ورا
و كانت العربيه دايهاتسو ميرا الننه دى
و بعدين قفلت الباب و العربيه مشيت
و فجاه لقيت الفستان طابق على نفسى
يا نهار اسود
انا باتخنق
قعدت الياقه تطلق لفوق لحد ما وصلت لاخر رقبتى و سامعه صوت الفستان بيتقطع
و انا باصرااااخ
وقفو العربيه
انا عايزه اعيش مش مهم الفستااااااااان
عارفين ايه اللى حصل
كاوتش العربيه الورانى لف على طرف الفستان و بدا يسحب فيه و يخنقنى حبه بحبه
الحمد لله صاحبتى وقفت بس الفستان بقى نصين
و اصبحت النتشه نكته مضحكه بالنسبه للى جراله , و لما مامتى شافته فى الدولاب بعد كده سالتنى
ايه اللى عمل كده يا حبيبتى
قلت لها داست عليه عربيه
بس المشكله انى كنت فيه ساعتها
بس الحمد لله
العين صابتنى و رب العرش نجانى

ده لينك التعليقات على الجروب

http://www.facebook.com/topic.php?uid=5663673625&topic=4103&start=0&hash=f5e28f793234360ee02b901a80e7dfd3

و اى تعليقات هنا برضه مرحب بيها اخر حاجه



الأربعاء، 9 أبريل، 2008

ما تزوقينى يا ماما قوام يا ماما

النهارده المذكرات مختلفه
مش واحد بس اللى كتبها لا اتنين
انا و اختى الصغيره

عشان القصه مرتبطه بينا احنا الاتنين مش انا بس
بس انا فكرت انى اكتبها مرتين مره بوجهة نظرها هى ( هى اللى باعتهالى على فكره )
و مره تانيه بوجهة نظرى انا
دعاء :
فرحى اللى كان متحدد معاده من قبله بسبع شهور و محجوز القاعه استعدت العيله له استعداد هايل
و ده بان ايمان اختى الكبيره و مامتى الاتنين عملو عمليات جراحيه فى نفس الوقت
و من الاخر ما حدش فاضى يلف معاكى يا دودو على فستان الفرح
انت ممكن تلفى انت و حد من اصحابك و ايمان تعمل اللمسات الاخيره بس عشان برضه احنا لسه مش واثقين فيكى اوى
و اختارولى انى الف فى اسكندريه عشان فى ناس صحابنا كتير جابو فساتين تحفه من هناك
و انا كمان استعديت انى نقيت واحده صاحبتى ما تتخيرش عنى حتى اسمها دعاء برضه احنا الاتنين مالناش فى أي حاجه فى العالم غير فى الدح فى الكليه و خلاص( شوف القدره بقه ) و سافرت معاها عشان نلف ع الفستان على امل انى ايمان تيجى تانى يوم و تشوفه معايا
قعدت الف انا و دعاء صاحبتى على المحلات انى الاقى حاجه عاجبانى ....... أبدا
و فجاه و احنا مروحين خلاص و يائسين لقينا محل كبير مخصص بس لفساتين الافراح و حسيت ان ده اللى عليه العين و حاجه جوايا دفعتنى على فستان ما شفتش غيره بينادينى و دخلت قسته
و اللى زاد من تعلقى بيه اغنية ما تزوقينى يا ماما اللى صاحب المحل كان مشغلها لى
معقوله فعلا رائع و الله كل شىء نصيب و ما كنتش عايزه اقلعه ده فستانى اللى حلمت بيه هيه هيه هيه و صاحبتى طبعا وافقتنى انه اروع الفساتين و زين الفساتين و ورد و ياسمين
و روحت مع صاحبتى ونمت نوم عميق و انا بحمد ربنا ياااه طول عمر البنات يتعبو فى اللف على فساتينهم الا انا عشان بس الواحد طيب
يا بركة دعاكى يا ماما
و جت ايمان بتعرج بعد العمليه تانى يوم يا عينى و ماشيه تزك و حالتها كرب
و بعد ما دوختها لحد ما وصلنا المحل هيه و ابيه طارق جوزها عشان انا كنت نسيت هوه فين انا و الخبيره الاجنبيه اللى كانت معايا , المهم وصلنا فى النهايه و برضه لقينا الراجل مشغل اغنية ما تزوقينى يا ماما
شفتى الفال يا ايمان اهه امبارح برضه شغلها من غير ما يعرف انى عروسه شفتى بقه
غمضى عينك يا ايمان بقه عشان المفاجأه
بصى بقه يا ايمان
و فجاه دابت ابتسامتها الجميله و بصتلى و صوتت و مش فاكره اوى اذا كانت لطمت و الا لاه قلتلها ايه يا منونتى وحش
قالت لى وحش ده شويه عليه
ده نيله خالص
هوه ده اللى حلمت بيه
اعمل ايه بس يا ربى
و طبعا فى ثانيه حسيت انه زباله ماهى طالما قالت عليه كده يبقى عندها حق ما هى اختى من زمان و انا باثق فيها
قلتلها بس انا اديت الراجل خمسميت جنيه عربون و قاللى انت كده حجزتيه و لو رجعت فى رايك مش حتاخدى الفلوس
قالتلى خشى اقلعى و انا حاتصرف
طلعت للراجل اللى كان فاتح بقه ع الاخر من السعاده
ايمان: معلش يا استاذ احنا مش حانقدر ناخد الفستان ده عشان عريان
الراجل : عريان ايه يا مدام ده بكم
ايمان : لا لا لا انا شايفاه عريان خالص و مش نافع
و فى اللحظه دى طلعت من البروفه و انا عامله نفسى حزينه ع الفستان
ايمان : ايه يا دعاء ما تنكسريش كده و لا يهمك
الراجل : طب يا مدام نقفلك اللى انت شايفاه عريان
ايمان : كان نفسى و الله هوه انا بالساهل على انكسار اختى قدام عينى كده دى بنتى يا ولاد مش اختى و بس ده انا كانت تنفعلى عين و لا اشوفهاش حزينه كده و قامت حاضنانى و قالتلى فى ودنى منك لله يا بعيده
و كملت
و بعدين ده العريس متشدد اوى و دقنه قد كده و اخواته منقبين مانا عارفاه كويس ده كان دفعتى
الراجل الدمعه فرت من عينه و قام ادانى الخمسميت جنيه
و ادانى عليهم خمسين جنيه و هوه بيمسح دمعه خانته و بيقول
ده نقوطك يا عروسه ارجوكى ما تنكسريش

انا الدكتوره دعاء اسامه اصعب على الراجل لدرجه انه ينقطنى , كان لازم تزوديها كده يا ايمان فى هذه الاثناء كانت صاحبتى دعاء خرجت من المحل و مرميه عل الرصيف من كتر الضحك ع الموقف
و حمدت ربنا انى ما جتبش الفستان ده اكيد كان حد عاملى عمل عشان اجيب الفستان الزباله ده
يا رب يخليكى يا اختى يا ست الحبايب يا حبيبه هاهاها
بعد كده خدتنى على جرين بلازا لمحل هى عارفاه و فى خمس دقائق نقتلى فستان حسسنى انى كنت منقيه شبشب امبارح
و غيرت ايمان طبعا فى تصميمه عشان كان حيعاد عمله عشان مخصوص يعنى مش جاهز عشان الفصوص و اللمعه و كده و لما صاحب المحل قالها يا مدام بس كده يبقى عريان اوى
ردت بكل الاطه : اصل العريس فرى خالص و روش طحن مانا عارفاه ده كان دفعتشىىىى


ايمان :
كان نفسى اسافر مع دعاء يا اجيب معاها الفستان من الاول
دى خدت دعاء صاحبتها و هما الاتنين ما انيل من سيدى الا ستى
لكن العمليه الغبيه دى
العمليه ما كاتش فى رجلى خالص انما قمت من العمليه اقول اااااااه يا رجلى
مش عارفه ليه ماهو كل ما واحد فى مصر يخش يعمل عمليه عشان يلم الجاكته لازم يلاقى البنطلون يضرب
المهم كلمت دعاء ع الموبايل و قالت لى انها خلااااص لقت فستان الاحلام
يا رب المره دى يا دعاء
سافرت انا و طارق و سبت العيال مع ماما اللى كانت رخره بتدير الموقف من ع السرير عشان لمؤاخذه برضه كانت عامله عمليه و وصلت و قابلت العزيزه دعاء
لفينا بتاع ست ساعات لحد ما وصلنا المحل المقصود و هو مخصص لفساتين الزفاف فقط
و الغريبه ان دعاء متفاءله اوى باعنيه ما تزوقينى يا ماما
يعنى محل عرايس حايحط اغنيه ايه ؟ ذهب الليل ...؟
و طول السكه دعاء مصدعانى بحلاوة الفستان و جمال الفستان و فشاشة الفستان
و انا رجلى واجعانى مش ناقصه يا رب تصدق
دخلت المحل و انا اتوجس خيفه المحل اخر عره معلش جايز هى اكتشفت اللؤلؤ هنا و قالتلى غمضى عينك
غمضت عينى و انا مش متطمنه
و فتحت
يا لهوى
حاولت ادارى انفعالى على قد ما قدرت يعنى ابتسامتى الجميله انتو عارفينها ما نفعتش برضه لقيت نفسى دماغى بتوجعنى و عايزه اعيط حبه كده
ايه الفستان ده يا دعاء
ده عشان يعجبك لازم تكونى مغمضة الانف و الاذن و الحنجره
جلابيه من الاخر و كمان بكم
طب اعمل ايه يا ربى و هى دافعه للراجل فلوس
المهم قررت العب على عواطف الراجل لانى حسيته شويه عاطفى
مش عارفه صاحبتها طلعت بره ليه
والله انا ما قلت حاجه تضحك بس دعاء الشهاده لله عملت دور المنكسره و كانت تستاهل عليه الاوسكار
المهم الحمد لله ربنا ستر و جبنا الفلوس من الراجل و رحت معاها بقه لحته تانيه و محل تانى و اخترت فستان تااانى خالص
بس بصراحه
انا عمرى ما حانسى فستان دعاء و لا فرح دعاء و لا انى حسيت يومها انها احلى عروسه فى الحياه
لا قبلها و لا بعدها
خاصة ان مهمتى لم تقتصر ع الفستان
يعنى انا كنت ستايليست بتاعتها
انا نقيت لها التسريحه و حتى لما مسيو عبده سالها احط لك عدسات ملونه يا عروسه
بصت لى زى النونات ما بتبص لمامتها رحت قايلاله حط يا عبده
بس الشهاده لله ما حدش شافها الا لما قال قمر 14
ربنا يخليها ويخلى لها ولادها يا رب
ممكن اصدقاءى فى الجروب يعلقو على اللينك ده
و ممكن اى تعليق مرحب بيه هنا برضه فى بند تعليقات

الأربعاء، 2 أبريل، 2008

افلام الرعب - تابع

كنت وعدتكم احكى عن فيلم THE RING


عشان ده كان اخر علاقتى مع افلام الرعب


و بصراحه ردود افعالكم على حكاية THE OTHERS


شجعتنى اوى عشان الفيلم ده كمان كان مشكله
انا الاول قريت عنه فى الجرايد طبعا مع الترجمه الفظيعه ( المكالمه المفزعه )
حتى انا مافهمتش ايه العلاقه يعنى ذا رينج معناها الحلقه مش المكالمه خالص حتى الرنه اسمها رينج تون مش رنج بس

انما انا متعوده على كده فى الترجمه فى مصر


زى ما يكون عاملين حسابهم ان الشعب كله من الجهله و العياذ بالله


يعنى اسمع كده خد عندك
فيلم اسمه NO WAY BACK

تكون ترجمته الحسناء و الثعبان

و تروح الفيلم ما تلاقيش اى ثعبان و لا حتى حسناء


غير كده اخر حاجه فيلم اسمه
GEORGIA RULES

ترجمته اجازه عائليه جدا

طب الطم على وشى ده حتى لو واحد جاهل حايعرف ان دول كلمتين و الترجمه تلاته ايه ده
عارفين نظام عمكو سمير غانم لما كان بيقول
استرانجر ان ذا نايت
شيخ البلد خلف ولد


و الله هوه ده النظام


دلوقت انا خرجت عن الموضوع
فيلم ذا رنج ده كان من حوالى اربع خمس سنين و كنت وقتها عايشه فى القاهره لوحدى و جوزى شغله بره القاهره

فى يوم جابلى تلفزيون جديد كبير تسعه و عشرين بوصه اكبر من اللى كان عندى ( كان واحد و عشرين ) و قال هوه حياخد القديم معاه

قلت خير و شكرته خالص و بعدين قاللى نحتفل بقه بالتلفزيون

ازاى يا سيدى
قاللى نروح السينما بقه

قعدت اضحك و المهم نزلنا انا و هوه بس عشان العيال كانو نامو و الحفله كانت ميد نايت


الفيلم كان بجد مرعب


لا لا حقيقى مرعب


كل حاجه فيه مرعبه و الخضات كتيره اوى و كان بيحكى عن قصة بنت ميته من عشرميت سنه بتطلع من التلفزيون و تقتل الناس
و فى وسط الفيلم و انا اخر شده اعصاب وورايا شويه شبابا عمالين يولولو و يصوتو
لقيت حاجه صغيره جايالى من جنبى
من ناحية الحيط عشان انا كنت لازقه فى الحيطه
يا لهوى هوه انا موعوده يا ناس
طب و النبى مانا باصه
لقيت الحاجه دى بتمسك ايدى
ياخرابىىىىىىىىىىىىىىىىىىىىىىىىىىىى
قمت اصوت فى نص السيما
و فى نفس اللحظه كان فيه واحده ست بتصوت يا فوشفوش
ات فين يا فوشفوش
اتارى دى طفله صغيره ما تزدش عن سنتين نزلت من حجر مامتها و بتتفسح بقه فى السيما
بعد ما هديت مسكت الطفله و قعدت ابص جامد فى وشها
ما للى فى الفيلم و مطلعه البلاء الازرق على جتته الخلق طفله برضه و ممكن يكون اسمها فشفش برضه
المهم ناديت امها
يا ست يا ام فش فش
جت الست و الحمد الله اتطمنت على بنتها
قالتلى معلش اصلى كنت بارضع اخوها قامت من حجرى و مشيت
قلت لها و كمان اخوها و بيرضع
ياناس ارحمونا مش دى ميد نايت برضك
يعنى العيال احنا سايبنهم فى البيت نيجى نلاقيهم هنا
راحت ام فش فش زعلت منى مش عارفه ليييه
و قالت لى يا مدام احنا دافعين تذاكر زينا زيك
قلت لها ايوه بس الاطفال دى مالهاش ذنب تسهر لحد دلوقتى
ردت ام فش فش انا باجيبهم دلوقت عشان بيرضو ينامو فى السينما يعنى اللى عندهم ولاد يعنى ما يتفسحوش
و كان جرسه فسكت خالص و سبت الملعب لام فش فش و رجعت لزقت فى جوزى اللى قاللى
يعنى انت علطول جايبالنا الكلام كده
قلت له ناس ناقصه مش كفابه فش فش دى اللى كانت حاتوقف قلبى ده انا كنت حاخنقها من غير ما ابص

المهم ان سمارا فى الفيلم كانت بتطلع من التلفزيون و تقتل الناس اللى شافو الفيديو بتاعها
و اللى كان يشوف الفيلم ده لازم لازم حد يكلمه فى تليفون البيت ( مش الموبايل ) مع ان ممكن اي حد تانى يرد
المهم تجيله مكالمه تقوله سبع تيام
يعنى يموت بعد اللهم احفظنا سبع تيام


طبعا البت شكلها بهدله وانا اتبهدلت حقيقى اوى فى الفيلم ده و على راى بنت خالتى ازاى البنت دى مش خايفه من نفسها اساسا

و مش محتاجه اقولكم انها كالعاده جاتلى بالليل و قمت من النوم و قفت ابص على جوزى جامد اوى صحى يا عينى و صرخ جامد
رحت انا كمان مصرخااااااااااااااه اوى

حرام عليكى صرخ فى

قلت له معلش كنت فاكراك فش فش

و كانت مهزله
المهم بعد كده حلف انى ماليش افلام رعب تانى عشان باطلعه على عنيه بالليل

انا كمان حلفت


بس على حاجه تانيه
نه ياخد التلفزيون الكبير معاه و هو مسافر
عشان البت فى الفيلم كانت بتطلع من تلفزيون كبيييييييييييير قوى
و هوه نازل قلت له

ابعت البواب تانى ياخد الصغير كمان
انا حاقضيها راديو
مالها نجوم اف ام


هاهاهاهاهاهاهاهاهاها



اتفرج على مسئوليتك



http://www.youtube.com/watch?v=IlhZCDlEmh0&NR=1





بالنسبه للينك التعليقات على الجروب


http://www.facebook.com/topic.php?uid=5663673625&topic=4103


لو ماعلقتوش يبقى حكاية البلوج دى ما عجبتكوش !!!!!!!!!!!!!!!!!!!!

Template by:

Free Blog Templates